ຊາວກະສິກອນທົ່ວປະເທດ ປູກພືດລະດູຝົນໄດ້ 83%

 ເພື່ອຄໍ້າປະກັນຄວາມໝັ້ນຄົງທາງດ້ານສະບຽງອາຫານໂດຍສະເພາະເລັ່ງໃສ່ການຜະລິດທີ່ມີຄຸນນະພາບຕິດພັນກັບການຂາຍເປັນສິນຄ້ານັ້ນ, ຊາວກະສິກອນໃນຂອບເຂດທົ່ວປະເທດໄດ້ລົງສູ່ການປູກພືດລະດູຝົນຢ່າງ ເປັນຂະບວນກ້ວາງຂວາງຊຶ່ງມາຮອດປະຈຸບັນການປູກພືດສໍາເລັດແລ້ວ 153,397 ເຮັກຕາຂອງ ເນື້ອທີ່ປູກພືດທັງໝົດ 185,000 ເຮັກຕາ ເທົ່າກັບ 83% ຂອງແຜນການ.

  ອີງຕາມບົດສະຫຼຸບປະຈໍາເດືອນພຶດສະພາຂອງກະຊວງກະສິກໍາ ແລະປ່າໄມ້ ໃຫ້ຮູ້ວ່າ: ປະຈຸບັນຊາວກະສິກອນໃນທົ່ວປະເທດສາມາດເກັບກ່ຽວເຂົ້ານາແຊງສໍາ ເລັດແລ້ວ 85.020 ເຮັກຕາ ເທົ່າ ກັບ 96% ຂອງເນື້ອທີ່ປັກດໍາໄດ້ 88.968 ເຮັກຕາ. ນອກຈາກນີ້, ກໍມີການກຽມພ້ອມປັດໄຈການຜະ ລິດໃຫ້ແກ່ລະດູຝົນປີ 2019 ໃຫ້ໄດ້ຕາມແຜນການເຊິ່ງຕົວເລກການກຽມດິນ,ຕົກກ້າ ແລະການປັກດໍາເຂົ້ານາປີແມ່ນກໍາລັງເກັບກໍາຢູ່. ສໍາລັບການປູກພືດຊາວກະສິກອນປູກພືດຜັກຊະນິດຕ່າງໆໄດ້ ແລ້ວ 153.395 ເຮັກຕາເທົ່າກັບ 83% ຂອງແຜນການ, ພືດທີ່ນິຍົມປູກສ່ວນຫຼາຍແມ່ນສາລີອາຫານສັດ, ສາລີຫວານ, ມັນຕົ້ນ, ຢາສູບ, ອ້ອຍ, ຖົ່ວດິນ ແລະເຜືອກມັນຕ່າງໆ. ໃນນັ້ນ, ເຂດທີ່ປູກພືດຫຼາຍກວ່າໝູ່ແມ່ນພາກກາງປະຕິບັດໄດ້ 65.719 ເຮັກຕາ, ພາກເໜືອ 58. 737 ເຮັກຕາ ແລະພາກໃຕ້ 28.942 ເຮັກຕາ. ນອກຈາກນີ້, ແຜນດໍາເນີນງານຜະລິດເປັນສິນຄ້າໄດ້ຕິດຕາມຄຸ້ມຄອງຜົນຜະລິດກະສິກໍາ, ສິນຄ້າສົ່ງອອ ກພືດ ແລະຜະລິດຕະພັນພືດທັງໝົດ 66.255 ໂຕນມູນຄ່າ 17 ລ້ານ ກວ່າໂດລາສະຫະລັດ; ສ່ວນສິນຄ້ານໍາເຂົ້າພືດ ແລະຜະລິດຕະພັນພືດທັງໝົດ 5.947 ໂຕນ ມູນຄ່າ 2 ລ້ານກວ່າໂດລາ.

   ສໍາລັບວຽກງານລ້ຽງສັດ ແລະການປະມົງກໍໄດ້ລົງຕິດຕາມກວດກາດ້ານສຸຂະນາໄມສັດຢູ່ໂຮງຂ້າສັດເຊິ່ງສັງລວມສັດທີ່ຖືກຂ້າຈໍາໜ່າຍມີທັງໝົດ 11.121 ໂຕ. ໃນນີ້, ຄວາຍ 591 ໂຕ, ງົວ 1.229 ໂຕ, ໝູ 8.785 ໂຕ ແລະແບ້ 516 ໂຕ; ສ່ວນສັດປີກ 49.159 ໂຕ. ນອກຈາກນີ້,ກໍຍັງສົ່ງອອກເປັນສິນຄ້າໄປຕ່າງປະເທດມີທັງໝົດ 1.634 ໂຕ. ໃນນີ້, ມີຄວາຍ 143 ໂຕ, ງົວ 730 ໂຕ, ໝູ 146 ໂຕ, ແບ້ 60 ໂຕ ແລະ ສັດປີກ 555 ໂຕ. ວຽກງານຊົນລະ ປະທານກໍໄດ້ ລົງຊຸກຍູ້ຕິດຕາມກວດກາການຈັດ ຕັ້ງປະຕິບັດວຽກງານຂອງໂຄງ ການກໍ່ສ້າງທີ່ສໍາເລັດ 100% ແລະ ປັບປຸງຫົວງານຈັກສູບນໍ້າບ້ານວາປີ ເມືອງວາປີ ແຂວງສາ ລະວັນ (ໂຄງການໄລຍະທີ 1) ຂອງໂຄງການພັດທະນາພື້ນຖານໂຄງລ່າງກະສິກໍາຕາມແລວເສດຖະກິດຕາເວັນອອກ-ຕາເວັນຕົກທີ່ແຂວງສາລະວັນ. ດ້ານຄວາມຄືບໜ້າການກໍ່ສ້າງໂຄງການຊົນລະປະທານ 4 ໂຄງການ ຄື: ດົງຄວາຍ 1, ດົງຄວາຍ 2, ໝາກຮຽວ, ນາລ້ອງມາຮອດປະຈຸ ບັນປະຕິບັດໄດ້ 97,6%.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์