ຄຳສັ່ງ 02/ນຍ ຊ່ວຍລັດເວລາສ້າງທຸລະກິດໃໝ່ສັ້ນເຂົ້າເຖິງ 5,7 ເທົ່າ

 ການເລີ່ມຕົ້ນທຸລະກິດຢູ່ລາວຜ່ານມາພົບວ່າມີຄວາມຫຍຸ້ງຍາກ ແລະ ສະຫຼັບຊັບຊ້ອນຫຼາຍໂດຍສະເພາະຂອດຂັ້ນ ແລະໄລຍະເວລາໃນການກະກຽມເອກະສານ ຈົນຖືກຈັດໃຫ້ເປັນອັນດັບທີ 180 ເກືອບເປັນປະເທດສຸດທ້າຍເລີຍກໍວ່າໄດ້, ຕົກມາໃນປີ 2018 ລັດຖະບານຈຶ່ງໄດ້ອອກຄຳສັ່ງ 02/ນຍ ເພື່ອປັບປຸງຕົວຊີ້ວັດການເລີ່ມຕົ້ນທຸລະກິດຈາກທີ່ເຄີຍຕິດອັນດັບເກືອບທ້າຍສຸດສາມາດປັບໄລຍະເວລາລົງໄດ້ເຖິງ 5,7 ເທົ່າຂອງເມື່ອກອນ ແລະຂອດຂັ້ນຈາກ 10 ຫຼຸດລົງ ເຫຼືອ 4 ຂັ້ນ.

 ຂໍ້ມູນຈາກກົມທະບຽນ ແລະຄຸ້ມຄອງວິສາຫະກິດກະຊວງອຸດສາຫະກຳ ແລະ ການຄ້າໃຫ້ຮູ້ວ່າ: ກ່ອນຄຳສັ່ງ 02/ນຍ, ສະພາບການເລີ່ມຕົ້ນທຸລະກິດຂອງປະ ເທດເຮົາແມ່ນມີຄວາມສະຫຼັບຊັບຊ້ອນຫຼາຍຂັ້ນຫຼາຍຂອດສິ້ນເປືອງ ແລະມີ ຄວາມສ່ຽງໃນການປະກອບທຸລະກິດສູງ, ໂດຍສະເພາະຂັ້ນຕອນການເລີ່ມຕົ້ນທຸ ລະກິດເມື່ອກ່ອນມີ 10 ຂັ້ນຕອນໃຫ້ອັນດັບຄວາມສະດວກໃນການເລີ່ມຕົ້ນທຸລະກິດຂອງປະເທດເຮົາຕົກເປັນອັນດັບ 180 ໃນ 190 ປະເທດ ແລະ ເປັນອັນດັບເກືອບທ້າຍສຸດໃນກຸ່ມປະເທດອາຊຽນ.

ພາຍຫຼັງປະກາດໃຊ້ຄຳສັ່ງເລກທີ 02/ນຍ ໃນວັນທີ 1 ກຸມພາ 2018 ຈົນມາເຖິງເດືອນມີນາ 2019 ນີ້, ກະຊວງອຸດສາຫະກຳ ແລະການຄ້າໄດ້ປະສານງານກັບບັນດາຂະແໜງການກ່ຽວຂ້ອງໃນວຽກງານປັບປຸງຕົວຊີ້ວັດ “ການເລີ່ມຕົ້ນທຸລະກິດ” ແລະໄດ້ສົມທຸກຄວາມພະຍາຍາມຈັດຕັ້ງຜັນຂະຫຍາຍເນື້ອໃນຈິດ ໃຈຂອງຄໍາສັ່ງດັ່ງກ່າວໃຫ້ກາຍເປັນນິຕິກຳ ແລະການຈັດຕັ້ງປະຕິບັດລະອຽດອັນໄດ້ສ້າງບາດກ້າວບຸກທະລຸທີ່ເປັນຮູບປະທຳໃນການຫຼຸດຂັ້ນຂອດເວລາ ແລະ ຕົ້ນທຶນໃນການປະກອບທຸລະກິດຂອງຜູ້ລົງທຶນຫຼືປະຊາຊົນບັນດາເຜົ່າໂດຍເຫັນຈາກການຫຼຸດຂັ້ນຂອດຈາກ 10 ຂອດເຫຼືອ 4 ຂອດຄື: ຂຶ້ນທະບຽນວິສາຫະ ກິດ, ຄວັດຕາປະທັບ, ຈົດທະບຽນປະກັນສັງຄົມ ແລະອັນສຸດທ້າຍແມ່ນຈົດທະບຽນອາກອນມູນຄ່າເພີ່ມ,ພ້ອມນັ້ນຍັງໄດ້ຫຼຸດເວລາການເລີ່ມຕົ້ນທຸລະກິດຈາກສູງສຸດ 228 ວັນ ຫຼື ສະເລ່ຍ 174 ວັນ ລົງເຫຼືອປະມານບໍ່ເກີນ 40 ວັນ ຫຼື 5,7 ເທົ່າທຽບກັບໄລຍະກ່ອນປະກາດໃຊ້ 02/ນຍ, ຊຶ່ງຈາກຜົນສຳເລັດດັ່ງກ່າວ ເຮັດໃຫ້ການຂຶ້ນທະບຽນວິສາຫະກິດເປັນລະບົບ, ທັນສະໄໝ, ມີຄວາມເປັນສາກົນຂຶ້ນເທື່ອລະກ້າວ, ສະດວກງ່າຍດາຍສຳລັບປະຊາຊົນບັນດາເຜົ່າໃນການເຂົ້າ ເຖິງຕາໜ່າງການບໍລິການໃກ້ກັບພູມລຳເນົາຂອງຕົ້ນເອງ ແລະມາຮອດປະຈຸບັນສາມາດຂຶ້ນທະບຽນວິສາຫະກິດໂດຍມີຕົວເລກປະຈຳຕົວຜູ້ເສຍອາກອນພ້ອ ມ 5.376 ຫົວໜ່ວຍ, ໃນນີ້ກົມທະບຽນ 911 ຫົວໜ່ວຍ, ພະແນກອຸດສາຫະກຳ ແລະການຄ້າ 1.743 ຫົວໜ່ວຍ ແລະຫ້ອງການອຸດສາຫະກຳ ແລະການຄ້າຂັ້ນເມືອງ 2.722 ຫົວໜ່ວຍ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์