ເຄແອນບີເຟີນິເຈີ ປູກໄມ້ 5 ຮ້ອຍກວ່າຕົ້ນໃນວັນປູກຕົ້ນໄມ້ແຫ່ງຊາດ

 ວັນທີ 30 ພຶດສະພາຜ່ານມາໂຮງງານເຄແອນບີເຟີນິເຈີໄດ້ຈັດພິທີສະເຫຼີມສະຫຼອງວັນປູກຕົ້ນໄມ້ແຫ່ງຊາດ ແລະວັນເດັກນ້ອຍສາກົນ 1 ມິຖຸນາ 2019 ຊຶ່ງໄດ້ນຳເອົາເບ້ຍໄມ້ 500 ກວ່າຕົ້ນມາປູກທີ່ບ້ານບໍ່ນາງົວເມືອງຈັນທະ ບູລີນະຄອນຫຼວງວຽງຈັນໂດຍເຂົ້າຮ່ວມມີ ທ່ານ ສົມຫວັງ ເທບພະສຸວັນ ນາຍບ້ານບໍ່ນາງົວ, ທ່ານ ກອງມາລາ ພົມມາໄລ ເຈົ້າຂອງໂຮງງານເຄແອນບີເຟີນິເຈີ, ພ້ອມດ້ວຍພະນັກງານ ແລະນ້ອງນ້ອຍນັກຮຽນເຂົ້າຮ່ວມ.

  ທ່ານ ກອງມາລາ ພົມມາໄລ ກ່າວ່າ: ໂຮງງານເຄແອນບີເຟີນິເຈີ ໄດ້ສ້າງຕັ້ງຂຶ້ນປະມານ 30 ກວ່າປີຜ່ານມາ (1987) ເບື້ອງຕົ້ນເປັນໂຮງງານນ້ອຍໆປະ ກອບ ດ້ວຍນາຍຊ່າງພຽງແຕ່ 2 ຄົນ ກໍາມະກອນ 3 ຄົນ ແລະເຄື່ອງມືປະກອບດ້ວຍໂຕະຊອຍ 2 ແຮງມ້າ 2 ໂຕ, ກົບໄຟຟ້າ 3-4 ໜ່ວຍ ຕໍ່ຈາກນັ້ນເປັນຕົ້ນມາໂຮງງານຈິ່ງຄ່ອຍໆເຕີບໃຫຍ່ຂຶ້ນມາເລື້ອຍໆ ຈົນສາມາດສ້າງວຽກເຮັດງານທຳໃຫ້ກັບປະຊາຊົນນັບ 100 ຊີວິດ ສ່ວນການຈຳໜ່າຍກໍຄ່ອຍໆເພີ່ມຂຶ້ນຕາມໆກັນຈົນກາຍເປັນທີ່ຮັບຮູ້ຢ່າງກວ້າງຂວາງຂອງລູກຄ້າຄົນລາວ ແລະຕ່າງຊາດໃນປະຈຸບັນ.

  ສຳລັບການປູກຕົ້ນໄມ້ໃນມື້ນີ້ແມ່ນເປັນສ່ວນປະກອບໜຶ່ງສ້າງຂະບວນການສະເຫຼີມສະຫຼອງວັນຕົ້ນໄມ້ແຫ່ງຊາດ ແລະວັນເດັກນ້ອຍສາກົນປະຈຳປີ 2019 ໃນຂອບເຂດທົ່ວປະເທດໃຫ້ມີບັນຍາກາດຄຶກຄື້ນມ່ວນຊື່ນທັງເປັນການຈັດຕັ້ງປະຕິບັດນະໂຍບາຍ 6 ສ ໂດຍສະເພາະແມ່ນ ສ ສີຂຽວ ຂອງນະຄອນຫຼວງ ວຽງ ຈັນ ໃຫ້ປາກົດຜົນເປັນຈິງໂດຍໄວເຮັດໃຫ້ວຽງຈັນເມືອງເອກຂອງປະເທດມີອາກາດບໍລິສຸດສົດຊື່ນຢູ່ສະເໝີແນໃສ່ປະກອບສ່ວນເພີ່ມເນື້ອທີ່ການປົກຫຸ້ມພື້ນທີ່ສີຂຽວຂອງປ່າໄມ້ໃນລາວໃຫ້ໄດ້ 70% ພາຍໃນປີ 2020 ຕາມທີ່ພັກ ແລະ ລັດໄດ້ຄາດໝາຍໄວ້.

