ພູເບ້ຍ ເລີ່ມສຳຫຼວດກຽມຂຸດຄົ້ນບໍ່ແຮ່ໃໝ່ ໂຮງງານພູຄຳ

  ບໍລິສັດ ພູເບ້ຍ ມາຍນິງ ກຽມສຳຫຼວດພື້ນທີ່ຕອນເໜືອຂອງໂຮງງານຜະລິດ-ປຸງແຕ່ງ ທອງ-ຄຳ ພູຄຳ ເພື່ອຂະຫຍາຍການຂຸດຄົ້ນແຮ່ທາດຕື່ມພາຍຫຼັງຈະສິ້ນສຸດອາຍຸການສຳປະທານໃນປີ 2021, ຊຶ່ງປະຈຸບັນໜ່ວຍງານທີ່ກ່ຽວຂ້ອງພວມນຳເອົາແຮ່ທາດຂຶ້ນມາວິໄຈ ແລະຄາດວ່າອີກບໍ່ດົນຄົງຮູ້ຜົນ.

  ທ່ານ ບຸນໂຮມ ອິນສີຊຽງໃໝ່ ຫົວໜ້າພະແນກຂຸດຄົ້ນບໍ່ແຮ່ຂອງບໍລິສັດ ພູເບ້ຍ ມາຍນິງ ທັງເປັນຜູ້ຮັບຜິດຊອບການຂຸດຄົ້ນແຮ່ທາດໃນໂຮງງານຜະລິດ-ປຸງແຕ່ງ ທອງ-ຄຳ ພູຄຳ ໃຫ້ຮູ້ວ່າ: ການຂຸດຄົ້ນໃນເຂດໂຮງງານຜະລິດ-ປຸງແຕ່ງ ທອງ-ຄຳ ພູຄຳ ແມ່ນມີຄວາມຍາວທັງໝົດ 1,5 ກິໂລແມັດ ແລະກວ້າງ 1,2 ກິໂລແມັດ, ມາຮອດປະຈຸບັນ ບໍລິສັດ ກຳລັງຂຸດລົງຊັ້ນທີ່ເລິກຈາກໜ້ານໍ້າທະ ເລແມ່ນ 260 ເລດາ ແລະເລິກລົງຈາກ ໜ້າດິນປະມານ 5 ຮ້ອຍແມັດ,

ໂດຍ ການຂຸດຄົ້ນແຮ່ແມ່ນອີງໃສ່ແຜນການຂອງເດືອນຄື 1 ແສນໂຕນຕໍ່ມື້ ແລະປະ ມານ 3 ລ້ານກວ່າໂຕນຕໍ່ເດືອນ, ລວມທັງແຮ່ທາດທີ່ແກ່ເຂົ້າໂຮງງານ ແລະດິນ ທີ່ບໍ່ມີທາດໂລຫະ ຊຶ່ງເປັນພຽງແຕ່ດິນເປີດບໍ່ອອກໜ້າ, ສ່ວນແຜນການຂຸດຂອງໂຮງງານດັ່ງກ່າວແມ່ນປະຕິບັດຕາມແຕ່ລະໄລຍະ, ສະເພາະແຜນປີນີ້ແມ່ນຈະເນັ້ນໃສ່ຂຸດຄົ້ນໃນໄລຍະທີ 6 ຄື: ຂຸດພາກພື້ນບໍ່ ແລະໄລຍະທີ 7 ສຸມໃສ່ຂຸດຄົ້ນເຂດບໍ່ເບື້ອງເໜືອ ແລະເບື້ອງໃຕ້, ສ່ວນແຜນຂຸດຄົ້ນຕໍ່ໜ້າກໍຄືປີໜ້າແມ່ນຈະຂຸດຄົ້ນທາງເບື້ອງທິດເໜືອ ແລະ ຄາດວ່າ 2020-2021 ຈະເລີ່ມຂຸດຄົ້ນ, ສຳລັບໄຕມາດ 3 ຂອງປີນີ້ແມ່ນຍັງສືບຕໍ່ຂຸດຢູ່ຈຸດເດີມບໍ່ມີການຂະ ຫຍາຍເພີ່ມ.

  ທ່ານ ບຸນໂຮມ ອິນສີຊຽງໃໝ່ ໃຫ້ຮູ້ອີກວ່າ: ສຳລັບແຜນການຂະຫຍາຍເນື້ອທີ່ບໍ່ໃໝ່ຂອງໂຮງງານພູຄຳ, ທາງບໍລິສັດພຽງແຕ່ພະຍາຍາມຕໍ່ອາຍຸຂອງບໍ່ອອກຕື່ມໃຫ້ຮອດປີ 2023 ຕາມແຜນເດີມແມ່ນຈະສິ້ນສຸດໃນປີ 2021 ແລະ ການຂະຫຍາຍເນື້ອທີ່ໃໝ່ນີ້ແມ່ນນອນຢູ່ໃນເຂດສຳປະທານຂອງບໍລິສັດ, ຊຶ່ງໄປ ທາງທິດເໜືອຂອງເນື້ອທີ່ບໍ່ເກົ່າ ແລະຄາດ ວ່າເນື້ອທີ່ໃໝ່ ທີ່ຈະຂະຫຍາຍເພີ່ມມີປະ ມານ 30% ຂອງເນື້ອທີ່ເກົ່າ, ສຳລັບ ການສຳຫຼວດຫາແຮ່ທາດໃໝ່ນີ້

ແມ່ນຈະໃຊ້ເວລາສຳຫຼວດທັງໝົດ 12 ເດືອນ ແລະ ປະຈຸບັນແມ່ນພວມຢູ່ໃນຂັ້ນຕອນຂອງການສຳຫຼວດເບິ່ງແຮ່ທາດທີ່ມີໃນດິນ ແລະ ຖ້າຫາກວ່າມີຄວາມເປັນໄປໄດ້ໂຄງການຍັງຈະສືບຕໍ່ຂະຫຍາຍການຂຸດຄົ້ນອອກໄປເຖິງປີ 2023 ແຕ່ທັງນີ້ທັງນັ້ນການຈະຂະຫຍາຍເນື້ອທີ່ການຂຸດຄົ້ນກໍຕ້ອງລໍຖ້າລັດຖະບານອະ ນຸຍາດໃຫ້ມີ ການຕໍ່ອາຍຸການສຳປະທານອີກ.

ພາບ ແລະຂ່າວໂດຍ: ໜັງສືພີມເສດຖະກິດ-ສັງຄົມ

แชร์