ອັດຕະປືສຸມໃສ່ປູກໄມ້ໃກ້ຈະສູນພັນ

 ວັນ 1 ມິຖຸນາ ແມ່ນວັນທີ່ທົ່ວໂລກສະເຫຼີມສະຫຼອງຊຶ່ງຄຽງຄູ່ກັບການຈັດຕັ້ງຂະບວນການດັ່ງກ່າວກໍ່ຍັງແມ່ນວັນປູກຕົ້ນໄມ້ແຫ່ງຊາດລາວໂດຍໃນແຕ່ລະປີແມ່ນດຳເນີນໄປດ້ວຍຄວາມເປັນຂະບວນຟົດຟື້ນເພື່ອເພີ່ມທັດສະນິຍະພາບແລະສະພາບແວດລ້ອມໃຫ້ຂຽວສົດງົດງາມຊຶ່ງປີ 2019 ນີ້ ແຂວງອັດຕະປືເຫັນໄດ້ວ່າ: ມີຄະນະນໍາຂັ້ນແຂວງ, ເມືອງ, ບັນດາພະນັກງານ, ຄູ-ອາຈານ, ນັກສຶກສາ ແລະອະນຸຊົນທັງຫຼາຍຕ່າງໆກໍ່ມີຄວາມສຳຄັນມຸ່ງໝັ້ນຈັດກິດຈະກຳໃນວັນ ເດັກນ້ອຍສາກົນ ແລະວັນປູກຕົ້ນໄມ້ແຫ່ງຊາດຢ່າງເປັນຂະບວນກວ້າງຂວາງ.

  ດັ່ງນັ້ນ, ເນື່ອງໃນໂອກາດວັນທີ 1 ມິຖຸນາ 2019 ທ່ານ ເລັດ ໄຊຍະພອນ ເຈົ້າແຂວງອັດຕະປື ໄດ້ໃຫ້ກຽດນຳພາຂະບວນການປູກຕົ້ນໄມ້ຮ່ວມນຳນ້ອງອະນຸຊົນຢູ່ທີ່ເມືອງພູວົງ ຊຶ່ງລວມມີບັນດາການນຳຂັ້ນແຂວງ, ເມືອງ, ພະນັກງານ-ລັດຖະກອນ ແລະນ້ອງອະນຸຊົນເຂົ້າຮ່ວມຢ່າງຫຼວງຫຼາຍ.

   ທ່ານ ບຸນນາວ ຈັນດອນ ເຈົ້າເມືອງພູວົງໄດ້ສະແດງທັດສະນະເນື່ອງໃນວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດປີ 2019 ນີ້ວ່າ: ຖືເປັນອີກວັນໜຶ່ງທີ່ມີຄວາມໝາຍຄວາມສຳຄັນທີ່ບົ່ງບອກໃຫ້ເຫັນເຖິງຄວາມຫ່ວງໃຍນຳລູກຫຼານທີ່ເປັນອະນາຄົດຂອງຊາດ ແລະອີກອັນໜຶ່ງກໍເພື່ອໃຫ້ເດັກນ້ອຍເຍົາວະ ຊົນໄດ້ເບີກບານມ່ວນຊື່ນ, ແນໃສ່ປູກຈິດສຳນຶກອະນຸຊົນ ແລະ ຄົນຮຸ້ນໃໝ່ເຂົ້າໃຈເຖິງຊັບພະຍາກອນທໍາມະຊາດ, ປ່າໄມ້, ຊີວະ ນາໆພັນ, ສັດນໍ້າ-ສັດປ່າມີຄວາມອຸດົມສົມບູນ, ມີການຄຸ້ມຄອງຢ່າງ ເປັນລະບົບ, ທັງເປັນການປູກຈິດສໍານຶກໃຫ້ທົ່ວປວງຊົນມີນໍ້າໃຈຮັກຊາດ, ຮັກຫອມຊັບພະຍາກອນອັນເປັນມໍລະ ດົກຂອງຊາດໃຫ້ນັບມື້ນັບອຸດົມສົມບູນຂຶ້ນຢ່າງບໍ່ຢຸດຢັ້ງ.

  ສຳລັບຢູ່ເມືອງພູວົງແມ່ນຈັດຂຶ້ນຢູ່ບ້ານວົງສົມພູມີເນື້ອທີ່ 5 ເຮັກຕາ ເບ້ຍໄມ້ທີ່ນໍາໄປປູກນັ້ນແມ່ນເລັ່ງໃສ່ເບ້ຍໄມ້ກະຍູງເປັນສ່ວນໃຫຍ່ມີທັງໝົດ 2.000 ກວ່າເບ້ຍ, ແນວໃດກໍ່ດີອີງຕາມການຢັ້ງຢືນຈາກຫົວໜ້າພະແນກກະສິກຳ-ປ່າໄມ້ ໃນປີ 2019 ນີ້ ທົ່ວແຂວງອັດຕະປື ໄດ້ສຸມໃສ່ປູກເບ້ຍໄມ້ທີ່ໃກ້ຈະສູນພັນ, ໄມ້ອຸດສາຫະກໍາ ແລະໄມ້ປະດັບຊະນິດຕ່າງໆລວມມີຈຳນວນສູງເຖິງ 325,000 ເບ້ຍໃນນີ້ ແຂວງອັດຕະປືຈະປູກໄມ້ທຳມະຊາດທີ່ໃກ້ຈະສູນພັນໃຫ້ໄດ້ໃນເນື້ອທີ່ 800 ເຮັກຕາ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์