ຕະໂອ້ຍ ມອບ-ຮັບໜ້າທີ່ຮັກສາການເລຂາພັກ-ເມືອງ

 ທ້າຍອາທິດຜ່ານມານີ້, ເມືອງຕະໂອ້ຍ ແຂວງສາລະວັນ ໄດ້ຈັດພິທີມອບ-ຮັບໜ້າທີ່ເລຂາພັກ- ເຈົ້າເມືອງຕະໂອ້ຍລະຫວ່າງທ່ານ ບຸນໂຮມ ໂກມສຸນີ ອາດີດກຳມະການພັກແຂວງເລຂາພັກເຈົ້າເມືອງຕະໂອ້ຍ ກັບທ່ານ ບຸນເນື້ອ ຫຼອງຄຳໄຕ ຮອງເລຂາພັກເມືອງຫົວໜ້າກອງບັນຊາການປ້ອງກັນຄວາມສະຫງົບເມືອງເປັນຜູ້ຮັກສາການແທນໂດຍຊ່ອງໜ້າຂອງ ທ່ານ ສີສຸວັນ ວົງຈອມສີ ເຈົ້າແຂວງສາລະວັນ, ມີບັນດາພາກສ່ວນທີ່ກ່ຽວຂ້ອງຕະຫຼອດຮອດຫົວໜ້າ-ຮອງຫ້ອງການອ້ອມຂ້າງເມືອງເຂົ້າຮ່ວມ.

 ໂດຍປະຕິບັດຕາມຕົກລົງຂອງ ຄະນະເລຂາທິການສູນກາງພັກ ສະບັບເລກທີ 18 ລົງວັນທີ 19 ກຸມ ພາ 2019 ວ່າດ້ວຍການອະນຸມັດ ໃຫ້ພະນັກງານອອກພັກຜ່ອນຮັບອຸດໝູນບໍານານໂດຍອອກມະຕິຕົກລົງໃຫ້ ທ່ານ ບຸນໂຮມ ໂກມສຸນີ ອອກພັກຜ່ອນຮັບອຸດໝູນບຳນານ ແລະ ປະຕິບັດຕາມຂໍ້ຕົກລົງຂອງເຈົ້າແຂວງສາລະວັນ ສະບັບເລກທີ 293, ລົງວັນທີ 23 ພຶດສະພາ 2019 ວ່າດ້ວຍການແຕ່ງຕັ້ງຜູ້ ຮັກສາການເລຂາພັກ-ເຈົ້າເມືອງໆ ຕະໂອ້ຍ ເຫັນດີແຕ່ງຕັ້ງ ທ່ານ ບຸນ ເນື້ອ ຫຼອງຄຳໄຕ ເປັນຜູ້ຮັກສາການເຈົ້າເມືອງໆຕະໂອ້ຍຜູ້ໃໝ່.

  ຜູ້ເຂົ້າຮ່ວມໄດ້ຮັບຟັງບົດລາຍ ງານການຈັດຕັ້ງປະຕິບັດວຽກງານຕະຫຼອດໄລຍະ 5 ປີຜ່ານມາໂດຍລວມເມືອງຕະໂອ້ຍ ແມ່ນມີຄວາມ ສະຫງົບໂດຍພື້ນຖານ ແລະໄດ້ປະຕິບັັດແຜນຍຸດທະສາດໃນການກໍ່ສ້າງກໍາລັງຕາມທິດສ້າງບ້ານ-ກຸ່ມບ້ານສູ້ຮົບລຽນຕິດ ແລະສ້າງເມືອງໃຫ້ກາຍເປັນຫົວໜ່ວຍສູ້ຮົບເອກະລາດຕິດພັນກັບການພັດ ທະນາຊົນນະບົດຮອບດ້ານຕາມ 4 ເນື້ອໃນ 4 ຄາດໝາຍ ບົນຈິດໃຈ 4 ບຸກທະລຸກ, ເສດຖະກິດສັງຄົມມີ ການພັດທະນາຂຶ້ນເປັນກ້າວໆ, ຂະຫຍາຍຕົວຢ່າງຕໍ່ເນື່ອງ, ໝັ້ນທ່ຽງ ໃນລະດັບ 8.06% ຕໍ່ປີລວມ ຍອດຜະລິດຕະພັນພາຍໃນບັນລຸ 1.036.71 ຕື້ກີບ, ສະເລ່ຍໃສ່ພົນລະເມືອງປະຕິບັດໄດ້ 6.275.26 ກີບຕໍ່ຄົນຕໍ່ປີ ຫຼື ເທົ່າກັບ 787 ໂດລາສະຫະລັດ ເພີ່ມຂຶ້ນຈາກ 2014  ໃນຈໍານວນ 59 ໂດລາສະ ຫະລັດ, ພ້ອມນີ້ກໍ່ໄດ້ເອົາໃຈໃສ່ແກ້ ໄຂບັນຫາປະກົດການຫຍໍ້ທໍ້ຕ່າງໆ ທີ່ເກີດຂຶ້ນພາຍໃນສັງຄົມເຊັ່ນ: ບັນຫາຢາເສບຕິດ, ຂີ້ລັກງັດແງະ ແລະອື່ນໆ ໃຫ້ຫຼຸດໜ້ອຍຖອຍລົງ ເທື່ອລະກ້າວ, ເອົາໃຈໃສ່ຈັດຕັ້ງຜັນ ຂະຫຍາຍຜົນສໍາເລັດກອງປະຊຸມ ໃຫຍ່ຜູ້ແທນອົງຄະນະພັກເມືອງຕະໂອ້ຍ ຄັ້ງທີ XII ລົງສູ່ບ້ານ ແລະຮາກຖານບ້ານໃນທົ່ວເມືອງ, ຫັນລົງປັບປຸງກົງຈັກການຈັດຕັ້ງຂອງ ໜ່ວຍພັກ ແລະອໍານາດການປົກ ຄອງໃນແຕ່ລະບ້ານໃຫ້ມີການຊີ້ ນໍາໆພາຢ່າງເປັນລະບົບ, ຊຸກຍູ້ສົ່ງ ເສີມການຜະລິດ ແລະແກ້ໄຂຊີວິດ ການເປັນຢູ່ຂອງແຕ່ລະບ້ານໃຫ້ມີ ການຜະລິດຢ່າງກ້ວາງຂວາງ, ສືບຕໍ່ນໍາພາກໍ່ສ້າງບ້ານຈຸດສຸມຕົວ ແບບຕາມແຜນການທີ່ວາງໄວ້, ຕິດຕາມກວດກາການປະເມີນສ້າງໜ່ວຍພັກປອດໃສເຂັ້ມແຂງ ແລະໜັກແໜ້ນ, ສາມາດສະກັດກັ້ນປະກົດການຫຍໍ້ທໍ້ໃນທົ່ວເມືອງໃຫ້ຫຼຸດໜ້ອຍຖອຍລົງເທື່ອລະກ້າວ.

ຂ່າວ: ກິລິຍາ ຄໍາຫຼ້າວີຍະເກດ  

แชร์