5 ເດືອນດ່ານມິດຕະພາບ 4 ເກັບລາຍຮັບໄດ້ 35,02% ຂອງແຜນປີ

 ດ່ານພາສີສາກົນຂົວມິດຕະພາບ IV ຫ້ວຍຊາຍແຂວງບໍ່ແກ້ວ ສປປ ລາວ-ອຳເພີຊຽງຂອງຈັງຫວັດຊຽງລາຍ ປະເທດໄທໂດຍມີດ່ານສາກົນ, ດ່ານທ້ອງຖິ່ນ, ດ່ານປະເພນີຂຶ້ນກັບ, ກອງຄຸ້ມຄອງພາສີ I (ແຂວງຫຼວງນໍ້າທາ-ແຂວງບໍ່ແກ້ວ) ໃນ 5 ເດືອນປີ 2019 ສາມາດປະຕິບັດລາຍຮັບໄດ້ທັງໝົດ 72,4 ຕື້ກີບ ເທົ່າກັບ 35,02% ຂອງແຜນການປີ,ຖ້າທຽບໃສ່ປີກ່ອນເພີ່ມຂຶ້ນ,ສ່ວນໃຫຍ່ລາຍຮັບໄດ້ມາຈາກນໍ້າມັນເຊື້ອໄຟກວມເອົາ 70%, ຄ່າທໍານຽມພາຫະນະ, ຄ່າທໍານຽມຄົນເຂົ້າ-ອອກຜ່ານດ່ານ, ເຄື່ອງວັດສະດຸກໍ່ສ້າງ, ເຄື່ອງອຸປະໂພກບໍລິໂພກ, ຄັງເງິນແຮ່ນໍ້າມັນແລະສິນຄ້າອື່ນໆ.

  ທ່ານ ຄໍາຜາຍ ຈັນນີຍາວົງ ຫົວໜ້າດ່ານພາສີສາກົນຂົວມິດຕະພາບ IV ໃຫ້ສໍາພາດວ່າ: ດ່ານພາສີສາກົນຂົວມິດຕະພາບ IV ມີພະນັກງານ-ເຈົ້າໜ້າທີ່ພາ ສີທັງໝົດ 29 ສະຫາຍ, ຍິງ 10 ສະຫາຍພະນັກງານຊ່ວຍວຽກ, ປະກອບມີ 3 ໜ່ວຍງານ ແລະ ມີດ່ານພາສີສາກົນບ້ານມອມ, ດ່ານພາສີສາກົນສາມຫຼ່ຽມຄໍາ, ດ່ານພາສີທ້ອງຖິ່ນຕົ້ນເຜີ້ງ, ດ່ານພາສີປະເພນີນໍ້າເກິ່ງ, ດ່ານພາສີທ້ອງຖິ່ນຫ້ວຍຊາຍ, ດ່ານພາສີປະເພນີບ້ານດ່ານ, ດ່ານພາສີປະເພນີປາກທາຂຶ້ນກັບ.

  ໃນປີ 2019 ໄດ້ຮັບຕົວເລກແຜນການໃຫ້ຈັດເກັບລາຍຮັບເຂົ້າງົບປະມານແຫ່ງລັດຈໍານວນທັງໝົດ 207 ຕື້ືກວ່າກີບ ແລະໄດ້ແບ່ງໃຫ້ແຕ່ລະດ່ານຈັດຕັ້ງປະຕິບັດດ່ານພາສີສາກົນຂົວມິດຕະພາບ IV ຈໍານວນ 185 ຕື້ກີບ, ດ່ານພາສີສາກົນບ້ານມອມ 2 ຕື້ກີບ, ດ່ານພາສີສາກົນສາມຫຼ່ຽມຄໍາ 7 ຕື້ກີບ, ດ່ານພາສີທ້ອງຖິ່ນຕົ້ນເຜີ້ງ1,5 ຕື້ກີບ, ດ່ານພາສີປະເພນີນໍ້າເກິ່ງ 200 ລ້ານກີບ, ດ່ານພາສີທ້ອງຖິ່ນຫ້ວຍຊາຍ 10 ຕື້ກີບ, ດ່ານພາສີປະເພນີບ້ານດ່ານ ແລະປາກທາຈໍານວນ 1,3 ຕື້ກີບ.

ທ່ານ ຄໍາຜາຍ ຈັນນີຍາວົງ ຫົວໜ້າດ່ານພາສີສາກົນຂົວມິດຕະພາບ IV ເນັ້ນຕື່ມອີກວ່າ: ດ້ວຍຄວາມເອົາໃຈໃສ່ຈາກຄະນະພັກຄະນະນຳທຸກຂັ້ນໂດຍສະເພາະ ຄະນະກອງຄຸ້ມພາສີ I, ຄະນະດ່ານ, ພະນັກງານເຈົ້າໜ້າທີ່ພາສີໝົດທຸກຄົນມີຄວາມຮັບຜິດຊອບສູງໂດຍຜ່ານການຈັດເກັບລາຍຮັບເຂົ້າງົບປະມານແຫ່ງລັດ, ມາຮອດວັນທີ 23 ພຶດສະພາ 2019, ສາມາດປະຕິບັດລາຍຮັບໄດ້ທັງໝົດ 72,4 ຕື້ກວ່າກີບ ຖ້າທຽບໃສ່ແຜນການປີເທົ່າກັບ 35,02% ຂອງແຜນການປີ, ທຽບໃສ່ໄລຍະດຽວກັນຂອງປີຜ່ານມາ (2018) ເຫັນວ່າມີທ່າອ່ຽງເພີ່ມຂຶ້ນ, ຊຶ່ງລາຍຮັບສ່ວນໃຫຍ່ມາຈາກນໍ້າມັນເຊື້ອໄຟກວມເອົາ 70% ຂອງລາຍຮັບທັງໝົດ, ຄ່າທໍານຽມພາຫະນະ, ຄ່າທໍານຽມຄົນເຂົ້າ-ອອກຜ່ານດ່ານ, ເຄື່ອງວັດສະດຸກໍ່ສ້າງ, ເຄື່ອງອຸປະໂພກບໍລິໂພກ, ຄ່າບໍລິການຜ່ານແດນສາກົນ,ຄັງເງິນແຮ່ນໍ້າມັນ ແລະ ສິນຄ້າປະເພດອື່ນໆ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์