ຫາລືກ່ຽວກັບການສຶກສາຮຽນຮູ້ສຳລັບຜູ້ໃຫຍ່

ໃນວັນທີ 6 ມິຖຸນາ 2019 ກະຊວງສຶກສາທິການແລະກີລາຮ່ວມກັບຫ້ອງການປະຈຳພາກພື້ນຂອງສະມາຄົມການສຶກສາຜູ້ໃຫຍ່ຂອງເຢຍລະມັນ (DVV International)ໄດ້ຈັດກອງປະຊຸມປຶກສາຫາລື,ແລກປ່ຽນບົດຮຽນກ່ຽວກັບການສຶກສາການຮຽນຮູ້ສຳລັບຜູ້ໃຫຍ່ກັບນັກການສຶກສາໃນພາກພື້ນອາຊຽນ ໂດຍການເປັນປະທານຂອງທ່ານ ຄຳຜາຍ ສີສະຫວັນຮອງລັດຖະມົນຕີກະຊວງສຶກສາທິການແລະກີລາພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ຄຳຜາຍສີສະຫວັນກ່າວວ່າ: ການຈັດເວທີປຶກສາຫາລືໃນຄັ້ງນີ້, ຈະເປັນການປະກອບສ່ວນເຮັດໃຫ້ບັນຫາດ້ານການສຶກສາສຳລັບຜູ້ໃຫຍ່ຢູ່ ສປປ ລາວ ໄດ້ຮັບການພັດທະນາ ແລະໄດ້ຮັບການສຶກສາທີ່ມີຄຸນນະພາບຊຶ່ງການສຶກສາສຳ ລັບຜູ້ໃຫຍ່ເປັນພາກສ່ວນໜຶ່ງທີ່ນອນໃນລະບົບການສຶກສາແຫ່ງຊາດຂອງແຕ່ລະປະເທດນັບແຕ່ຊັ້ນອະນຸບານຈົນເຖິງມະຫາວິທະຍາໄລແຕ່ວາບົດບາດຂອງການສຶກສາສຳລັບຜູ້ໃຫຍ່,ສ່ວນໃຫຍ່ແມ່ນການສຶກສານອກໂຮງຮຽນ ຊຶ່ງເດັກນ້ອຍ ແລະຜູ້ໃຫຍ່ທີ່ປະລະການຮຽນ (ບໍ່ໄດ້ຮຽນໜັງສື) ຈະລະດົມໃຫ້ເຂົ້າມາ ສຶກສາຮໍ່າຮຽນໃຫ້ຈົບຊັ້ນປະຖົມສຶກສາ, ມັດຖະຍົມຕົ້ນ ແລະມັດຖະຍົມ ຕອນປາຍ. ຢ່າງໃດກໍ່ຕາມນັບແຕ່ນີ້ຮອດປີ 2030 ພົນລະເມືອງນັບແຕ່ອາຍຸ 15-35 ປີ ຕ້ອງຈົບຊັ້ນມັດ ທະຍົມຕອນປາຍ.ໃນໄລຍະຜ່ານມາ ສປປ ລາວ ກໍໄດ້ປະກາດຈົບຊັ້ນປະຖົມສຶກສາທົ່ວປະເທດແລະປະຈຸບັນ ພ້ອມດຳເນີນຈັດຕັ້ງປະຕິບັດແກ້ໄຂລຶບລ້າງໄພກືກໜັງສືແນໃສ່ເຮັດໃຫ້ພົນລະເມືອງລາວ ໄດ້ຈົບການສຶກສາຊັ້ນມັດທະຍົມຕອນຕົ້ນ,ຕອນປາຍ ແລະອື່ນໆ.

ການສຶກສາສຳລັບຜູ້ໃຫຍ່ແມ່ນຍັງຂາດຄວາມເອົາໃຈໃສ່ຈາກລັດຖະບານແລະທົ່ວໂລກຊຶ່ງເກີດຈາກຫຼາຍປັດໄຈເຊັ່ນ: ການສຶກສາຂອງຜູ້ໃຫຍ່ເປັນແນວຄິດທີ່ສະຫຼັບຊັບຊ້ອນແລະຍາກຕໍ່ການອະທີບາຍຊີ້ແຈ້ງຄວາມໝາຍສະນັ້ນຈຶ່ງເປັນເຫດຜົນໜຶ່ງທີ່ບໍ່ໄດ້ຮັບການເອົາໃຈໃສ່ເທົ່າທີຄວນໂດຍມີບົດວິໄຈຢ່າງໜຶ່ງເວົ້າວ່າ: ສຽງສ່ວນໃຫຍ່ຂອງຜູ້ປົກຄອງເຫັນວ່າການສຶກສາຂອງ ເດັກນ້ອຍ (ສາຍສາມັນ) ແມ່ນສຳຄັນກວ່າການສຶກສາຂອງຜູ້ໃຫຍ່ເພາະພວກເຂົາຄິດວ່າການສຶກສາໃນໄວເດັກແມ່ນມີຄວາມກ້າວໜ້າ ແລະຄວາມອາດສາມາດໄປໄດ້ໄກກວ່າແຕ່ເຖິງຢ່າງໃດກໍຕາມຍັງມີບາງອົງການໃນທົ່ວໂລກສະໜັບສະໜູນການສຶກສານອກໂຮງຮຽນເຫັນເຖິງ ຄວາມສຳຄັນຕ່າງໆ ແລະໂອກາດ ໃນການຮຽນຮູ້ຂອງທຸກລະດັບ.

ພາບ ແລະຂາ່ວໂດຍ: ໜັງສືພິມເສດຖະກິດ-ສັງຄົມ

แชร์