ປີນີ້ ລັດຈະປູກໄມ້ເພີ່ມພື້ນທີ່ປ່າໃຫ້ໄດ້ 10 ພັນເຮັກຕາ

  ແນໃສ່ເຮັດໃຫ້ຄາດໝາຍສູ້ຊົນແຕ່ນີ້ເຖິງປີ 2020 ເນື້ອທີ່ສີຂຽວຂອງ ປ່າໄມ້ປົກຫຸ້ມປ່າໄມ້ ໃຫ້ໄດ້ 70% ຂອງ ເນື້ອທີ່ທົ່ວປະເທດຕາມທິດການພັດທະນາ ແບບຍືນຍົງ ແລະການ ເຕີບໂຕສີຂຽວ ຂອງອົງການສະຫະປະຊາຊາດ ຫຼື ເທົ່າ ກັບ 16,5 ລ້ານເຮັກຕາ, ສະເພາະປີນີ້ກົມ ປ່າໄມ້ ກະຊວງກະສິກຳ ແລະປ່າໄມ້ (ກປ) ຈຶ່ງວາງແຜນການເພື່ອປູກໄມ້ ໃຫ້ເປັນປ່າໃຫ້ໄດ້ 10 ພັນເຮັກຕາ ໃນ ຂອບເຂດທົ່ວປະເທດ ແລະສຳລັບກິດ ຈະກຳປູກໄມ້ປີນີ້ ຢູ່ນະຄອນຫຼວງກະຊວງ ກປ ໄດ້ສົມທົບກັບກະຊວງຊັບພະຍາ ກອນທຳມະຊາດ ແລະ ສິ່ງແວດລ້ອມ ຮ່ວມກັບປູກຢູ່ສວນພຶດສາສາດຫ້ວຍ ຍາງ-ດົງໝາກຄາຍ ຈຳນວນ 5 ເຮັກຕາ.

  ທ່ານ ຊູຊາດ ໄຊຍະກຸມມານ ຫົວໜ້າ ກົມປ່າໄມ້ ກະຊວງກະສິກຳ ແລະປ່າໄມ້ ໃຫ້ສຳພາດຕໍ່ສື່ມວນຊົນ ໃນວັນທີ 28 ພຶດສະພາ 2019, ເນື່ອງໃນໂອກາດວັນປູກຕົ້ນໄມ້ແຫ່ງຊາດ,

  ວັນເດັກນ້ອຍສາກົນ ແລະວັນສິ່ງແວດລ້ອມແຫ່ງຊາດວ່າ: ລັດຖະບານໄດ້ມີຍຸດທະສາດປ່າໄມ້ໂດຍກຳນົດຄາດໝາຍສູ້ ຊົນໃນປີ 2020 ຈະຍົກລະດັບຄວາມປົກ ຫຸ້ມປ່າໄມ້ໃຫ້ໄດ້ 70% ຂອງເນື້ອທີ່ທົ່ວ ປະເທດຕາມທິດການພັດທະນາແບບຍືນ ຍົງ ແລະການເຕີບໂຕສີຂຽວຂອງອົງການສະຫະປະຊາຊາດ ຫຼື ເທົ່າກັບ 16,5 ລ້ານເຮັກຕາ, ໃນນັ້ນປ່າສະຫງວນ 4,7 ລ້ານເຮັກຕາ, ປ່າປ້ອງກັນ 8,2 ລ້ານເຮັກຕາ, ປ່າຜະລິດ 3,1 ລ້ານເຮັກຕາ, ຟື້ນຟູປ່າທຳມະຊາດ 6 ລ້ານເຮັກຕາ ແລະປ່າປູກ 5 ແສນເຮັກຕາ, ຊຶ່ງຜ່ານ ການສົ່ງເສີມທຸກພາກສ່ວນໃນສັງຄົມທີ່ ມີທ່າແຮງ ແລະເງື່ອນໄຂຕົວຈິງ ເຫັນວ່າ ມາຮອດປີ 2015 ມີເນື້ອ ທີ່ປົກຫຸ້ມໄດ້ 58%, ເນື້ອທີ່ປູກໄມ້ໄດ້ທັງໝົດ 4,86 ແສນເຮັກຕາເທົ່າກັບ 97% ຂອງແຜນການ ແລະຟື້ນຟູປ່າໄມ້ທຳມະຊາດໄດ້ຫຼາຍ ກວ່າ 3 ລ້ານເຮັກ ຕາເທົ່າກັບ 54% ຂອງ ແຜນການ.

