ໂທລະພາບ ລາວ-ຈີນ ຮ່ວມມືສ້າງຊ່ອງໂທລະພາບ ດິຈິຕອນ

  ສະຖານີໂທລະພາບແຫ່ງຊາດລາວ ໄດ້ຮ່ວມມືກັບກຸ່ມບໍລິສັດວິທະຍຸ-ໂທລະພາບ ແຂວງຢຸນນານ ຈຳກັດ ສປ ຈີນ ສ້າງຊ່ອງໂທລະພາບດິຈິຕອນລາວຜ່ານ ລະບົບ LD TV.

ພິທີເຊັນບົດບັນທຶກການຮ່ວມມືດັ່ງກ່າວຈັດຂຶ້ນໃນວັນທີ 28 ພຶດສະພາ 2019 ທີ່ນະຄອນຫຼວງວຽງຈັນ ລະຫວ່າງ ທ່ານ ບຸນເຈົ້າ ພິຈິດ ຜູ້ອຳນວຍການໃຫຍ່ໂທລະພາບແຫ່ງຊາດລາວ ແລະ ທ່ານ ເຫີຍ ຢ່າ ນິ໋ງ ປະທານກຸ່ມບໍລິສັດວິທະຍຸ-ໂທລະພາບ ແຂວງຢຸນນານຈຳກັດ ໂດຍມີທ່ານ ບໍ່ແສງຄຳ ວົງດາລາ ລັດຖະ ມົນຕີກະຊວງຖະແຫຼງຂ່າວວັດທະນະທຳ ແລະ ທ່ອງທ່ຽວພ້ອມດ້ວຍພາກສ່ວນກ່ຽວຂ້ອງຂອງສອງຝ່າຍເຂົ້າຮ່ວມເປັນສັກຂີພິຍານ.

  ທ່ານ ບຸນເຈົ້າ ພິຈິດ ໃຫ້ຮູ້ວ່າ: ການຮ່ວມມືກັນຄັ້ງນີ້, ແມ່ນຈະເພີ່ມຊ່ອງເຂົ້າໃນລະບົບ LD TV  ຊຶ່ງຈະມີສອງພາສາຄື: ພາສາລາວ ແລະພາສາຈີນ ໂດຍປະກອບມີ: ລາຍການຂ່າວ, ລາຍການບັນເທິງ, ລະຄອນ, ຮູບເງົາຈີນ, ສາລະຄະດີ, ລາຍການທ່ອງທ່ຽວ, ວັດທະນະທຳ, ລາຍການອາຫານ ແລະອື່ນໆ, ທັງນີ້ ກໍເພື່ອແນໃສ່ໂຄສະນາແນວທາງນະໂຍບາຍຂອງພັກ, ລັດທັງເປັນການແລກປ່ຽນວັດທະນະທຳ, ແລກປ່ຽນທາງຂໍ້ມູນຂ່າວສານຕ່າງໆຂອງສອງປະເທດໃຫ້ ເຂົ້າສູ່ລ່ວງເລິກ ແລະເປັນຮູບປະທຳ.

  ຜູ້ອວຍການໃຫຍ່ໂທລະພາບແຫ່ງຊາດລາວ ໃຫ້ຮູ້ອີກວ່າ: ປະຈຸບັນແມ່ນຢູ່ໃນຊ່ວງຂອງການທົດລອງອອກອາກາດຊຶ່ງໄດ້ນຳເອົາຂ່າວ, ສາລະຄະດີຂອງລາວ ແລະຮູບເງົາຈີນຈຳນວນໜຶ່ງມາອອກອາກາດທົດລອງຄາດວ່າຈະອອກອາກາດທາງເປັນທາງການໃນໄວໆນີ້.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

• 31/05/2019