ສຶກສາອຸດົມໄຊ ລົງກວດສອບ ການນຳໃຊ້ເງິນໃນໂຮງຮຽນ

 ວັນທີ30 ພຶດສະພາຜ່ານມາຂະແໜງການເງິນພະແນກສຶກສາທິການ ແລະກີລາແຂວງອຸດົມໄຊລົງກວດສອບການນຳໃຊ້ເງິນໃນໂຮງຮຽນຢູ່ເມືອງຮຸນຊຶ່ງເຂົ້າຮ່ວມມີທ່ານ ສົມດີ ສີລາທອດຫົວໜ້າພະແນກສຶກສາທິການແລະກີລາ ແຂວງ, ທ່ານ ບຸນເພັງສີເທບພະບຸດຫົວໜ້າຫ້ອງການສຶກສາທິການ ແລະກີລາເມືອງຮຸນ, ທ່ານ ບຸນເພັງ ແລງສຸດທິພົງຫົວໜ້າຂະແໜງການເງິນພະແນກສຶກສາທິການ ແລະກີລາພ້ອມດ້ວຍວິຊາການຂະແໜງ ການເງິນ, ຂະແໜງບໍລິຫານ, ຂະແໜງສາມັນ ແລະວິຊາການຂັ້ນເມືອງທີ່ກ່ຽວຂ້ອງເຂົ້າຮ່ວມ.

ສຳລັບເມືອງຮຸນໄດ້ເລືອກເອົາໂຮງຮຽນເປົ້າໝາຍຢູ່ 4 ໂຮງຮຽນປະກອບມີໂຮງຮຽນປະຖົມ, ມັດທະຍົມຕອນຕົ້ນວັງລຳ,ໂຮງຮຽນປະ ຖົມສີບຸນເຮືອງ ແລະໂຮງຮຽນມັດທະຍົມຕອນປາຍດອນເມືອງ, ການລົງໄປເຮັດວຽກຢູ່ເມືອງຄັ້ງນີ້ແມ່ນໄດ້ຕິດຕາມ, ກວດສອບ,ຊຸກຍູ້ວຽກງານການເງິນທີ່ນຳໃຊ້ໃນສະຖານການສຶກສາ, ແນະນຳແບບຟອມການເງິນ, ການນຳໃຊ້ເງິນໃນໂຮງຮຽນໃຫ້ຖືກຕ້ອງເພື່ອຄວາມໂປ່ງໃສສາມາດກວດກາໄດ້ພ້ອມທັງໄດ້ຊຸກຍູ້ກຳລັງໃຈການປະຕິບັດໜ້າທີວຽກ ງານຂອງຄູ-ອາຈານແລະນັກຮຽນຢູ່ເຂດຫ່າງໄກສອກຫຼີກ, ໃນກອງປະຊຸມໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານຂອງໂຮງຮຽນ ໂດຍຫຍໍ້ຈາກຜູ້ອຳ ນວຍການໂຮງຮຽນແຕ່ລະແຫ່ງ ແລະໄດ້ປະກອບຄຳຄິດຄຳເຫັນແລກປ່ຽນບົດຮຽນ,ສະພາບລວມ ແລະຮັບຟັງຄຳສະເໜີຕ່າງໆຂອງຊຸມຊົນ.

ໃນໂອກາດນີ້ທ່ານ ສົມດີສີລາທອດໄດ້ໂອ້ລົມພະນັກງານຄູ-ອາຈານ ໂດຍໄດ້ເນັ້ນໃຫ້ຄູ-ອາຈານສືບຕໍ່ເອົາໃຈໃສ່ປະຕິບັດໜ້າທີ່ວຽກງານຂອງຕົນໃຫ້ມີຄຸນນະພາບຮັບປະກັນຕາມ 3 ລັກສະນະ ແລະ5 ຫຼັກມູນຂອງການສຶກສາພ້ອມກັນຕ້ານປາກົດການຫຍໍ້ທໍ້ຕ່າງໆທີ່ຈະເກີດຂຶ້ນໃນສະຖານການສຶກສາ ແລະສັງຄົມພ້ອມທັງໄດ້ຊຸກຍູ້ກຳລັງໃຈຄູ-ອາຈານໃຫ້ພ້ອມກັນເຮັດໜ້າທີ່ຂອງຕົນ, ສຶກສາອົບຮົມລູກຫຼານນັກຮຽນໃຫ້ເປັນຄົນດີ, ຮຽນເກັ່ງເປັນຜູ້ສືບທອດທີ່ດີຂອງສັງຄົມ ແລະປົກປັກຮັກສາອາຄານສະຖານທີ່ໃນໄລຍະພັກຮຽນໃຫ້ດີບໍ່ໃຫ້ກຸ່ມຄົນບໍ່ດີສວຍໂອກາດມາງັດແງະລັກເອົາເຄື່ອງຂອງເຮັດໃຫ້ເປ່ເພເສຍຫາຍໄດ້.

ພາບ ແລະຂາ່ວໂດຍ:ໜັງສືພິມເສດຖະກິດ-ສັງຄົມ

 

แชร์