ເຊໂປນ ມອບອຸປະກອນຕ້ອງຫ້າມໃຫ້ແຂວງສະຫວັນນະເຂດ

  ປກສ ເມືອງເຊໂປນ ແຂວງສະຫວັນນະເຂດ ໄດ້ມອບອາວຸດລ່າເນື້ອ ແລະວັດຖຸອຸປະກອນຕ້ອງຫ້າມທີ່ຍຶດໄດ້ຈາກປະຊາຊົນໃນການດຳລົງຊີວິດທີ່ບໍ່ຖືກຕ້ອງຕາມລະບຽບກົດໝາຍໃຫ້ ປກສ ແຂວງສະຫວັນນະເຂດ ເພື່ອປະຕິບັດຕາມຄຳສັ່ງເລກທີ 27/ນຍ ຂອງນາຍົກລັດຖະມົນຕີວ່າດ້ວຍການເພີ່ມທະວີວຽກງານສະກັດກັ້ນ ແລະແກ້ໄຂປະກົດການຫຍໍ້ທໍ້ໃນສັງຄົມ.

  ພິທີມອບ-ຮັບໄດ້ຈັດຂຶ້ນວັນທີ 24 ພຶດສະພາ 2019 ທີ່ຫ້ອງກອງບັນຊາການ ປກສ ເມືອງເຊໂປນ ໃຫ້ກຽດເຂົ້າຂອງທ່ານ ວົງໄຊ ໄຊຍະຈັກ ເຈົ້າເມືອງໆເຊ ໂປນ, ທ່ານ ພັທ ຕອງໄທ ຈັນແພງວົງ ຮອງຫົວໜ້າຄຸ້ມຄອງສໍາມະໂນຄົວ ປກສ ແຂວງສະຫວັນນະເຂດ ມີບັນດາທ່ານຫົວໜ້າກອງບັນຊາການ, ຫົວໜ້າພະ ແນກຄຸ້ມຄອງສຳມະໂນຄົວ 4 ເມືອງເຂົ້າຮ່ວມ.

  ທ່ານ ພັທ ຕອງໄທ ຈັນແພງວົງ ໄດ້ກ່າວວ່າ: ເພື່ອປະຕິບັດວຽກງານສະກັດກັ້ນ ແລະແກ້ໄຂປະກົດການຫຍໍ້ທໍ້ໃນສັງຄົມຈິ່ງໄດ້ມີການເກັບກູ້ອາວຸດເສິກ, ອາ ວຸດລ່າເນື້ອ, ທາດລະເບີດທາດແຕກ, ມີດງ້າວ, ເຄືອງຊ໋ອດໄຟຟ້າ ແລະອຸປະກອນທີ່ຕ້ອງຫ້າມຈາກບັນດາປະຊາຊົນໃນການທຳມາຫາກິນດຳລົງຊີວິດທີ່ບໍ່ຖືກ ຕ້ອງຕາມລະບຽບກົດໝາຍ ແລະຜູ້ທີ່ມີອາວຸດຄອບຄອງໂດຍບໍ່ໄດ້ຮັບອະນຸຍາດພ້ອມທັງຕັກເຕືອນ ແລະສຶກສາອົບຮົມດ້ານການເມືອງແນວຄິດໃຫ້ເຂົ້າໃຈເຖິງຜົນຮ້າຍຂອງການນຳໃຊ້ອາວຸດລ່າເນື້ອການນຳໃຊ້ສິນຄ້າທີ່ນຳເຂົ້າທີ່ບໍ່ຖືກຕ້ອງຕາມໄວຄອບຄອງ ສຳລັບອາວຸດລ່າເນື້ອ ແລະ ວັດຖຸອຸປະກອນຕ້ອງຫ້າມທີ່ມອບໃຫ້ ປກສ ແຂວງສະຫວັນນະເຂດຄັ້ງນີ້ທັງໝົດແມ່ນເກັບກູ້ໄດ້ມາຈາກ 4 ເມືອງຄື: ເມືອງນອງ, ເຊໂປນ,ວິລະບູລີ ແລະເມືອງພີນ ໃນນີ້ປືນແກັບ 399 ກະບອກ, ບັ້ງກະໂພກ 20 ກັບ, ເຄື່ອງຊ໋ອດປາ 1 ເຄື່ອງ ແລະຈັກສະຕິນ 1 ເຄືອງ.

ທ່ານ ວົງໄຊ ໄຊຍະຈັກ ກໍ່ໄດ້ຍ້ອງຍໍຊົມເຊີຍໃນການເອົາໃຈໃສ່ຂອງບັນດາຂະແໜງການທີ່ກ່ຽວຂ້ອງຂອງການຈັດຕັ້ງປະຕິບັດວຽກງານໃນໄລຍະທີຜ່ານມາ ແລະເນັ້ນໜັກໃຫ້ເອົາໃຈໃສ່ສຶກສາອົບຮົມທາງດ້ານການເມືອງແນວຄິດຕໍ່ກັບພໍ່ແມ່ປະຊາຊົນບັນດາເຜົ່າໃຫ້ເຂົ້າໃຈເຖິ່ງຜົນຮ້າຍຂອງການນຳໃຊ້ອາວຸດທີ່ບໍ່ຖືກຕ້ອງຕາມລະບຽບກົດໝາຍ, ທັງນີ້ກະເພື່ອແນ່ໃສ່ຮັບປະກັນໃນການປົກປັກຮັກສາອານຸລັກສັດນ້ຳ-ສັດປ່າຊີວະນາໆພັນ ແລະສິ່ງແວດລ້ອມໃຫ້ຢູ່ຍືນຍົງຕະຫຼອດໄປເອົາໃຈໃສ່ຕ້ານທີ່ເປັນອັນຕະລາຍຕໍ່ສັງຄົມຕໍ່ຄວາມບໍສະຫງົບຂອງຊາດຂອງພົນລະເມືອງຂອງແຕ່ລະບ້ານໃຫ້ຫຼຸດລົງເທື່ອລະກ້າວ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์