ກະສິກຳຈັກກິດຈະກຳປູກໄມ້ເຂດພຶດສາສາດຫ້ວຍຍາງ-ດົງໝາກຄາຍ

  ວັນທີ 1 ມິຖຸນາ 2019 ກະຊວງກະສິກຳ ແລະປ່າໄມ້ ແລະກະຊວງຊັບພະຍາກອນທຳມະຊາດ ແລະສິ່ງແວດລ້ອມໄດ້ຮ່ວມກັນຈັດກິດຈະກຳປູກໄມ້ຂຶ້ນເນື່ອງໂອກາດວັນປູກຕົ້ນໄມ້ແຫ່ງຊາດ 1 ມິຖຸນາ ແລະວັນສິ່ງແວດລ້ອມໂລກ ແລະວັນສິ່ງແວດລ້ອມແຫ່ງຊາດ 5 ມິຖຸນາ, ທີ່ສວນພຶດສາສາດຫ້ວຍຍາງ-ດົງໝາກຄາຍຊຶ່ງໃຫ້ກຽດເຂົ້າຮ່ວມຂອງ ທ່ານ ພັນຄຳ ວິພາວັນຮອງປະທານປະເທດ, ພ້ອມນັ້ນຍັງມີບັນດາທ່ານລັດຖະມົນຕີ, ຮອງລັດຖະມົນຕີຈາກກະຊວງ ແລະອົງ ການທຽບເທົ່າ, ບັນດາທ່ານທູດຕານຸທູດ, ແຂກຜູ້ມີກຽດທັງພາຍໃນ ແລະຕ່າງປະເທດ, ບັນດາຫຼານນ້ອຍເຍົາວະຊົນ ແລະຊາວໜຸ່ມເຂົ້າຮ່ວມ.

 ທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະປ່າໄມ້ກ່າວວ່າ: ພິທີປູກຕົ້ນໄມ້ຮ່ວມກັນໃນຄັ້ງນີ້ແມ່ນເພື່ອສົ່ງເສີມການປູກຕົ້ນໄມ້ ແລະຟື້ນຟູປ່າຕາມທິດທາງນະໂຍບາຍ ແລະເປົ້າໝາຍຂອງຍຸດທະສາດປ່າໄມ້ຂອງລັດຖະບານຊຶ່ງມີຄາດໝາຍເພີ່ມເນື້ອທີ່ປົກຫຸ້ມຂອງປ່າໄມ້ໃຫ້ໄດ້ 70% ໃນປີ 2020, ພ້ອມທັງປູກຈິດສຳນຶກໃຫ້ນ້ອງນ້ອຍເຍົາວະຊົນໃຫ້ຮູ້ຈັກຄຸນຄ່າ ແລະຮູ້ຈັກຮັກປ່າໄມ້ ແລະ ຊັບພະຍາກອນປ່າໄມ້, ສ່ວນການປູກໃນສະຖານທີ່ແຫ່ງນີ້ແມ່ນເພື່ອຟື້ນຟູສວນພຶດສາສາດຫ້ວຍຍາງ-ດົງໝາກຄາຍໃຫ້ມີສະພາບສົມບູນ, ກາຍເປັນແຫຼ່ງເຕົ້າໂຮມເຊື້ອພັນໄມ້ນາໆຊະນິດຕ່າງໆທີ່ມີຄຸນຄ່າ ແລະ ຫາຍາກຂອງລາວ, ເພີ່ມເນື້ອທີ່ສີຂຽວໃຫ້ກາຍເປັນບ່ອນຫາຍໃຈເອົາອາກາດທີ່ສະອາດໃຫ້ແກ່ຊາວນະຄອນຫຼວງ ແລະ ຜູ້ມາທ່ອງທ່ຽວຢ້ຽມຢາມ, ທັງເປັນການປັບປຸງຄຸນນະພາບອາກາດ, ຫຼຸດຜ່ອນ ມົນລະພິດໃນອາກາດ ແລະຕ້ານພາວະ ໂລກຮ້ອນໄປໃນຕົວ, ຢູ່ສວນພຶດສາສາດ ແຫ່ງນີ້ກະຊວງໄດ້ຮັບການແບ່ງປັນ ແລະ ມອບໝາຍໃຫ້ປູກຕົ້ນໄມ້ໃນເນື້ອທີ່ 136 ເຮັກຕາໃນຈຳນວນເນື້ອທີ່ທັງໝົດ 268 ເຮັກຕາ ໃຫ້ສຳເລັດໃນໄລຍະເວລາ 2 ປີ, ໂດຍການສະໜອງງົບປະມານຈາກກອງທຶນປົກປັກຮັກສາສິ່ງແວດລ້ອມ.

  ສຳລັບປີ 2019 ນີ້ ກະຊວງກະສິກຳ ແລະປ່າໄມ້ມີແຜນການປູກຕົ້ນໄມ້ຢູ່ສວນແຫ່ງນີ້ໃຫ້ສຳເລັດໃນເນື້ອທີ່ 50 ເຮັກຕາ, ແຕ່ສະເພາະມື້ນີ້ພວກເຮົາຈະໄດ້ປູກ ຕົ້ນໄມ້ຮ່ວມກັນໃນເນື້ອທີ່ 5 ເຮັກຕາ, ປູກດ້ວຍຊະນິດພັນໄມ້ພື້ນເມືອງລາວທັງໝົດ 4.166 ຕົ້ນ ແລະມີ 7 ຊະນິດພັນໄມ້ຄື: ໄມ້ຂະຍຸງ, ໄມ້ດູ່ເລືອດ, ໄມ້ດູ່ລາຍ, ໄມ້ແຕ້ຄ່າ, ໄມ້ປະດົງ, ໄມ້ຍາງ ແລະໄມ້ ແຄນເຮືອ, ເພື່ອຮັບປະກັນເຮັດໃຫ້ການປູກໄມ້ມີປະສິດທິຜົນສູງ, ທັງເປັນການເລັ່ງຄວາມໄວໃນການຟື້ນຟູສວນພຶດສາສາດ, ຕົ້ນໄມ້ທີ່ຈະນຳມາປູກໃນຄັ້ງນີ້ມີຂະໜາດລວງສູງ 2 ແມັດຂຶ້ນໄປ ແລະພາຍຫຼັງການປູກແລ້ວຈະໄດ້ມອບເຮັດສັນຍາມອບເໝົາໃຫ້ມີບຸກ ຄົນຮັບຜິດຊອບໃນການບົວລະບັດຮັກສາຈົນກວ່າຕົ້ນໄມ້ດັ່ງກ່າວລອດຕາຍ ແລະຈະເລີນເຕີບໂຕດີ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์