ຄຊກມດ ສຫຼອງວັນເດັກນ້ອຍສາກົນ

  ຄະນະກໍາມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະແມ່-ເດັກ (ຄຊກມດ) ຮ່ວມກັບອົງການຢູນີເຊັບປະຈໍາລາວຈັດງານສະເຫຼີມສະຫຼອງວັນເດັກສາກົນ (ວັນທີ 1 ມິຖຸນາ), ຂຶ້ນຢູ່ສູນຮ່ວມມືສາກົນ ແລະຝຶກອົບຮົມລາວ-ຢີ່ປຸ່ນ ນະຄອນຫຼວງວຽງຈັນ ໃນວັນທີ 31 ພຶດສະພາ 2019, ພາຍ ໃຕ້ການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກໍາມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະແມ່-ເດັກ , ໂດຍມີການນໍາພັກ-ລັດ,ຜູ້ຕາງໜ້າຈາກອົງການຢູນີເຊັບປະຈໍາລາວ ແລະນັກຮຽນທີ່ມາຈາກ 7 ແຂວງໃນ ທົ່ວປະເທດພ້ອມດ້ວຍຈາກພາກສ່ວນກ່ຽວຂ້ອງເຂົ້າຮ່ວມ.

  ທ່ານ ນາງ ອີນລາວັນ ແກ້ວບຸນພັນ ປະທານສູນກາງສະຫະພັນແມ່ຍິງລາວທັງເປັນຮອງປະທານຄະນະກໍາມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະແມ່-ເດັກ ໄດ້ມີຄໍາເຫັນວ່າ: ການຈັດຄັ້ງນີ້ ເປັນໂອກາດດີສໍາລັບປະເທດຂອງພວກເຮົາຮ່ວມກັບປະເທດຕ່າງໆໃນໂລກໄດ້ເພີ່ມທະວີຄວາມເອົາໃຈໃສ່  ແລະໃຫ້ຄວາມສໍາຄັນຕໍ່ສິດທິເດັກເພື່ອໃຫ້ເຂົາເຈົ້າມີໄວທີ່ເຕັມໄປດ້ວຍຄວາມຢູ່ດີກິນດີ, ມີສ່ວນຮ່ວມ, ໄດ້ຮັບການປົກປ້ອງ ແລະໄດ້ຮັບການສົ່ງເສີມໃຫ້ມີການພັດທະນາດ້ານຕ່າງໆເພື່ອເຮັດໃຫ້ເດັກມີອະນາຄົດທີ່ສົດໃສ ແລະ ກາຍເປັນຜູ້ໃຫຍ່ທີ່ມີຄຸນນະພາບ”. ນອກຈາກນີ້ຍັງເປັນການສ້າງຂະບວນການສະເຫຼີມສະ ຫຼອງວັນສົນທິສັນຍາວ່າດ້ວຍສິດທິເດັກຄົບຮອບ 30 ປີ, ວັນທີ 20 ພະຈິກ ໃຫ້ມີຂະບວນການຟົດຟື້ນນັບແຕ່ຂັ້ນສູນກາງຮອດຂັ້ນທ້ອງຖິ່ນຕື່ມອີກ.

  ງານຄັ້ງນີ້ ໄດ້ດໍາເນີນໄປດ້ວຍບັນຍາກາດຟົດຟື້ນມ່ວນຊື່ນ ແລະມີຄວາມໝາຍເລິກເຊິ່ງຜູ້ເຂົ້າຮ່ວມໄດ້ຮັບຊົມວີດີໂອກ່ຽວກັບການປຶກສາຫາລື ແລະເກັບກໍາ ຄໍາຄິດເຫັນຂອງເດັກທີ່ຮໍ່າຮຽນໃນໂຮງຮຽນຕ່າງໆໃນທົ່ວປະເທດ, ຮັບຟັງການສະເໜີຄໍາຄິດເຫັນຂອງເດັກກ່ຽວກັບສະພາບການພັດທະນາເດັກໃນຕໍ່ໜ້າ, ວິ ໄສທັດ 2030 ລວມເຖິງສິ່ງທ້າທາຍທີ່ມີຕໍ່ເດັກ, ກິດຈະກໍາການຢອດຢາປ້ອງກັນພະຍາດໂປລີໂອ ແລະຊັ່ງນໍ້າໜັກດ້ານໂພສະນາການໃຫ້ເດັກ, ການສະແດງສີລະປະວັນນະຄະດີລວມເຖິງກິດຈະກໍາສໍາຄັນອື່ນໆອີກຈໍານວນໜຶ່ງ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์