ລາວສົ່ງອອກສິນຄ້າໄປຈີນ 3 ປີ ບັນລຸພັນຕື້ກວ່າກີບ

  ຈີນ ເປັນຕະຫຼາດທີ່ໜ້າສົນໃຈຫຼາຍສຳລັບພາກທຸລະກິດທີ່ຕ້ອງການຂະຫຍາຍຕະຫຼາດ ແລະ ເປັນອີກໜຶ່ງຊ່ອງທາງຂອງຜູ້ປະກອບການ ລາວທີ່ຈະຊ່ວຍໃນການຊອກຫາຕະຫຼາດສົ່ງອອກໃໝ່ ແລະໃຫຍ່ກວ່າເກົ່າໂດຍອີງໃສ່ປະຊາກອນທີ່ໜາແໜ້ນ,ເສດຖະກິດທີ່ມີການຂະຫຍາຍຕົວຢ່າງຕໍ່ເນື່ອງ ແລະໄດ້ເຂົ້າມາມີບົດບາດສຳຄັນຕໍ່ກັບເສດຖະກິດໃນພາກພື້ນອາຊຽນ, ສະນັ້ນພາຍຫຼັງທີ່ມີການເປີດຕະຫຼາດສິດທິພິເສດ ທາງດ້ານການຄ້າທີ່ ສປປ ລາວ ແລະ ສປ ຈີນ ເປັນພາຄີຮ່ວມກັນ ໃນ 3 ຂອບສັນຍາກໍໄດ້ເຮັດໃຫ້ຕົວເລກການສົ່ງອອກຂອງລາວໃນໄລຍະ 3 ປີ ມານີ້ມີມູນຄ່າເຖິງ 207,80 ລ້ານໂດລາ ຫຼື ປະມານ 1 ພັນຕື້ກວ່າກີບ.

  ອີງຕາມສູນຂໍ້ມູນທາງດ້ານການຄ້າຂອງລາວເຜີຍໃຫ້ຮູ້ເມື່ອບໍ່ດົນມານີ້ຮູ້ວ່າ: ສຳລັບລາວພາຍຫຼັງທີ່ມີການເປີດຕະຫຼາດສິດທິພິເສດທາງດ້ານການຄ້າທີ່ ສປປ ລາວ ແລະ ສປ ຈີນ ເປັນພາຄີຮ່ວມກັນໃນ 3 ຂອບສັນຍາຄື: ສັນຍາການຄ້າເສລີ ອາຊຽນ-ສປ ຈີນ (ASEAN-China Free Trade Agreement: ACFTA) ຟອມ E, ສິດທິພິເສດທາງການຄ້າແບບຝ່າຍດຽວຈາກ ສປ ຈີນ ພາຍໃຕ້ລະບົບອັດຕາພາສີພິເສດ (Special and Preferential Tariff Treatment for CLM: SPT) ຟອມ SPT ແລະສັນຍາການຄ້າເສລີ ອາຊີ-ປາຊີຟິກ (Asia-Pacific Trade Agreement: APTA) ຟອມ APTA, ໄດ້ສົ່ງຜົນໃຫ້ການຄ້າສອງປະເທດລາວ ແລະຈີນ ມີການຂະຫຍາຍໂຕຂຶ້ນເລື້ອຍໆ ໂດຍສະເພາະພາຍໃຕ້ຂອບສັນຍາ ACFTA, ຊຶ່ງຈາກການຈັດຕັ້ງປະຕິບັດຂອບສັນຍາຕ່າງໆໃນໄລຍະ 3 ປີຜ່ານ ມາ (2015, 2016 ແລະ 2017) ເຫັນວ່າມູນຄ່າການສົ່ງອອກຈາກ ສປປ ລາວ ໄປ ສປ ຈີນ ໂດຍນຳໃຊ້ສິດທິພິເສດທາງດ້ານການຄ້າຕິດໜຶ່ງໃນຫ້າຂອງປະ ເທດທີ່ ສປປ ລາວ ມີການສົ່ງອອກຄື: ປີ 2015 ຢູ່ໃນອັນດັບທີ 5, ປີ 2016 ຢູ່ໃນອັນດັບທີ 4 ແລະປີ 2017 ຢູ່ອັນດັບທີ 5.

