ທຫລ ສຳເລັດຍົກລະດັບຂ່າວສານສູ່ຄຸນນະພາບໃໝ່

 ທະນາຄານແຫ່ງ ສປປ ລາວ ໄດ້ສຳເລັດການສຳມະນາວຽກງານຂ່າວສານໃນວັນທີ 31 ພຶດສະພາ ທັງດຳເນີນ ມາເປັນເວລາ 4 ວັນ ທີ່ສະຖາບັນການທະນາ ຄານນະຄອນຫຼວງວຽງຈັນໂດຍການໃຫ້ກຽດເຂົ້າຮ່ວມຂອງທ່ານ ສາຍສະໝອນ ກີບເກສອນ ຮອງຫົວໜ້າຫ້ອງການທະນາຄານແຫ່ງ ສປປ ລາວ ທັງເປັນຜູ້ຊີ້ນຳໜ່ວຍງານຂ່າວສານທະນາຄານແຫ່ງ ສປປ ລາວ ຊຶ່ງມີວິທະຍາກອນຈາກຄະນະໂຄສະນາອົບຮົມສູນກາງພັກ, ຈາກກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ; ພ້ອມນີ້ຍັງມີສຳມະກອນທີ່ມາຈາກບັນດາກົມ-ທຽບເທົ່າກົມ ແລະ 5 ສາຂາ ທຫລ ເຂົ້າຮ່ວມ.

  ການສຳມະນາໃນຄັ້ງນີ້; ໄດ້ນຳສະເໜີຄວາມຮູ້ພື້ນຖານກ່ຽວກັບການຂຽນຂ່າວແລະບົດທີ່ຮັບໃຊ້ວຽກງານໂຄສະນາຜ່ານສື່ມວນຊົນໂດຍສະເພາະການຂຽນ ໜັງສື, ຂຽນຂ່າວ ຫຼື ຂຽນບົດຕ່າງໆທີ່ເປັນວຽກທີ່ຕ້ອງອາໄສຄວາມຮູ້, ຄວາມຄິດ ແລະ ຄວາມຮັກໃນການຂຽນຊຶ່ງມັນບໍ່ແມ່ນເລື່ອງງ່າຍທີ່ທຸກຄົນຈະເຮັດໄດ້;ກ່ອນຈະຂຽນຜູ້ຂຽນຈະຕ້ອງຮູ້ລຳດັບຄວາມຄິດຂອງຕົນໃຫ້ຜູ້ອື່ນຮັບຮູ້ເລື່ອງລາວ ແລະເຂົ້າໃຈໃນສິ່ງທີ່ຕົນຄິດສາມາດໃຊ້ພາສາທີ່ງົດງາມ ແລະຖືກຕ້ອງຕາມ ຫຼັກໄວຍະກອນ ແລະຕ້ອງໃສ່ໃຈສະເໝີວ່າ: “…ກ່ອນຈະຂຽນເຮົາເປັນນາຍໂຕ ໜັງສືແຕ່ເມື່ອຂຽນແລ້ວໜັງສືເປັນນາຍ ເຮົາ…”; ພ້ອມນັ້ນ, ຍັງນຳສະເໜີເຖິງຂັ້ນຕອນ, ວິທີໃນການຂຽນຂ່າວໂດຍສະເພາະບັນດາຫຼັກການພື້ນຖານຂອງຂ່າວລວມມີລັກສະນະພັກ, ລັກສະນະຄວາມຈິງ, ລັກສະນະມະຫາຊົນ, ລັກສະນະວ່ອງໄວທັນການ ແລະລັກສະນະສັ້ນກະທັດຮັດ ແລະຈະແຈ້ງ, ນັກຂ່າວຕ້ອງມີຈັນຍາບັນ-ຈັນຍາທຳຂອງສື່ມວນຊົນ.