  ໂດຍເບ້ຍໄມ້ທີ່ໂຮງງານນຳມາປູກໃນຄັ້ງນີ້ລວມມີທັງໝົດ 500 ກວ່າຕົ້ນ ປະກອບດ້ວຍໄມ້ເສດຖະກິດເປັນຕົ້ນແມ່ນໄມ້ດູ່, ໄມ້ແຕ້ຄ່າ, ໄມ້ຂະຍູງນອກຈາກນີ້ກໍມີເບ້ຍໄມ້ກິນໝາກ ແລະໄມ້ປະດັບຕ່າງໆມາປູກທີ່ສວນຂອງໂຮງງານເອງໃນເນື້ອ ທີ່ 3 ກວ່າເຮັກຕາ ຢູ່ບ້ານບໍ່ນາງົວ ເມືອງຈັນທະບູລີ ນະຄອນຫຼວງວຽງຈັນ.

  ດັ່ງທີ່ທ່ານຮັບຮູ້ນຳກັນແລ້ວວ່າການປູກໄມ້ໃຫ້ເປັນປ່ານອກຈາກຈະເພີ່ມເນື້ອທີ່ການປົກຫຸ້ມຂອງພື້ນທີ່ສີຂຽວຂອງປ່າໄມ້ແລ້ວຍັງເປັນການຄືນຄວາມສົມດູນໃຫ້ກັບທຳມະຊາດ, ສິ່ງແວດລ້ອມ ແລະຊີວະນາໆພັນທັງນີ້ຮຽກຮ້ອງມາຍັງພະນັກງານ, ທະຫານ, ຕໍາຫຼວດ,ນັກຮຽນນັກສຶກສາ ແລະປະຊາຊົນລາວບັນດາເຜົ່າຈົ່ງພ້ອມກັນຮ່ວມແຮງຮ່ວມໃຈປູກຕົ້ນໄມ້ຄົນລະ 1 ຕົ້ນ, 2 ຕົ້ນ ຫຼື ຫຼາຍກວ່ານັ້ນຍິ່ງເປັນການດີ ແລະກໍ່ບໍ່ຄວນປູກໄມ້ພຽງເປັນພິທີການເມື່ອມີການປູກ ແລ້ວກໍຕ້ອງໄດ້ມີການເອົາໃຈໃສ່ບົວລະບັດຮັກສາໃຫ້ດີ ແລະພ້ອມກັນປົກປັກຮັກສາປ່າໄມ້ທີ່ມີຢູ່ກໍ່ຄືແຫຼ່ງນໍ້າ, ທໍາມະຊາດທີ່ອຸດົມສົມບູນ, ສະພາບແວດລ້ອມ ທີ່ດີທຸກຄົນ, ທຸກພາກສ່ວນຈະໄດ້ຊ່ວຍກັນປົກປັກຮັກສາເບີ່ງແຍງເພື່ອບໍ່ໃຫ້ປ່າໄມ້ຕ້ອງຖືກບຸກລຸກ ແລະທໍາລາຍແບບຊະຊາຍອີກ.

  ເນື່ອງວັນປູກຕົ້ນໄມ້ແຫ່ງ ແລະວັນເດັກ ນ້ອຍສາກົນ 2019 ຂ້າພະເຈົ້າຂໍອວຍພອນໄຊແດ່ທ່ານຜູ້ນຳພັກ-ລັດ ຈິ່ງມີແຕ່ຄວາມຜາສຸກ ແລະມີຜົນສຳເລັດ ໃນໜ້າທີ່ອັນມີກຽດຂອງທ່ານສືບຕໍ່ເປັນຮົ່ມໂພຮົ່ມໄຊໃຫ້ປະຊາຊົນໄດ້ຢູ່ເຢັນເປັນສຸກນຳພາປະເທດຊາດ ແລະປະຊາຊົນກ້າວໄປສູ່ຄວາມມັ່ງຄັ່ງເຂັ້ມແຂງ ແລະວັດທະນາຖາວອນ. ອວຍພອນໃຫ້ເດັກນ້ອຍເຍົາວະຊົນທຸກໆຄົນທີ່ເປັນລູກເປັນຫຼານ ແລະເປັນອະນາຄົດຂອງຊາດຈົ່ງມີສຸຂະພາບເຂັ້ມແຂງ ແລະຕັ້ງໜ້າຝຶກຝົນຫຼໍ່ຫຼອມຕົນເອງໃຫ້ກາຍເປັນຜູ້ໃຫຍ່ທີ່ມີຄວາມຮູ້, ຄວາມສາມາດ, ມີຄວາມຮັບຜິດຊອບປະກອບສ່ວນໃນການພັດທະນາປະເທດຊາດໃນອະນາຄົດ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์