  ດັ່ງນັ້ນ, ເພື່ອສ້າງຂະບວນການພ້ອມທັງປູກຈິດສຳນຶກໃຫ້ທົ່ວສັງຄົມ, ກະຊວງກະສິກຳ ແລະປ່າໄມ້ ໄດ້ສົມທົບກັບຄະ ນະພັກ, ອົງການປົກຄອງທ້ອງຖິ່ນທົ່ວປະ ເທດ ກະກຽມແຜນການ ແລະຂະບວນ ການປູກໄມ້ຢູ່ທ້ອງຖິ່ນຕົນເອງ ໃຫ້ເປັນຂະບວນຟົດຟື້ນ, ຊຶ່ງແຜນການທີ່ວາງໄວ້ ໃນປີນີ້ໂດຍສະເພາະແມ່ນວຽກເກັບແກ່ນ 60 ພັນກິໂລ, ວຽກກ້າເບ້ຍ 22,20 ລ້ານເບ້ຍ, ປູກໄມ້ 10 ພັນເຮັກຕາ ແລະວຽກຟື້ນຟູປ່າໄມ້ທຳມະຊາດ 5 ແສນກວ່າ ເຮັກຕາ.

 ໃນວັນທີ 1 ມິຖຸນາ ທີ່ຈະມາເຖິງນີ້, ກະຊວງໄດ້ຮ່ວມກັບກະຊວງຊັບພະຍາກອນທຳມະຊາດ ແລະສິ່ງແວດລ້ອມ ແລະ ນະຄອນຫຼວງວຽງຈັນ ຈະມີພິທີປູກຕົ້ນ ໄມ້ເປັນທາງການຂຶ້ນ ຢູ່ທີ່ສວນພຶດສາສາດ ຫ້ວຍຍາງ-ດົງໝາກຄາຍ ໃນເນື້ອທີ່ 5 ເຮັກຕາ ແລະຄາດວ່າພາຍໃນປີນີ້ຈະປູກໃຫ້ໄດ້ທັງໝົດ 50 ເຮັກຕາ ເພື່ອປະກອບ ສ່ວນຟື້ນຟູປ່າໄມ້ຢູ່ສວນດັ່ງກ່າວ ໃຫ້ມີ ຄວາມດົກໜາ ແລະອຸດົມສົມບູນໄປດ້ວຍຊະນິດພັນໄມ້ພື້ນເມືອງ ແລະພັນໄມ້ຕ່າງປະເທດນາໆຊະນິດແນໃສ່ເຮັດໃຫ້ສວນພຶດສາສາດແຫ່ງນີ້ກາຍເປັນສະຖານທີ່ສຶກສາຄົ້ນຄວ້າດ້ານປ່າໄມ້, ເປັນແຫຼ່ງແນວພັນໄມ້, ເປັນເຂດສຶກສານິເວດວິທະຍາ, ເປັນແຫຼ່ງທຳມະຊາດ ແລະເປັນ ບ່ອນພັກຜ່ອນຢ່ອນໃຈຂອງສັງຄົມໃນ ອະນາຄົດ.

  ທ່ານ ຊູຊາດ ໄຊຍະກຸມມານ ໃຫ້ຮູ້ ຕື່ມວ່າ: ມາຮອດປະຈຸບັນການກະກຽມ ເບ້ຍໄມ້ ເພື່ອສະໜອງໃຫ້ແກ່ການປູກໄມ້ປີ 2019 ນີ້, ເຫັນວ່າໃນຂອບເຂດທົ່ວປະ ເທດທີ່ສາມາດສັງລວມເນື້ອທີ່ປູກໄມ້ ໄດ້ 8,95 ພັນເຮັກຕາ, ໃນຈຳນວນ 18 ແຂວງ, ມີເບ້ຍໄມ້ 1,79 ລ້ານເບ້ຍ, ໂດຍເນັ້ນໃສ່ 2 ລັກສະນະ ເປັນຕົ້ນແມ່ນ ໃນພື້ນທີ່ສຳນັກງານຫ້ອງການ, ຕົວເມືອງ ແລະບ້ານແມ່ນເນັ້ນໃສ່ປູກໄມ້ປະດັບ ແລະໄມ້ໃຫ້ໝາກ, ສ່ວນເນື້ອທີ່ປູກໄມ້ເປັນສິນຄ້າແມ່ນເນັ້ນໃສ່ຊະນິດພັນໄມ້ພື້ນ ເມືອງ ແລະໄມ້ນຳເຂົ້າ ຕົ້ນນຕໍຄືໄມ້ວິກ, ໄມ້ກະຖິນເທພາ ແລະກະຖິນນາລົງ, ສະເພາະຢູ່ກົມປ່າໄມ້ແມ່ນໄດ້ກະກຽມ ເບ້ຍໄມ້ທັງໝົດ 1,25 ແສນເບ້ຍ ໂດຍ ເນັ້ນໃສ່ຊະນິດພັນໄມ້ພື້ນເມືອງ ຄື: ຂະຍຸງ, ໄມ້ດູ່ຄັ່ງ, ໄມ້ດູ່ລາຍ, ໄມ້ແຕ້ຂ່າ, ໄມ່ຄຳພີ, ໄມ້ກໍ່, ໄມ້ສັກ, ຫວາຍໂຕ່ນ, ຫວາຍແຍ້, ສ່ວນຊະນິດໄມ້ປະດັບແມ່ນໄມ້ຄູນອິນເດຍ ແລະໄມ້ໃຫ້ໝາກ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์