ຄຳໄພ ສົມຊະນະ ເປີດເຜີຍເຄັດລັບສູດສຳເລັດການດຳເນີນທຸລະກິດຕໍ່ຊາວໜຸ່ມ

  ການຈະທຳສິ່ງໃດກໍແລ້ວແຕ່ເຖິງຕົ້ນທຶນຊີວິດ ແລະລະດັບການສຶກສາຈະບໍ່ສູງຖ້າມີຄວາມຈິງໃຈເຮັດແທ້ທຳຈິງ, ດຸໝັ່ນອົດທົນ, ມີເປົ້າໝາຍຂອງຊີວິດທີ່ຊັດເຈນທີ່ສຳຄັນຄືມີຄວາມຊື່ສັດບໍລິສຸດໂດຍສະເພາະຕໍ່ຄອບຄົວບຸກຄົນນັ້ນຍ່ອມປະສົບກັບຄວາມສຳເລັດໄດ້ຢ່າງແນ່ນອນເໝືອນດັ່ງທ່ານ ຄຳໄພ ສົມຊະນະ ທີ່ເພີ່ນຍຶດໝັ້ນໃນເຄັບລັບເຫຼົ່ານີ້ເປັນສູດໃນການດຳເນີນຊີວິດ ແລະທຸລະກິດຈົນປະສົບຜົນສຳເລັດ ແລະໄດ້ຮັບສາຍຍາວ່ານັກທຸລະກິດແຖວໜ້າຂອງເມືອງລາວທີ່ຮຽນຈົບພຽງຊັ້້ນປ4.

 ເມື່ອບໍ່ດົນຜ່ານມານີ້ທ່ານ ຄຳໄພ ສົມຊະນະ ປະທານກຸ່ມບໍລິສັດຄຳໄພຊະນະຈຳກັດຜູ້ດຽວ ໄດ້ຮັບການເຊື້ອເຊີນຈາກຄະນະບໍລິຫານຊາວໜຸ່ມຂອງສະຖາບັນວິ ທະຍາສາດວິທະຍາສາດສັງຄົມແຫ່ງຊາດ (ສວສຊ) ເພື່ອເຂົ້າຮ່ວມບັນຍາຍກ່ຽວກັບ ເຄັດລັບ ແລະບົດຮຽນທີ່ປະສົບຜົນສໍາເລັດການດໍາເນີນທຸລະກິດຜ່ານມາຕໍ່ກອງປະ ຊຸມສຳມະນາແຂ່ງຂັນຂຽນບົດວິທະນາ ສາດຫົວຂໍ້ຊາວໜຸ່ມເປັນແຂນຂົວຂອງ ພັກເປັນກະດູກສັນຫຼັງຂອງປະເທດຊາດ ໂດຍພາຍໃຕ້ເປັນປະທານຂອງທ່ານ ສອນທະນູ ທຳມະວົງ ປະທານສະຖາບັນວິທະ ຍາສາດສັງຄົມແຫ່ງຊາດພ້ອມມີບັນດາພະນັກງານຊາວໜຸ່ມຂອງສະຖາບັນດັ່ງກ່າວເຂົ້າຮ່ວມຮັບຟັງ.

 ໃນເວທີສຳມະນາດັ່ງກ່າວທ່ານ ຄຳໄພ ສົມຊະນະ ກ່າວວ່າ: ກຸ່ມບໍລິສັດຄຳໄພຊະນະ ປະຈຸບັນມີສຳນັກງານໃຫຍ່ຢູ່ຕຶກ 11 ຊັ້ນ ຊຶ່ງເປັນຂອງບໍລິສັດເອງທີ່ຫາກໍເປີດໃຊ້ຢ່າງເປັນທາງການເມື່ອບໍ່ດົນຜ່ານມານີ້ຕັ້ງຢູ່ບ້ານທົ່ງສ້າງນາງເມືອງຈັນທະບູລີ ນະຄອນຫຼວງວຽງຈັນ ນີ້ແມ່ນເປັນສ່ວນໜຶ່ງຂອງຜົນສຳເລັດຈາກການ ທຸ້ມເທສະຕິປັນຍາກຳລັງຊັບ ແລະກຳລັງແຮງກາຍຂອງຄອບຄົວສົມຊະນະໃນຕະຫຼອດເວລາ 20 ກວ່າປີຜ່ານມາທີ່ເລີ່ມຕົ້ນຈາກຄອບຄົວທຸກຍາກຊາວໄຮ່ນາຮົ້ວສວນເປັນພໍ່ຄ້າຊາວຂາຍນ້ອຍໆສູ້ຊົນຊີວິດທີ່ແສນຫຍຸ້ງຍາກລຳບາກປະກອບດ້ວຍຕົ້ນທຶນຊີວິດກໍບໍ່ສູງຮໍ່າຮຽນຈົບພຽງ ປ4 ແຕ່ດ້ວຍຄວາມມີນໍ້າໃຈມາ ນະອົດທົນເຮັດແທ້ທຳຈິງຂອງປະທານຈຶ່ງສາມາດໄຕ່ເຕົ້າທຶນຮອນ ແລະເປີດເປັນບໍລິສັດຄຳໄພຊະນະໃນວັນທີ 22 ພະຈິກ 1998  ແລະກ້າວເປັນກຸ່ມບໍລິສັດໃນເວລາຕໍ່ມາ.

