ນວ ຈັດຕະຫຼາດນັດວາງສະແດງຕົ້ນໄມ້

  ງານຕະຫຼາດນັດວາງສະແດງຕົ້ນໄມ້ ແລະເບ້ຍໄມ້ຈັດຂຶ້ນເປັນປະຈໍາທຸກປີ, ປີນີ້ກໍ່ເຊັ່ນດຽວກັນງານດັ່ງກ່າວຈັດຂຶ້ນທີ່ເດີ່ນພະທາດຫຼວງຊຶ່ງມີຮ້ານວາງສະແດງທັງໝົດ 30 ຮ້ານ, ມີເບ້ຍໄມ້ມາວາງສະແດງ 50 ພັນເບ້ຍ.

  ພິທີເປີດງານວາງສະແດງດັ່ງກ່າວຈັດຂຶ້ນໃນວັນທີ 5 ມິຖຸນາ 2019 ຢູ່ທີ່ເດີ່ນພະທາດຫຼວງ, ຮ່ວມກັນຈັດຂຶ້ນໂດຍກົມປ່າໄມ້, ກະຊວງກະສິກຳ ແລະ ປ່າໄມ້ກັບພະແນກກະສິກຳ ແລະປ່າໄມ້ນວ, ໂດຍການເຂົ້າຮ່ວມຂອງທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ ແລະປ່າໄມ້, ທ່ານ ອາດສະພັງ ທອງ ສີພັນດອນ ຮອງເຈົ້າຄອງນະຄອນຫຼວງວຽງຈັນ, ທ່ານ ຫຼ້າສາຍ ນວນທະສິງ ຫົວໜ້າພະແນກກະສິກໍາ ແລະປ່າໄມ້ ນະຄອນຫຼວງວຽງຈັນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ອາດສະພັງທອງ ສີພັນດອນ ກ່າວວ່າ: ການຈັດງານຕະຫຼາດນັດຂາຍເບ້ຍໄມ້ໃນຄັ້ງນີ້ຈຸດປະສົງກໍ່ເພື່ອສົ່ງເສີມທຸກພາກສ່ວນຜູ້ຜະລິດເບ້ຍໄມ້ທຸກປະເພດໃນການນໍາສິນຄ້າຂອງຕົນມາວາງສະແດງ ແລະແລກປ່ຽນຊື້ຂາຍ, ທັງເປັນການແລກປ່ຽນຂໍ້ມູນດ້ານວິຊາການໃຫ້ແກ່ສັງຄົມ, ໂດຍເຫັນໄດ້ບົດບາດຄວາມສໍາຄັນຂອງປ່າໄມ້ທີ່ມີຕໍ່ຊີວິດຂອງຄົນເຮົາ, ຕໍ່ການປ່ຽນແປງສະພາບດິນຟ້າອາກາດ, ເສດຖະກິດ ແລະການຈັດຕັ້ງປະຕິບັດແນວທາງນະໂຍບາຍຂອງພັກ ແລະລັດຖະບານວາງອອກ.

ທ່ານ ຫຼ້າສາຍ ນວນທະສິງ ໃຫ້ຮູ້ວ່າ: ງານຕະຫຼາດນັດໃນຄັ້ງນີ້ໄດ້ເຊື້ອເຊີນເອົາບັນດາກຸ່ມຜະລິດເບ້ຍໄມ້ລວມທັງພາກລັດເອກະຊົນ ແລະບໍລິສັດນໍາເອົາເບ້ຍໄມ້ມາວາງສະແດງທັງໝົດ 30 ຮ້ານ ໃນນີ້ມີພາກລັດ 4 ຮ້ານ, ເອກະຊົນ 26 ຮ້ານ, ເບ້ຍໄມ້ທີ່ນໍາມາວາງສະແດງທັງໝົດ 50 ພັນເບ້ຍ ໃນນີ້ໄມ້ອຸດສາຫະກຳ 20 ພັນເບ້ຍ, ໄມ້ໃຫ້ໝາກ 15 ພັນເບ້ຍ, ໄມ້ປະດັບ 15 ພັນເບ້ຍງານວາງສະແດງດັ່ງກ່າວຈະດຳເນີນໄປເປັນເວລາ 7 ວັນເຕັມ (ວັນທີ 5-11 ມິຖຸນາ 2019).

ນອກຈາກນີ້ພາຍໃນງານຍັງໄດ້ມອບແນວພັນເຂົ້າທ່າດອກຄໍາລຸ້ນ 3 ຈໍານວນ 47ໂຕນ ມູນຄ່າ 235 ລ້ານກີບ ໃຫ້ແກ່ 5 ຕົວເມືອງໃນນະຄອນຫຼວງວຽງຈັນຄື: ເມືອງປາກງື່ມ, ເມືອງໄຊທານີ, ເມືອງຫາດຊາຍຟອງ, ເມືອງສັງທອງ ແລະ ເມືອງນາຊາຍທອງ ເພື່ອຟື້ນຟູຫຼັງນໍ້າຖ້ວມ,ໃຫ້ກຽດກ່າວມອບໂດຍທ່ານຮອງເຈົ້າຄອງນະຄອນຫຼວງວຽງຈັນ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ 

แชร์