  ສຳລັບສິນຄ້າສົ່ງອອກຫຼັກໃນຂອບສັນຍານີ້ແມ່ນ ຝຸ່ນ/ປຸ໋ຍ, ຢາງທໍາມະຊາດ ແລະທອງບໍລິສຸດມູນຄ່າການສົ່ງອອກຂອງ ສປປ ລາວ ພາຍ ໃຕ້ສິດທິພິເສດທາງກ້ານຄ້າໄປຍັງ ສປ ຈີນ ປະຕິບັດ ໄດ້ 53,11 ລ້ານໂດລາ ໃນປີ 2015, 79,82 ລ້ານໂດລາ ໃນປີ 2016 ແລະ 74,86 ລ້ານໂດລາ ໃນປີ 2017, ໂດຍລວມທັງໝົດປະມານ 207,80 ລ້ານໂດລາ ຫຼື ປະມານ 1.766 ຕື້ກີບ, ທັງນີ້ກໍມາເນື່ອງຈາກ ສປ ຈີນ ເປັນປະເທດທີ່ມີຂະໜາດຂອງເສດຖະກິດ ແລະປະຊາກອນທີ່ໃຫຍ່, ໂດຍຕາມຂໍ້ມູນສະຖິຕິຈາກເວັບໄຊ worldstopexports.com ສະແດງ ໃຫ້ເຫັນວ່າໃນປີ 2017 ສປ ຈີນ ມີ ມູນຄ່ານຳເຂົ້າສິນຄ້າຈາກທົ່ວໂລກ 1.841 ພັນຕື້ໂດລາ, ໃນນັ້ນ 55,9% ຂອງມູນຄ່າການນໍາເຂົ້າທັງໝົດຂອງຈີນແມ່ນມາຈາກບັນດາປະເທດໃນທະວີບອາຊີ ແລະໃນປີຜ່ານມາຜະລິດຕະພັນສິນຄ້າຈາກລາວທີ່ເຂົ້າຮ່ວມງານວາງສະແດງສິນຄ້າຂອງປະເທດອາຊີໃຕ້-ອາຊີຕາເວັນອອກສ່ຽງໃຕ້ຢູ່ນະຄອນຄຸນໝິງແຂວງຢຸນໜານ ສປ ຈີນ, ຊຶ່ງບັນດານັກທຸລະກິດລາວໄດ້ເລືອກເອົາຜະ ລິດຕະພັນ ແລະ ສິນຄ້າທີ່ເປັນເອກະລັກຂອງລາວຫຼາຍຊະນິດໂດຍສະເພາະພອຍ, ແກ້ວຫ້ວຍຊາຍຂອງແຂວງບໍ່ແກ້ວ, ນ້ຳໜາກຍໍ, ເຂົ້າໄກ່ນ້ອຍ, ຜະລິດຕະພັນໄມ້ແກະສະຫຼັກທີ່ເປັນເອກະລັກ ແລະໂດດເດັ່ນ, ຊຶ່ງເຫັນໄດ້ວ່ານັກທຸລະກິດ ແລະປະຊາຊົນຈີນໃຫ້ຄວາມສົນໃຈເປັນພິເສດ ແມ່ນ ພອຍ, ນ້ຳໜາກຍໍ, ເຂົ້າໄກ່ນ້ອຍ ແລະຜະລິດຕະພັນໄມ້ແກະສະຫຼັກຕ່າງໆ, ເພາະວ່າສິນຄ້າເຫຼົ່ານີ້ສ່ວນຫຼາຍໄດ້ຮັບເຊີນເຂົ້າຮ່ວມງານວາງສະແດງຢູ່ບັນດາແຂວງຂອງຈີນທຸກປີເຮັດໃຫ້ປະຊາຊົນຊາວຈີນມີຄວາມເພິ່ງພໍໃຈຫຼາຍ ແລະໄດ້ຜົນຕອບຮັບດີພາຍຫຼັງຊົມໃຊ້ຜະລິດຕະພັນລາວ.

  ເພື່ອເປັນການຊຸກຍູ້ຜະລິດຕະພັນຂອງລາວ, ເປັນທີ່ຍອມຮັບຈາກສາກົນ ແລະສາມາດເຂົ້າເຖິງຕະຫຼາດທີ່ມີກຳລັງການຊື້ມະຫາສານ ແລະມີຜູ້ບໍລິໂພກຂະໜາດໃຫຍ່ຕິດອັນດັບຕົ້ນໆຂອງໂລກ, ປະຈຸບັນສະພາການຄ້າ ແລະອຸດສາຫະກຳແຫ່ງຊາດລາວຈິ່ງກຳລັງສຶກສາຄົ້ນຄວ້າຫາຫຼາຍ ຂະແໜງການທີ່ສາມາດເຈາະຕະ ຫຼາດ ແລະສິນຄ້າທີ່ມີຜູ້ຊື້ຕ້ອງການຊື້ສິນຄ້າ ໂດຍອີງໃສ່ຄວາມຕ້ອງການຂອງຕະຫຼາດ ແລະທ່າແຮງໃນການສົ່ງອອກສິນຄ້າຂອງລາວຊຶ່ງຈຸດເດັ່ນແມ່ນຂະແໜງ ກະສິກຳປະກອບມີ ກາເຟ, ຊາ ແລະເຂົ້າໄກ່ນ້ອຍ, ຂະແໜງຫັດຖະກຳມີຜ້າໄໝລາວ, ດັ່ງນັ້ນ, ຈິ່ງເປັນໂອກາດໃຫ້ແກ່ຜູ້ປະກອບ ການຂອງລາວໃນການສົ່ງອອກສິນຄ້າໄປ ສປ ຈີນ ໂດຍນຳໃຊ້ສິດທິພິເສດທາງການຄ້າໃນຂອບສັນຍາຕ່າງໆທີ່ ລາວ ກັບຈີນ ເປັນພາຄີໃຫ້ຫຼາຍເທົ່າທີ່ຈະຫຼາຍໄດ້, ເພາະສິດທິພິເສດທາງດ້ານການຄ້າທີ່ລາວໄດ້ຮັບຈາກຈີນກໍເປັນ ປັດໄຈອັນສຳຄັນທີ່ຈະກະຕຸ້ນໃຫ້ ມີການສົ່ງອອກຫຼາຍຂຶ້ນ ແລະດຶງດູດເອົານັກທຸລະກິດຈາກຕ່າງປະເທດເຂົ້າມາລົງທຶນໃນ ສປປ ລາວ ໃຫ້ຫຼາຍຂຶ້ນ.

แชร์