ເຈົ້າໜ້າທີ່ບຸກຈັບ 3 ຄົນ ພົບຢາບ້າແສນເມັດ

 ໃນເວລາປະມານ 8 ໂມງຂອງ ວັນທີ 23 ພຶດສະພາ 2019, ທາງເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງສະຫວັນນະເຂດໄດ້ສົມທົບກັບທະຫາຊາຍແດນ ແຂວງກວາງຈິ ສສ ຫວຽດນາມ ສືບຮູ້ວ່າ: ຈະມີຄົນບໍ່ດີຈຳນວນໜຶ່ງກຳລັງເຄື່ອນໄຫວຄ້າຂາຍ-ຢາເສບຕິດປະເພດຢາບ້າຢູ່ຂອບເຂດ ເມືອງເຊໂປນ ແຂວງສະຫວັນນະເຂດ.

  ດັ່ງນັ້ນ, ຈຶ່ງຈັດຕັ້ງກຳລັງວິຊາສະເພາະເພື່ອມ້າງລາຍຄະດີດັ່ງກ່າວຈົນມາຮອດເວລາປະມານ 10:30 ໂມງ ຂອງວັນດຽວກັນຈຶ່ງສາມາດກັກຕົວເປົ້າໝາຍໄດ້ 3 ຄົນ ຊື່ທ້າວ ໄມຄຳ ອາຍຸ 40 ປີ, ອາຊີບກໍາມະກອນ, ບ້ານທ່າແຂກກາງ ເມືອງທ່າແຂກ ແຂວງຄຳມ່ວນ, ທ້າວ ເສກສັນ ຫຼື ຕ໋ອງ ອາຍຸ 40 ປີ, ອາຊີບເຮັດນາບ້ານມັນປາ ເມືອງໜອງ ບົກ ແຂວງຄຳມ່ວນ ແລະທ້າວ ປອງສະຫວັນ ຫຼື ປອງ ອາຍຸ 46 ປີ, ອາຊີບກຳມະກອນ ບ້ານໂພນ ເມືອງໜອງບົກ ແຂວງຄຳມ່ວນ ພ້ອມຂອງກາງຢາບ້າ 50 ມັດ, ເທົ່າກັບ 100.000 ເມັດ ແລະໂທລະສັບ 3 ໜ່ວຍ,  ລົດໃຫຍ່ນິດສັນນາວາລ້າເລກທະບຽນ ກຄ 9886 ສະຫວັນ ນະເຂດ 1 ຄັນ.

  ຜ່ານການສືບສວນ-ສອບສວນພວກກ່ຽວໃຫ້ການວ່າ: ຢາບ້າຈຳນວນດັ່ງກ່າວແມ່ນໄດ້ຊື້ມາຈາກເພື່ອນຮ່ວມຂະບວນການຂອບເຂດແຂວງບໍລິຄຳໄຊເພື່ອໄປຂາຍຕໍ່ໃຫ້ລູກຄ້າທີ່ເປັນຄົນຫວຽດນາມ.

  ຊຶ່ງຄະດີດັ່ງກ່າວຍັງຢູ່ໃນຂັ້ນຕອນເຈົ້າໜ້າທີ່ສືບຫາຜູ້ຮ່ວມຂະບວນການມາລົງໂທດຕາມລະບຽບກົດໝາຍບ້ານເມືອງຕໍ່ໄປ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์