ວຽງຈັນເຊັນເຕີຈົດທະບຽນເຂົ້າຕະຫຼາດຫຼັກຊັບ

  ວຽງຈັນເຊັນເຕີມະຫາຊົນເປັນ ບໍລິສັດທີ 10 ທີ່ໄດ້ຈົດທະບຽນເຂົ້າສູ່ຕະຫຼາດຫຼັກຊັບລາວຢ່າງເປັນທາງການໃນວັນທີ 31 ພຶດສະພາ 2019, ດ້ວຍຈຳນວນຮຸ້ນທັງໝົດ 51,19 ລ້ານຮຸ້ນ ແລະໄດ້ມີການເປີດຈຳໜ່າຍຢູ່ຕະຫຼາດຫຼັກຊັບໃນລາຄາ 1,20

  ພັນກີບຕໍ່ຮຸ້ນ, ໂດຍຮ່ວມໃນພິທີເຊັນສັນຍາ ແລະເປີດຊື້-ຂາຍຮຸ້ນຄັ້ງນີ້ຂອງທ່ານ ວັນຄຳ ວໍຣະວົງ ຜູ້ອຳນວຍການໃຫຍ່ຕະຫຼາດຫຼັກຊັບລາວ ແລະທ່ານ Li Xiao dong ຜູ້ອຳນວຍການໃຫຍ່ບໍລິສັດວຽງ ຈັນເຊັນເຕີລາວ ມະຫາຊົນ, ເຂົ້າຮ່ວມເປັນ ສັກຂີພິຍານຂອງທ່ານ ນາງ ສາຍສະໝອນ ຈັນທະຈັກ ຫົວໜ້າສຳນັກງານຄະນະກຳມະການຄຸ້ມຄອງຫຼັກຊັບ, ພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ນາງ ອໍລະໄທ ສັນຕິຄົງຄາ ຮອງປະທານສະພາບໍລິຫານບໍລິສັດວຽງຈັນເຊັນເຕີມະຫາຊົນ ກ່າວວ່າ: ສູນການຄ້າວຽງຈັນເຊັນເຕີແມ່ນໂຄງການຮ່ວມມືລະຫວ່າງກຸ່ມບໍລິສັດກໍ່ສ້າງ-ລົງທຶນ ແລະ ຖືຮຸ້ນແຂວງຢຸນນານຈຳກັດ ແລະ ບໍລິສັດກຣິດຕິພົງກຣຸບ ຈຳກັດ, ຊຶ່ງໄດ້ສ້າງຕັ້ງບໍລິສັດພັດທະນາສູນການຄ້າເສ ດຖະກິດການຄ້າຄົບວົງຈອນໜອງຈັນຕອນເໜືອຈຳກັດ ເພື່ອເປັນບໍລິສັດຮັບຜິດຊອບດຳເນີນໂຄງການ ແລະກໍເປັນໂຄງການທີ່ເກີດຈາກພາຍໃຕ້ຂໍ້ລິເລີ່ມ ໜຶ່ງແລວທາງໜຶ່ງເສັ້ນທາງ, ມາຮອດປະຈຸບັນວຽງຈັນເຊັນເຕີກາຍເປັນສູນກາງການຄ້າ, ສູນລວມສຳນັກງານ, ສູນລວມການເງິນ, ສູນລວມການສະແດງ, ສູນລວມການຄ້າຂະໜາດໃຫຍ່ໃນນະຄອນຫຼວງວຽງຈັນ.

  ສຳລັບການເປີດຈອງຊື້ຮຸ້ນຂອງບໍລິສັດດັ່ງກ່າວແມ່ນໄດ້ເລີ່ມມາແຕ່ວັນທີ 18 ມີນາ ຈົນເຖິງວັນທີ 30 ເມສາ 2019 ຊຶ່ງເປັນວັນສຸດທ້າຍຂອງການຈອງຊື້ຮຸ້ນ IPO ຂອງບໍລິສັດວຽງຈັນເຊັນເຕີ ລາວ ມະຫາຊົນແມ່ນສຳເລັດໄປດ້ວຍດີ, ໃນລາຄາສະເໜີອອກໃຫ້ແກ່ມວນຊົນ 1.050 ກີບຕໍ່ຮຸ້ນ, ໄດ້ປະສົບຜົນ ສຳເລັດໃນການອອກຈຳໜ່າຍຮຸ້ນທັງໝົດ 51,19 ລ້ານຮຸ້ນເປັນເງິນທີ່ລະດົມໄດ້ 53,75 ຕື້ກີບ, ເພື່ອນຳໃຊ້ເຂົ້າໃນການພັດທະນາພື້ນທີ່ຂອງສູນການຄ້າ ແລະກໍ່ສ້າງຮ້ານຄ້າອ້ອມຂ້າງຕຶກໜອງຈັນ, ສ່ວນການເປີດຕະຫຼາດຄັ້ງທຳອິດຂອງບໍລິສັດໃນຕະຫຼາດຫຼັກຊັບລາວແມ່ນເປີດຂາຍໃນລາຄາ 1,20 ພັນກີບຕໍ່ຮຸ້ນ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์