ຝົນນີ້ຄຳມ່ວນຈະປູກເຂົ້າ 84,6 ພັນເຮັກຕາ

  ແຂວງຄໍາມ່ວນພາຍຫຼັງທີ່ໄດ້ເກັບກ່ຽວເຂົ້ານາແຊງສໍາເລັດແລ້ວມາຮອດປະຈຸບັນທາງພາກວິຊາການກໍ່ຄືຊາວນາໃນທົ່ວແຂວງໄດ້ພ້ອມກັນກະກຽມເຂົ້າສູ່ລະດູການຜະລິດເຂົ້ານາປີຊຶ່ງຕາມແຜນຂອງແຂວງກໍ່ຄືພະແນກກະສິກໍາ-ປ່າໄມ້ແຂວງແມ່ນມີແຜນການສູ້ຊົນໃນເນື້ອທີ່ທັງໝົດ 84.650 ເຮັກຕາ ທ່ານ ບຸນຈັນ ໄຊປັນຍາ ຫົວໜ້າພະແນກກະສິກໍາ ແລະປ່າໄມ້ແຂວງຄໍາມ່ວນ ໄດ້ກ່າວວ່າ: ການຜະລິດແມ່ນຈະແບ່ງເປັນ 2 ພາກສ່ວນຄື: ເນື້ອທີ່ຜະລິດເພື່ອຄໍ້າປະກັນສະບຽງອາຫານແມ່ນສູ້ຊົນໃຫ້ໄດ້ 64,2 ພັນເຮັກຕາ ແລະຜະລິດເພື່ອເປັນສິນຄ້າແມ່ນສູ້ຊົນໃຫ້ໄດ້ 20,3 ພັນເຮັກຕາ.

 ກະກຽມລົງສູ່ການຜະລິດຂອງຊາວນາ ຫຼືຊາວກະສິກອນໃນທົ່ວແຂວງມາຮອດປະຈຸບັນນີ້ໂດຍສະເພາະແມ່ນການກຽມດິນໂດຍລວມແລ້ວພາຍໃນແຂວງແມ່ນນໍາໃຊ້ກົນຈັກເປັນສ່ວນຫຼາຍມາຮອດປະຈຸບັນແມ່ນປະຕິບັດໄດ້ແລ້ວ 30% ເປັນຕົ້ນແມ່ນການໄຖຮຸດ, ສ່ວນການກະກຽມດ້ານແນວພັນໂດຍລວມແມ່ນສາ ມາດກຸ້ມຕົນເອງໄດ້ໂດຍສະເພາະແມ່ນແນວພັນການຊ່ວຍເຫຼືອລ້າຈາກອົງການຕ່າງໆ ຊຶ່ງພາຍຫຼັງນໍ້າແຫ້ງຫຼຸດລົງຈາກນໍ້າຖ້ວມໃນປີ 2018 ທີ່ຜ່ານມາໂດຍໄດ້ຈັດຊື້ແນວພັນລຸ້ນ 2 ແລະ ລຸ້ນ 2 ມາໃຫ້.

  ສໍາລັບປີນີ້ການຜະລິດເຂົ້ານາແຊງໃນທົ່ວແຂວງບັນລຸໄດ້ 56 ພັນກວ່າໂຕນ ໃນນັ້ນໄດ້ຜະລິດເປັນແນວພັນເພື່ອແກ້ໄຂຜູ້ທີ່ໄດ້ຮັບຜົນກະທົບຈາກປີຜ່ານມາ ຫຼື ສາມາດຂາຍຄືນໃຫ້ແກ່ອົງການຊ່ວຍເຫຼືອໄດ້ໃນຈໍານວນ 10% ຂອງປະລິມານຜົນຜະລິດເຂົ້ານາແຊງໃນທົ່ວແຂວງ.ຖ້າທຽບໃສ່ຄວາມຕ້ອງການດ້ານແນວພັນໃນເນື້ອທີ່ 84,6 ພັນເຮັກຕາ ແມ່ນສາມາດສະໜອງແນວພັນໄດ້, ດ້ານການຕົກກ້າຂອງຊາວກະສິກອນແມ່ນປະຕິບັດໄດ້ 10 % ຂອງແຜນການທົ່ວແຂວງ.