  ນອກນີ້; ຍັງໄດ້ຮັບຮູ້ ແລະ ເຂົ້າໃຈກ່ຽວກັບສື່ອອນລາຍໃນຍຸກປະຈຸບັນຊຶ່ງມີທາງດ້ານຕັ້ງໜ້າ ແລະ ຫຍໍ້ທໍ້ໂດຍສະເພາະແມ່ນການຕອບໂຕ້ຂ່າວທີ່ບິດເບືອນ  ແລະຂ່າວທີ່ບໍ່ມີມູນຄວາມຈິງຊຶ່ງໃນຜ່ານມາຍັງມີຄົນບໍ່ດີຈຳນວນໜຶ່ງໄດ້ນຳໃຊ້ສື່ອອນລາຍໄປໃນທາງທີ່ບໍ່ຖືກຕ້ອງ, ມີການໂຄ່ນລົ້ມໂຈມຕີ, ໃສ່ຮ້າຍປ້າຍສີຄົນອື່ນ ແລະອົງການຕ່າງໆ; ດັ່ງນັ້ນ, ມັນຈຶ່ງມີຄວາມຈຳເປັນທີ່ຕ້ອງໄດ້ຮຽນຮູ້ກຳແໜ້ນ ແລະພ້ອມທັງຊອກຫາວິທີຕອບຕ້ານຢ່າງທັນການ; ໃນຂະນະດຽວກັນນັ້ນ, ບັນດາສຳມະນາກອນຍັງໄດ້ຮຽນການປະຕິບັດໜ້າທີ່ເປັນໂຄສົກໃນລາຍການວິທະຍຸ; ຮັບຮູ້ພາລະບົດບາດ ແລະໜ້າທີ່ຂອງວິທະຍຸ ແລະ ວຽກອື່ນໆທີ່ຕິດພັນກັບການເປັນນັກຂ່າວແລະຜູ້ດຳເນີນລາຍການວິທະຍຸແນໃສ່ເພືອເພີ່ມທັກສະໃນວຽກງານຂອງສື່ມວນຊົນ.

 ໃນໂອກາດດັ່ງກ່າວ; ທ່ານຮອງຫົວໜ້າຫ້ອງການທະນາຄານແຫ່ງ ສປປ ລາວ ໄດ້ຕາງໜ້າໃຫ້ຄະນະນຳທະນາຄານແຫ່ງສປປລາວໄດ້ມອບໃບຢັ້ງຢືນໃຫ້ບັນດາສຳມະນາກອນທີ່ເຂົ້າຮ່ວມພ້ອມທັງຮຽກຮ້ອງໃຫ້ທຸກຄົນຈົ່ງເອົາ ໃຈໃສ່ເປັນເຈົ້າການຕິດຕາມ ແລະຂຽນ ບົດ-ຂ່າວກ່ຽວກັບວຽກງານ ແລະການເຄື່ອນໄຫວຂອງກົມກອງຕົນກາຍເປັນເຄື່ອງມືອັນແຫຼມຄົມແກ່ຄະນະພັກ-ຄະນະຜູ້ວ່າການທະນາຄານແຫ່ງ ສປປ ລາວ ແລະໃຫ້ອົງການສື່ມວນຊົນໂດຍສະເພາະບັນດາໜັງສືພິມ, ວິທະຍຸ, ໂທລະພາບຂອງສູນກາງແລະທ້ອງຖິ່ນແນໃສ່ເຮັດໃຫ້ສັງຄົມແລະປະຊາຊົນຮັບຮູ້ເຂົ້າໃຈ ແລະຕີຖອຍບັນດາຂ່າວຂອງພວກຄົນທີ່ບໍ່ຫວັງດີທີ່ໂຄສະນາໃສ່ຮ້າຍປ້າຍສີ, ບິດເບືອນ, ແນວທາງນະໂຍບາຍຂອງພັກ ແລະລັດຖະບານກໍ່ຄືຂະແໜງການທະນາຄານໃຫ້ໄດ້ຢ່າງທັນການ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์