ນາຍົກລະບຸວຽກປົກປ້ອງ ແລະພັດທະນາເດັກມີຜົນສຳເລັດ ແຕ່ຍັງມີສິ່ງທ້າທາຍຫຼາຍດ້ານ

  ເຖິງແມ່ນວ່າຜ່ານມາວຽກງານປົກປ້ອງ ແລະພັດທະນາເດັກຈະມີຜົນສຳເລັດຫຼາຍດ້ານກໍຕາມແຕ່ຍັງປະເຊີນໜ້າກັບສິ່ງທ້າທາຍຫຼາຍປະການເຊັ່ນດຽວກັນ ໂດຍສະເພາະບັນຫາຄວາມທຸກຍາກຂາດເຂີນຂອງເດັກຕ່າງໆ, ບັນຫາຂາດໂພຊະນາການ, ພາວະເດັກຂາດສານອາຫານ, ອັດຕາການເຂົ້າຮຽນໃນພາກການສຶກສາກ່ອນໄວຮຽນ ແລະການສຶກສາພາກບັງຄັບ, ການນຳໃຊ້ສື່ສັງຄົມອອນລາຍຂອງເດັກ, ບັນຫາຢາເສບຕິດ ແລະບັນຫາອື່ນໆຍັງເປັນໄພຄຸກຄາມ ແລະຈຳກັດການພັດທະນາຂອງເດັກ.

  ໃນບາງເນື້ອໃນຂອງສານ ທ່ານ ທອງລຸນ ສີສຸລິດ ນາຍົກລັດຖະມົນຕີເນື່ອງໃນໂອກາດວັນເດັກສາກົນວັນທີ 1 ມິຖຸນາ 2019 ລະບຸວ່າ: ພັກ ແລະ ລັດຖະ ບານຍາມໃດກໍ່ຖືເອົາວຽກງານປົກປ້ອງ ແລະພັດທະນາເດັກເປັນວຽກງານທີ່ສຳຄັນເພາະເດັກເປັນອະນາຄົດຂອງຊາດຊຶ່ງເດັກໃນມື້ນີ້ຈະກາຍເປັນຜູ້ໃຫຍ່ໃນມື້ໜ້າ ແລະຈະເປັນຜູ້ຕັດສິນສະຕາຕໍ່ປະເທດຊາດກໍ່ຄືຄວາມຢູ່ດີກິນດີ ແລະຄວາມຮັ່ງມີຜາສຸກຂອງປະຊາຊົນກໍ່ຄືຄວາມຈະເລີນຮຸ່ງເຮືອງຂອງບ້ານເມືອງ.

  ຜ່ານການຈັດຕັ້ງປະຕິບັດວຽກງານປົກປ້ອງ ແລະພັດທະນາເດັກພວກເຮົາມີຄວາມພາກພູມໃຈທີ່ເຫັນວ່າສາມາດບັນລຸຜົນສຳເລັດຫຼາຍດ້ານເປັນຕົ້ນແມ່ນການປົກປ້ອງສິດທິເດັກ,ການສະກັດກັ້ນ ແລະປາບປາມການຄ້າຂາຍເດັກ ແລະຄ້າປະເວນີເດັກ, ການແກ້ໄຂບັນຫາສິ່ງລາມົກອານາຈານກ່ຽວກັບເດັກ, ການ ປ້ອງກັນ, ຕ້ານ ແລະແກ້ໄຂບັນຫາການໃຊ້ຄວາມຮຸນແຮງຕໍ່ເດັກ, ການສົ່ງເສີມພັດທະນາເດັກ ແລະວຽກງານອື່ນໆ ທີ່ຕິດພັນກັບການປະຕິບັດພັນທະ ແລະ ສົນທິສັນຍາສາກົນກ່ຽວກັບເດັກ, ດ້ວຍເຫດຜົນນີ້ ສປປ ລາວ ຈິ່ງຖືກຍອມຮັບວ່າເປັນປະເທດໜຶ່ງທີ່ມີຄວາມຄືບໜ້າດີໃນວຽກງານປົກປ້ອງ, ສົ່ງເສີມສິດ ແລະ ຜົນປະໂຫຍດຂອງເດັກລາວບັນດາເຜົ່າກໍ່ຄືການລົບລ້າງທຸກຮູບແບບການຈຳແນກ ແລະ ການໃຊ້ຄວາມຮຸນແຮງຕໍ່ເດັກ, ການມີສ່ວນຮ່ວມຂອງເດັກ ແລະສ້າງໂອກາດໃຫ້ເດັກໄດ້ຮັບການພັດທະນາ ແລະເຕີບໃຫຍ່ຢ່າງມີຄຸນນະພາບໃນສັງຄົມ.

  ຢ່າງໃດກໍຕາມເຖິງແມ່ນວ່າວຽກງານປົກປ້ອງ ແລະພັດທະນາເດັກຈະມີຜົນສຳເລັດຫຼາຍດ້ານກໍຕາມໃນສານຂອງທ່ານນາຍົກລະບຸຕື່ມວ່າ ແຕ່ພວກເຮົາຍັງປະເຊີນໜ້າກັບສິ່ງທ້າທາຍຫຼາຍດ້ານໂດຍສະເພາະບັນຫາຄວາມທຸກຍາກຂາດເຂີນຂອງເດັກຕ່າງໆ, ບັນຫາຂາດໂພຊະນາການ, ພາວະເດັກຂາດສານອາຫານ, ອັດຕາການເຂົ້າຮຽນໃນພາກການສຶກສາກ່ອນໄວຮຽນ ແລະ ການສຶກສາພາກບັງຄັບ, ການນຳໃຊ້ສື່ສັງຄົມອອນລາຍຂອງເດັກ, ບັນຫາຢາເສບຕິດ ແລະບັນຫາອື່ນໆ ຍັງເປັນໄພຄຸກຄາມ ແລະຈຳກັດການພັດທະນາຂອງເດັກ.

ນອກຈາກນັ້ນ, ຄວາມຮັບຮູ້ ແລະ ຄວາມເຂົ້າໃຈໃນສັງຄົມ ແລະໃນບາງຊົນເຜົ່າໂດຍສະເພາະແມ່ນໃນເຂດທຸກຍາກ, ຫ່າງໄກສອກຫຼີກຍັງຍຶດຖືທັດສະນະຄະຕິແບບຄອງເດີມ ແລະປ່ຽນແປງໄດ້ຊ້າບັນຫາເຫຼົ່ານີ້ຈະຕ້ອງຮ່ວມແຮງຮ່ວມໃຈກັນແກ້ໄຂໃຫ້ນັບມື້ນັບຫຼຸດລົງໄປໃນອະນາຄົດ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

• 31/05/2019