ສກຈຮ ຈຳປາສັກເຕີບໃຫຍ່ໄປຄຽງຄູ່ຄຸນນະພາບບໍລິການ

  ຕະຫຼອດໄລຍະເວລາເກືອບ 4 ປີ ຫຼັງຈາກທີ່ໄດ້ຮັບອະນຸຍາດສ້າງຕັ້ງຢ່າງເປັນທາງການຈາກທະນາຄານແຫ່ງ ສປປ ລາວ ໃນຕົ້ນເດືອນມີນາ 2015 ສະຖາ ບັນການເງິນຈຸລະພາກທີ່ຮັບເງິນຝາກຈໍາປາສັກ ຈໍາກັດ ກໍ່ໄດ້ເລີ່ມໃຫ້ບໍລິການຢ່າງເປັນການໃນສັງຄົມ ແລະໄດ້ເອົາໃຈໃສ່ປະຕິບັດພາລະກິດຂອງຕົນຢ່າງຕັ້ງໜ້າໃນການຂະຫຍາຍການບໍລິການໄປສູ່ປະຊາຊົນທຸກຊຸມຊົນ, ທຸກພາກສ່ວນທີ່ມີລາຍໄດ້ໜ້ອຍໃຫ້ສາມາດເຂົ້າເຖິງການບໍລິການການເງິນຈຸລະພາກທີ່ເໝາະ ສົມກັບຄວາມສາມາດ ແລະຄວາມຕ້ອງການຂອງເຂົາເຈົ້າໂດຍຮັບປະກັນການບໍລິການທີ່ວ່ອງໄວ, ໂປ່ງໃສ ແລະເປັນທໍາ.

  ທ່ານ ໜູເຄືອບ ສິດທິເດດ ຜູ້ອໍານວຍການໃຫຍ່ສະຖາບັນການເງິນຈຸລະພາກທີ່ຮັບເງິນຝາກ ຈໍາປາສັກ ຈໍາກັດ (ສກຈຮ) ໄດ້ລາຍງານໃຫ້ຮູ້ເມື່ອບໍ່ດົນມານີ້ວ່າ: ຕະຫຼອດໄລຍະການດໍາເນີນ ທຸລະກິດໃນ 4 ປີຜ່ານມາ, ສກຈຮ ຈໍາ ປາສັກໄດ້ມີການສ້າງລາຍຮັບ ແລະມີກໍາໄລເປັນກ້າວໆມາຈົນມາເຖິງທ້າຍປີ 2018 ສກຈຮ ໄດ້ມີກໍາໄລ 5 ຕື້ກວ່າກີບ  ແລະໄດ້ແຈ້ງເສຍອາກອນກໍາໄລຈໍານວນ  1,2 ຕື້ກີບ, ໃນທ້າຍເດືອນເມສາ 2019 ຜ່ານມາ, ນອກຈາກນັ້ນຕະຫຼອດປີ 2018 ຜ່ານມາພະນັກງານ ສກຈຮ ຈໍາປາສັກ ໄດ້ມີການແຈ້ງເສຍອາກອນລາຍໄດ້ຂອງ ພະນັກງານ ລວມໃນ 4 ແຂວງພາກໃຕ້ ຈໍານວນ 398 ລ້ານກວ່າກີບ, ຊຶ່ງເປັນ ພັນທະຂອງຜູ້ອອກແຮງງານທຸກຄົນ ຕ້ອງໄດ້ຊໍາລະໃຫ້ຖືກຕ້ອງຕາມກົດໝາຍ ລວມທັງອາກອນກໍາໄລ ແລະອາກອນ ເງິນເດືອນທີ່ມອບແມ່ນຈໍານວນ  1,6 ຕື້ກີບ.

 ສໍາລັບໃນຕໍ່ໜ້າ ສກຈຮ ຈໍາປາສັກ ມີແຜນຂະຫຍາຍການບໍລິການໃຫ້ກວ້າງຂວາງຂຶ້ນກວ່າເກົ່າເພື່ອແນໃສ່ການບໍລິການລູກຄ້າຢ່າງທົ່ວເຖິງໃນທຸກຂົງ ເຂດ, ແນໃສ່ຂໍສ້າງຕັ້ງໜ່ວຍບໍລິການເພີ່ມຢູ່ແຂວງເຊກອງ,ສ່ວນລາຍຮັບ ສກຈຮ ຈໍາປາສັກ ໄດ້ການຄາດຄະເນລາຍຮັບໝົດປີ 2019 ຈະເພີ່ມຂຶ້ນຈາກປີ 2018 ໃນອັດຕາສ່ວນກວ່າ 8%, ນອກຈາກນີ້ຍັງໄດ້ມີການຄາດຄະເນແຜນໃນ ການມອບພັນທະອາກອນໃຫ້ແກ່ລັດຈໍາ ນວນ  1,7 ຕື້ກີບ, ຊຶ່ງແຍກເປັນອາກອນ ກໍາໄລ 1,3 ຕື້ກີບ ແລະອາກອນເງິນເດືອນ 409 ລ້ານກວ່າກີບ.

ພາບ ແລະຂ່າວ: ໜັງສືພິມເສດຖະກິດ-ສັງຄົມ

แชร์