ລາວ-ຍີ່ປຸ່ນລົງນາມເອກະສານແລກປ່ຽນ 2 ສະບັບ

  ທ່ານ ທອງລຸນ ສີສຸລິດ ນາຍົກລັດຖະມົນຕີພ້ອມດ້ວຍຄະນະໄດ້ສໍາເລັດການເຂົ້າຮ່ວມກອງປະຊຸມສາກົນກ່ຽວກັບອະນາຄົດຂອງອາຊີຄັ້ງທີ 25 ພາຍໃຕ້ຫົວຂໍ້: “ຄົ້ນຫາລະບຽບໂລກແບບໃໝ່ເພື່ອແກ້ໄຂຄວາມວຸ້ນວາຍໃນໂລກໃນວັນທີ 30-31 ພຶດສະພາ 2019 ທີ່ໂຕກຽວ, ປະເທດຍີ່ປຸ່ນ.

  ໃນກອງປະຊຸມຄັ້ງນີ້, ທ່ານນາຍົກລັດຖະມົນຕີໄດ້ຂຶ້ນກ່າວປາໄສໂດຍໄດ້ຍົກໃຫ້ເຫັນເຖິງສະພາບການຄວາມວຸ້ນວາຍສັບສົນທີ່ພວມເກີດຂຶ້ນໃນປະຈຸບັນ ແລະໄດ້ສະແດງທັດສະນະແລະວິໄສທັດເພື່ອແກ້ໄຂຄວາມຫຍຸ້ງຍາກສັບສົນດັ່ງກ່າວດ້ວຍຂໍ້ລິເລີ່ມ ແລະກົນໄກການຮ່ວມມືທີ່ມີຄວາມຍຸຕິທໍາ, ໂປ່ງໃສ່, ເທົ່າທຽມກັນແລະບໍ່ຂຶ້ນກັບປະເທດໃດໜຶ່ງ ຫຼືກຸ່ມເສດຖະກິດໃດໜຶ່ງບົນພື້ນຖານການມີສ່ວນຮ່ວມຂອງປະຊາຄົມໃນທົ່ວໂລກເພື່ອຈະນໍາພາໂລກນີ້ກ້າວໄປສູ່ໂລກແຫ່ງໂລກາພິວັດທີ່ມີຄຸນນະພາບສູງ,ຍືນຍົງມີຄວາມສະເໝີພາບ,ມີຜົນປະໂຫຍດຮ່ວມກັນ ແລະຄົງຮັກສາໄວ້ສັນຕິພາບ, ສະຖຽນລະພາບ ແລະຄວາມໝັ້ນຄົງໃນໂລກ.

 ໂອກາດດັ່ງກ່າວ ທ່ານນາຍົກລັດຖະມົນຕີໄດ້ພົບປະເຮັດວຽກກັບທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນຊຶ່ງໄດ້ແລກປ່ຽນຄໍາຄິດເຫັນກ່ຽວກັບການຮ່ວ ມມືສ່ອງຝ່າຍ ແລະຫຼາຍຝ່າຍ, ປຶກສາຫາລືເພື່ອເພີ່ມທະວີຮັດແໜ້ນການຮ່ວມມືສອງຝ່າຍກໍຄືທິດທາງການຮ່ວມມືໃນຕໍ່ໜ້າ. ນອກນັ້ນ, ຝ່າຍລາວໄດ້ສະ ແດງຄວາມຊົມເຊີຍຕໍ່ຜົນສຳເລັດຂອງກອງປະຊຸມສຸດຍອດແມ່ນໍ້າຂອງ-ຍີ່ປຸ່ນຄັ້ງທີ 10 ພາຍໃຕ້ການເປັນເຈົ້າພາບຂອງຍີ່ປຸ່ນໃນເດືອນຕຸລາ 2018 ທີ່ໂຕ ກຽວຜ່ານມາ ແລະທັງສອງຝ່າຍຈະສືບຕໍ່ຮ່ວມມືກັນຈັດຕັ້ງປະຕິບັດຍຸດທະສາດໂຕກຽວ 2018 ເພື່ອການຮ່ວມມືແມ່ນໍ້າຂອງ-ຍີ່ປຸ່ນໃຫ້ປະສົບຜົນສຳເລັດ.

  ພ້ອມດຽວກັນນີ້, ໄດ້ມີພິທີລົງນາມເອກະສານແລກປ່ຽນ 2 ສະບັບຄື: ໂຄງການພັດທະນາຊັບພະຍາກອນມະນຸດ, ມີມູນຄ່າ 308 ລ້ານເຢນຊຶ່ງແມ່ນໂຄງ ການຊ່ວຍເຫຼືອລ້າຂອງລັດຖະບານຍີ່ປຸ່ນ ແລະການປັບປຸງສົນທິສັນຍາຂົນສົ່ງທາງອາກາດສອງຝ່າຍ ສປປ ລາວ ແລະຍີ່ປຸ່ນ, ຮ່ວມລົງນາມໂດຍ ທ່ານ ວິໂຣດ ສຸນດາຣາ, ເອກອັກຄະລັດຖະທູດແຫ່ງ ສປປ ລາວປະຈໍາຍີ່ປຸ່ນ, ຕາງໜ້າລັດຖະບານລາວ ແລະທ່ານ ຕາເກຊິ ຮິກິຣາລະ, ເອກອັກຄະຣາຊະທູດຍີ່ປຸ່ນປະຈໍາ ສປປ ລາວ, ຕາງໜ້າລັດຖະບານຍີ່ປຸ່ນໂດຍການເປັນສັກຂີພິຍານຂອງສອງທ່ານນາຍົກລັດຖະມົນຕີແຫ່ງ ສປປ ລາວ ແລະຍີ່ປຸ່ນ.

 ທ່ານ ທອງລຸນ ສີສຸລິດ ຍັງໄດ້ໃຫ້ສໍາພາດຕໍ່ໜັງສືພິມ ແລະໂທລະພາບນິກເກກ່ຽວກັບສະພາບການພັດທະນາເສດຖະກິດ-ສັງຄົມຂອງ ສປປ ລາວ ໃນປະຈຸ ບັນ ແລະທັດສະນະຕໍ່ການພົວພັນຮ່ວມມືລະຫວ່າງ ສປປ ລາວ ກັບບັນດາປະເທດຕ່າງໆ ໃນພາກພື້ນລວມທັງຍີ່ປຸ່ນໃນປະຈຸບັນກໍຄືໃນອະນາຄົດ ແລະ ຮັບການເຂົ້າຢ້ຽມຂໍ່ານັບຂອງປະທານອົງການ JET RO ແລະ ບໍລິສັດຂອງຍີ່ປຸ່ນຈໍານວນໜຶ່ງຕື່ມອີກ.

ພາບ ແລະຂ່າວໂດຍ: ໜັງສືພິມເສດກິດ-ສັງຄົມ

 

แชร์