ປະທານປະເທດ ລົງຢ້ຽມຢາມ ແລະຊຸກຍູ້ສູນການຄ້າບາຊາ-ບີ ແຄັດແອນແຄຣິ່

  ເມື່ອວັນທີ 31 ພຶດສະພາຜ່ານມາ ທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານສູນກາງພັກ, ປະທານປະເທດແຫ່ງ ສປປ ລາວ ພ້ອມດ້ວຍຄະ ນະປະກອບມີທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ ແລະພາກສ່ວນທີ່ກ່ຽວຂ້ອງໄດ້ເປັນກຽດລົງຢ້ຽມຢາມ ແລະຊຸກຍູ້ວຽກງານຂອງສູນການຄ້າບາຊາ-ບີ ແຄັດແອນແຄຣີ່ ຊຶ່ງມີທ່ານ ພົງປຣະເສີດ ກັນລະຍາ ປະ ທານສູນການຄ້າບາຊາ-ບີ ພ້ອມດ້ວຍພະນັກງານໃຫ້ການຕ້ອນຮັບຢ່າງອົບອຸ່ນ.

  ໃນການຢ້ຽມຢາມຄັ້ງນີ້ກ່ອນເດີນຢ້ຽມຊົມສິນຄ້າທ່ານປະທານປະເທດ ແລະ ຄະນະໄດ້ຮັບຟັງການລາຍງານກ່ຽວກັບສະພາບລວມ ແລະແຜນພັດທະນາຂອງ ສູນການ ຄ້າບາຊາ-ບີ ໃນຕໍ່ໜ້າຈາກ ທ່ານ ພົງປຣະເສີດ ກັນລະຍາ ໂດຍສູນການຄ້າແຫ່ງນີ້ມີເນື້ອທີ່ທັງໝົດ 1,7 ເຮັກຕາ ຕັ້ງຢູ່ເຂດດອນກອຍເມືອງສີສັດ ຕະນາກ ນະຄອນຫຼວງວຽງຈັນ ຊຶ່ງໄດ້ເປີດໃຫ້ບໍລິການແກ່ສັງຄົມຢ່າງເປັນທາງການນັບແຕ່ກາງເດືອນພະຈິກປີ 2018 ຕົ້ນມາ ເພື່ອເປັນສູນການຄ້າຂາຍສົ່ງ

ທີ່ໃຫຍ່ທີ່ສຸດໃນ ສປປ ລາວ ເປັນແຫຼ່ງ ລວມສິນຄ້າ, ເຄື່ອງອຸປະໂພກ-ບໍລິໂພກ 25 ພັນກວ່າ ລາຍການທີ່ນໍາມາຈຳໜ່າຍ ຈາກພາຍໃນ ແລະຕ່າງປະເທດ ຊຶ່ງນັບແຕ່ມື້ເປີດໃຫ້ບໍລິການເປັນຕົ້ນມາກໍໄດ້ຍິນສຽງຕອບຮັບຈາກລູກຄ້າພາຍໃນເປັນຢ່າງດີທັງສາມາດຫຼຸດຜ່ອນຜູ້ຄົນຫຼັ່ງໄຫຼຂ້າມໄປຊື້ສີນຄ້າຢູ່ປະເທດໃກ້ ຄຽງໄດ້ລະດັບໜຶ່ງນຳອີກ.

   ແນວໃດກໍດີຫຼັງຈາກນັ້ນທ່ານປະທານປະເທດກໍໄດ້ມີຄຳເຫັນໂອ້ລົມພ້ອມຊົມເຊີຍຕໍ່ປະທານສູນການຄ້າບາຊາບີທີ່ໄດ້ເຮັດໜ້າທີ່ສະໜອງເຄື່ອງອຸປະໂພກ, ບໍ ລິໂພກໃຫ້ແກ່ສັງຄົມນອກຈາກນັ້ນທ່ານຍັງໄດ້ສະເໜີໃຫ້ສູນການຄ້າສືບຕໍ່ດຳເນີນຂະຫຍາຍທຸລະກິດເພື່ອປະກອບສ່ວນໃນການພັດທະນາເສດຖະກິດ-ສັງຄົມໃຫ້ນັບມື້ນັບຂະຫຍາຍຕົວ ແລະສະເໜີໃຫ້ພາກສ່ວນທີ່ກ່ຽວຂ້ອງໃຫ້ຄວາມສະດວກ, ສົ່ງເສີມການຜະລິດພາຍໃນ ແລະສ້າງວຽກເຮັດງານທຳໃຫ້ແກ່ປະຊາຊົນ ໂດຍສະເພາະຂະແໜງການກະສິກຳ ແລະອື່ນໆ.

ພາບ ແລະຂ່າວໂດຍ:ໜັງສືພິມເສດຖະກິດ-ສັງຄົມ

แชร์