  ສ່ວນວ່າການນໍາໃຊ້ຝຸ່ນລົງສູ່ການຜະລິດໂດຍສະເພາະຝຸ່ນວິທະຍາສາດ ແລະ ຝຸ່ນອົງຄະທາດມາຮອດປະຈຸບັນປະຊາຊົນແມ່ນໄດ້ເອົາໃຈໃສ່ຢ່າງເປັນຂະບວນ   ເປັນຕົ້ນແມ່ນການເອົາຝຸ່ນຄອກລົງໃສ່ນາແມ່ນປະຕິບັດໄດ້ເຖິງ 800 ໂຕນ. ສໍາລັບຝຸ່ນວິທະຍາສາດທາງພະແນກະສິກໍາ ແລະ ປ່າໄມ້ແຂວງກໍ່ໄດ້ມີການຄຸ້ມ ຄອງໂດຍໃນປະຈຸບັນແມ່ນໄດ້ອະນຸຍາດນໍາເຂົ້າແລ້ວປະມານ 2 - 5 ພັນໂຕນ ເຊິ່ງຊາວກະສິກອນໃນທົ່ວແຂວງໄດ້ມີການຮຽນຮູ້ລະບົບການນໍາໃຊ້ນັບທັງຝຸ່ນຄອກ ແລະຝຸ່ນວິທະຍາສາດແຕ່ເພື່ອຫຼຸດຜ່ອນຕົ້ນທຶນການຜະລິດປະຊາຊົນໄດ້ຫັນມານໍາໃຊ້ຝຸ່ນຄອກຫຼາຍຂຶ້ນເຮັດໃຫ້ການນໍາໃຊ້ຝຸ່ນວິທະຍາສາດຫຼຸດລົງປະຈຸ ບັນແມ່ນນໍາໃຊ້ພຽງ 10% ຂອງເນື້ອທີ່ທັງໝົດ . ເມື່ອມາສົມທົບເນື້ອທີ່ແຜນການຜະລິດເຂົ້ານາປີລະຫວ່າງປີນີ້ກັບປີກ່ອນເຫັນວ່າເນື້ອທີ່ແຜນການປີນີ້ເພີ່ມຂຶ້ນ 1.250 ເຮັກຕາ .

  ທ່ານ ບຸນຈັນ ໄຊປັນຍາ ໄດ້ກ່າວຕື່ມວ່າ: ຖ້າເນື້ອທີ່ແຜນການທີ່ວາງໄວ້ໃນປີນີ້ຫາກບໍ່ຖືກຄຸກຄາມຈາກໄພທໍາມະຊາດແມ່ນຈະບັນລຸຕາມເນື້ອທີ່ແຜນການ  ແຕ່ເຖິງຢ່າງໃດກໍ່ຕາມທາງພະແນກກະສິກໍາ ແລະ ປ່າໄມ້ແຂວງກໍ່ໄດ້ມີການກຽມພ້ອມເພື່ອຮອງຮັບໄພທໍາມະຊາດທີ່ອາດຈະເກີດຂຶ້ນເປັນຕົ້ນແມ່ນໄພແຫ້ງ ແລ້ງໂດຍພວກເຮົາໄດ້ມີໂຄງການຊົນລະປະທານເພື່ອກຽມຮອງຮັບເຊິ່ງໂຄງການດັ່ງກ່າວແມ່ນໄດ້ຮັບການຊ່ວຍເຫຼືອຈາກຕ່າງປະເທດເພື່ອສ້ອມແປງລະບົບຄອງເໝືອງທີ່ເປ້ເພໃນລະດູຝົນຂອງປີຜ່ານມາບວກກັບທຶນພາຍໃນປະເທດ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์