ພູເບ້ຍ ມອບພັນທະໃຫ້ລັດ 7 ຮ້ອຍຕື້ກວ່າກີບ

  ຈາກຜົນປະກອບກິດຈະການ ຂອງບໍລິສັດພູເບ້ຍມາຍນິງໃນປີ 2018 ຜ່ານມາ ໂດຍສະເພາະແມ່ນການຜະລິດ ແຮ່ທີ່ໄດ້ມີການສືບຕໍ່ຂຸດຄົ້ນແຮ່ທາດທອງ-ຄຳ, ບໍລິສັດກໍໄດ້ປະກອບສ່ວນມອບພັນທະໃຫ້ແກ່ລັດຖະບານເປັນຈຳນວນເງິນ 86 ລ້ານໂດລາ ຫຼືປະມານ 7 ຮ້ອຍຕື້ກວ່າກີບ ໂດຍຜ່ານຄ່າສຳປະທານ, ເງິນປັນຜົນທີ່ລັດຖະບານຖືຮຸ້ນຮ່ວມ 10% ລວມທັງອາກອນເງິນເດືອນພະນັກງານ ແລະອາກອນກໍາໄລ,ພ້ອມນັ້ນບໍລິສັດຍັງສາມາດສ້າງວຽກເຮັດງານທໍາໃຫ້ກັບຄົນລາວຫຼາຍກວ່າ 3 ພັນຕຳແໜ່ງ    

   ທ່ານ ຈັນເພັງ ບຸນນະຜົນ ປະທານບໍລິສັດພູເບ້ຍມາຍນິງ ກ່າວໃຫ້ຮູ້ໂອກາດທີ່ທີມສື່ມວນຊົນລາວມາຢ້ຽມຢາມໂຮງງານຜະລິດທອງ-ຄຳ ໃນລະຫວ່າງວັນທີ 4-5 ມິຖຸນາ 2019 ວ່າ: ໂຮງງານຜະລິດທີ່ສຳຄັນຂອງບໍລິສັດພູເບ້ຍມາຍນິງ ແມ່ນໂຮງງານຜະລິດ-ປຸງແຕ່ງທອງ-ຄຳພູຄຳ ແລະ ໂຮງງານຜະລິດປຸງແຕ່ງຄຳ-ເງິນ ບ້ານຫ້ວຍຊາຍ ແຂວງໄຊສົມບູນ ຊຶ່ງໃນປີ 2018 ຜ່ານມາບໍລິສັດໄດ້ທຳການຜະລິດທອງໃນແຮ່ເຂັ້ມຂຸ້ນປະມານ 83,68 ພັນໂຕນ ແລະຜະລິດຄໍາ

70,78 ພັນອອນ, ສ່ວນຢູ່ໂຮງງານຫ້ວຍຊາຍສາມາດຜະລິດ ຄໍາໄດ້ 1,08 ແສນອອນ ແລະເງິນ 6,66 ແສນອອນຈັດຢູ່ໃນຕົວເລກໃກ້ຄຽງກັບການຜະລິດຊ່ວງປີ 2017 ແລະເພື່ອເປັນການປະຕິບັດຕາມກົດໝາຍຂອງລັດຖະບານໂດຍສະເພາະການປະກອບສ່ວນເຂົ້າໃນງົບປະມານຂອງລັດບໍລິສັດພູເບ້ຍມາຍນິງ ໄດ້ມອບພັນທະໃຫ້ກັບລັດຖະບານໃນປີ 2018

 ຜ່ານມາເປັນຈຳນວນເງິນ 86,35 ລ້ານໂດລາສະຫະລັດ ຫຼືປະມານ 731 ຕື້ກີບ ໂດຍຜ່ານຄ່າທໍານຽມດ່ານພາສີ, ອາກອນເງິນເດືອນ, ພາສີຊັບພະຍາກອນແຮ່ທາດ, ສຳປະທານ, ເງິນເປັນຜົນ ແລະ ອາກອນກຳໄລຕ່າງໆເຮັດໃຫ້ນັບແຕ່ປີ 2006 ເຖິງປະຈຸບັນບໍລິສັດພູເບ້ຍມາຍນິງ ໄດ້ປະກອບສ່ວນເປັນຕົວເລກສະສົມປະມານ 716 ລ້ານໂດລາສະຫະລັດໃຫ້ກັບລັດຖະບານ, ພ້ອມນັ້ນຍັງສາມາດສ້າງວຽກເຮັດງານທໍາໃຫ້ແຮງງານທັງໝົດ 3.200 ຄົນ, ໃນນັ້ນແຮງງານຕ່າງປະເທດກວມ ເອົາປະມານ 8%-10% ເທົ່ານັ້ນ.

  ພູເບ້ຍມາຍນິງນອກຈາກຈະທຳການຜະລິດເພື່ອສົ່ງອອກແຮ່ທາດແລ້ວ, ຍັງເນັ້ນໃສ່ວຽກການສ້າງວຽກເຮັດງານທຳໃຫ້ກັບປະຊາຊົນເຂດໃກ້ຄຽງ, ໄປຄຽງຄູ່ກັບການປະກອບສ່ວນໃນການພັດທະນາເສດຖະກິດ-ສັງຄົມຂອງລາວຕົ້ນຕໍແມ່ນການພັດທະນາຊຸມຊົນເຊັ່ນ: ລະບົບການສຶກສາ, ສາທະລະນະສຸກ ແລະສົ່ງ ເສີມປະຊາຊົນບໍລິເວນໃຫ້ຮຽນຮູ້ເລື່ອງການປູກຝັງ-ລ້ຽງສັດຢ່າງຖືກວິທີເພື່ອສະ ໜອງຜົນຜະລິດທີ່ໄດ້ໃຫ້ກັບໂຮງງານ ແລະປ້ອນຕະຫຼາດທົ່ວໄປ, ທັງນີ້ກໍເພື່ອ ເຮັດໃຫ້ຊີວິດການເປັນຢູ່ຂອງເຂົາເຈົ້ານັບມື້ດີຂຶ້ນເທື່ອລະກ້າວ,ສຳລັບການປະກອບສ່ວນຂອງເຂົ້າໃນການພັດທະນາ ແລະຊ່ວຍເຫຼືອສັງຄົມຂອງບໍລິສັດນັບແຕ່ເລີ່ມຕົ້ນມາເຖິງປະຈຸບັນມີແລ້ວຫຼາຍກວ່າ 1,45 ລ້ານໂດລາສະຫະລັດ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ 

แชร์