  ປະຈຸບັນກຸ່ມບໍລິສັດຄຳໄພຊະນະຈຳ ກັດຜູ້ດຽວຂອງຂ້າພະເຈົ້າປະກອບມີທັງໝົດ 10 ກວ່າກິດຈະການທີ່ດຳເນີນກ່ຽວກັບເຄຫາສະຖານຂົວທາງ ແລະ ຊົນລະ ປະທານ, ຄອນກຣີດແຫຼວ ແລະຜະລິດຕະພັນຄອນກຣີດ, ໂຮງງານຜະລິດເຟີນິເຈີ ແລະຜະລິດຕະພັນໄມ້ຕົກແຕ່ງພາຍໃນ-ນອກເຄຫາສະຖານ, ສະຖາບັນການເງິນ, ບໍລິການຕອກເຈາະ ແລະອັດເສົາເຂັມທຸກປະເພດ, ບໍລິສັດຄຳໄພຊະນະປູກໄມ້, ຟາມຄົບວົງຈອນ, ບໍລິການທ່ອງທ່ຽວ- ຣີສອດຕາດຊອນ ແລະກິດຈະການອື່ນໆອີກ.   

 ແນວໃດກໍດີຕະຫຼອດໄລຍະເວລາ ເກືອບ 30 ປີຜ່ານມາຜົນສຳເລັດທັງໝົດທັງມວນນັ້ນປະທານກຸ່ມບໍລິສັດຄຳໄພຊະນະບອກວ່າແມ່ນຍ້ອນການດຳເນີນທຸລະ ກິດຂອງຂ້າພະເຈົ້າທີ່ຢຶດໝັ້ນຄຸນສົມບັດໃນຕົວ, ມີການວາງເປົ້າໝາຍຂອງຊີວິດ, ຮຽນຮູ້ຈາກປະສົບການ ແລະ ເຮັດຕົວຈິງໄປພ້ອມຈາກນ້ອຍຫາໃຫຍ່ຂຶ້ນເລື້ອຍໆ,ມີຄວາມອົດທົນທີ່ສຳຄັນແມ່ນເຮັດແທ້ທຳຈິງເຮັດໃຫ້ສັງຄົມຍອມຮັບ ແລະ ລັດຖະບານກໍໄດ້ເຫັນຜົນງານ, ມີຄວາມບໍລິສຸດສັດຊື່ຕໍ່ຄອບຄົວໂດຍສະ ເພາະແມ່ນລູກ ແລະເມຍ, ດຸໝັ່ນຂະຫຍັນພຽນອົດທົນ, ບໍ່ທໍ້ຖອຍເມື່ອພົບອຸປະສັກ, ເຄົາລົບລະບຽບກົດໝາຍ, ເສຍພາສີອາກອນຄົບຖ້ວນ ແລະຮູ້ບຸນຄຸນຕໍ່ພັກຕໍ່ລັດ. 

  ສຳລັບຊາວໜຸ່ມທີ່ເປັນກຳລັງແຮງສຳຄັນໃນການຂັບເຄື່ອນການພັດທະນາຄອບຄົວ ແລະປະເທດຊາດອະນາຄົດຂ້າງໜ້າທ່ານ ຄຳໄພ ສົມຊະນະ ໃຫ້ທັດສະ ນະວ່າ: ໃນແນວຄວາມຄິດຂອງຂ້າພະເຈົ້າເຫັນວ່າຈະຕ້ອງໄດ້ພັດທະນາຕົນເອງໃຫ້ມີຄວາມຮູ້ຄວາມສາມາດນອກຈາກຮຽນຢູ່ໂຮງຮຽນກໍຈະຕ້ອງຮຽນຮູ້ນຳໝູ່ເພື່ອນ ແລະຜູ້ທີ່ເພີ່ນປະສົບຜົນສຳເລັດຜ່ານມາ, ຮູ້ຈັກຈັບກາລະໂອກາດ, ມີລະບຽບວິໄນ,ຮູ້ເຕົ້າໂຮມຄວາມສາມັກ ຄີພາຍໃນຄອບຄົວ ແລະສັງຄົມ, ເຄົາລົບ ນັບຖືບັນພະບູລຸດ ແລະ ເຮັດຫຼ້ອນໜ້າທີ່ໆໄດ້ສ້າງໄວ້ໂດຍໃນເມື່ອພໍ່ແມ່ສ້າງພື້ນຖານໄວ້ແລ້ວຜູ້ສືບທອດກໍຕ້ອງເຫັນຄວາມສຳຄັນມີຄວາມເປັນເອກະພາບ ແລະ ສືບຕໍ່ປະຕິບັດໄປຕາມວິໄສທັດໃຫ້ປາກົດຜົນເປັນຈິງເພື່ອແນໃສ່ເຮັດໃຫ້ເປົ້າໝາຍ ແລະອຸດົມການທີ່ວາງໄວ້ສຳເລັດດ້ວຍດີ. 

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์