ສສນວ ຮັບຮອງ ທ່ານ ນາງ ໄຊພອນ ນັນທະພອນ ຂຶ້ນເປັນຫົວໜ້າພະແນກສາທາລະນະສຸກ

  ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນນະຄອນຫຼວງວຽງຈັນຊຸດທີ I ໃນ ຄັ້ງວັນທີ 27 ທັນວາ 2018, ສະມາຊິກສະພາປະຊາຊົນນະຄອນຫຼວງວຽງຈັນ (ສສນວ) ໄດ້ຮັບຟັງການຈັດຕັ້ງປະຕິບັດແຜນການເຄື່ອນໄຫວວຽກງານປະຈຳປີ 2018 ແລະທິດທາງແຜນ ການປະຈຳປີ 2019 ຂອງໄອຍະການປະຊາຊົນ ນວ, ບົດລາຍງານການເຄື່ອນໄຫວປະຈຳປີ 2018 ແລະ ແຜນການປີ 2019 ຂອງສານປະ ຊາຊົນ ນວ, ນອກນັ້ນ ກອງປະຊຸມຍັງໄດ້ປະກອບຄຳເຫັນ ແລະລົງຄະແນນສຽງຮັບຮອງເອົາການແຕ່ງຕັ້ງບຸກຄະລາກອນຂອງອົງການປົກ ຄອງ ນະຄອນຫຼວງວຽງຈັນ ໂດຍເຫັນດີຮັບຮອງເອົາ ທ່ານ ນາງ ໄຊພອນ ນັນທະພອນ ຮອງຫົວໜ້າພະແນກສາທາລະນະສຸກນະຄອນຫຼວງວຽງຈັນ ຂຶ້ນເປັນຫົວໜ້າພະແນກສາທາລະນະສຸກແທນ ທ່ານ ພອນປະເສີດ ອຸນາພົມ.

   ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫວງວຽງຈັນ ໄດ້ຜ່ານໜັງສືສະເໜີຂອງທ່ານເຈົ້າຄອງນະຄອນຫຼວງວຽງຈັນ ກ່ຽວກັບການແຕ່ງຕັ້ງບຸກຄະລາກອນຂອງອົງການປົກຄອງນະຄອນຫຼວງວຽງຈັນວ່າ: 1). ສະເໜີຍົກຍ້າຍ ທ່ານ ພອນປະເສີດ ອຸນາພົມ ຫົວໜ້າພະ ແນກສາທາລະນະສຸກນະຄອນຫຼວງວຽງຈັນໄປຮັບໜ້າທີ່ໃໝ່ຢູ່ກະຊວງສາທາລະນະສຸກຕາມການສະເໜີຂອງກະຊວງສາທາລະນະສຸກ; 2). ທ່ານ ນາງ ໄຊພອນ ນັນທະພອນ ຮອງຫົວໜ້າພະແນກສາທາລະນະສຸກນະຄອນຫຼວງວຽງຈັນຂຶ້ນເປັນຫົວໜ້າພະແນກສາທາລະນະສຸກຜູ້ໃໝ່. ຜ່ານການປະກອບຄຳເຫັນຂອງບັນດາສະມາຊິກສະພາປະຊາຊົນນະຄອນຫຼວງວຽງຈັນແມ່ນເຫັນດີເປັນເອກະພາບຕາມໜັງສືສະເໜີຂອງເຈົ້າຄອງນະຄອນຫຼວງວຽງຈັນໂດຍທ່ານ ນາງ ໄຊພອນ ນັນທະພອນ ແມ່ນມີເງື່ອນໄຂ, ມາດຕະຖານຄົບຖ້ວນ ແລະເໝາະສົມທີ່ຈະເປັນຫົວໜ້າພະແນກສາທາ ນວ ຊຶ່ງບັນດາສະມາຊິກສະພາປະຊາຊົນນະຄອນຫຼວງວຽງຈັນເຫັນດີຮັບຮອງເອົາທ່ານ ນາງ ໄຊພອນ ນັນທະ ພອນຮອງຫົວໜ້າພະແນກສາທາລະນະສຸກນະຄອນຫຼວງວຽງຈັນ ຂຶ້ນເປັນຫົວໜ້າພະແນກສາທາລະນະສຸກ ນວ ຜູ້ໃໝ່ດ້ວຍຄະແນນ ສຽງ 100%.

  ສຳລັບການຈັດຕັ້ງເຄື່ອນໄຫວວຽກງານຂອງໄອຍະການປະ ຊາຊົນປີ 2018 ໄດ້ອອກຄຳສັ່ງ ກັກຂັງພາງ 2.410 ສະບັບ, ອອກຄຳສັ່ງຕໍ່ການກັກຂັງພາງ 939 ສະບັບ, ຄຳສັ່ງຈັບຕົວ 377 ສະບັບ, ຄຳແນະນຳ 441 ສະບັບ, ຄຳສັ່ງກວດຄົ້ນເຄຫາສະຖານ 233 ສະບັບ, ຄຳສັ່ງປ່ອຍ ຕົວພາງ 131 ສະບັບ, ຄຳສັ່ງກຳນົດເວລາ ສືບສວນ-ສອບສວນ 643 ສະບັບ, ໄດ້ຮັບສຳນວນຄະດີອາຍາ 3.476 ເລື່ອງ, ແກ້ໄຂໄດ້ 3.188 ເລື່ອງ, ຄະດີອາຍາອຸທອນ 25 ເລື່ອງ, ໄດ້ຖະແຫຼງລົງສານແລ້ວ 24 ເລື່ອງ, ຍັງພິຈາລະນາ 1 ເລື່ອງເທົ່າກັບ 96 %.

  ສ່ວນວຽກງານສານປະຊາຊົນ ນວ ໃນປີ 2018 ມີຄະດີເກີດຂຶ້ນ 3.035 ເລື່ອງ, ແກ້ໄຂໄດ້ 2.160 ເລື່ອງ, ຄະດີອາຍາພົ້ນເດັ່ນແມ່ນຄ້າ ຂາຍຢາເສບຕິດ, ລະເມີດກົດຈາລະຈອນ, ລັກຊັບ ແລະ ສໍ້ໂກງຊັບພົນລະເມືອງຄະດີແພ່ງທີ່ພົ້ນເດັ່ນແມ່ນສັນຍາກູ້ຢືມຂໍ້ຂັດແຍ່ງມູນມໍລະ ດົກຂັດແຍ່ງກຳມະສິດທີ່ດິນ.

แชร์