ລາວ-ຈີນ ຮ່ວມມືສ້າງທາງດ່ວນ ນວ ຫາຊາຍແດນດ່ານສາກົນບໍ່ເຕັນ-ບໍ່ຫານ

  ລັດຖະບານແຫ່ງ ສປປ ລາວ ຮ່ວມກັບກຸ່ມບໍລິສັດກໍ່ສ້າງ-ລົງທຶນ ແລະຖື ຮຸ້ນແຂວງຢຸນນານ ຈໍາກັດ ສປ ຈີນ ຮ່ວມ ມືພັດທະນາໂຄງການທາງດ່ວນຈາກນະຄອນຫຼວງວຽງຈັນ ຫາຊາຍແດນ ສປປ ລາວ ກັບ ສປ ຈີນ (ດ່ານສາກົນບໍ່ເຕັນ-ບໍ່ຫານ), ເຊິ່ງພາຍຫຼັງທີ່ການກໍ່ສ້າງສໍາເລັດການເດີນທາງຈາກນະຄອນ ຫຼວງວຽງຈັນ ຫາດ່ານບໍ່ເຕັນໃຊ້ເວລາແຕ່ 6 ຊົ່ວໂມງປະຢັດເວລາໄປ ໄດ້ 14 ຊົ່ວໂມງເມື່ອທຽບໃສ່ປະຈຸບັນ ແລະສາມາດເດີນທາງຮອດເມືອງຄຸນມິງແຂວງຢຸນນານ ໄດ້ພາຍໃນມື້ດຽວກັນ.

  ພິທີເຊັນບົດບັນທຶກຮ່ວມມືດັ່ງກ່າວຈັດຂຶ້ນໃນວັນທີ 28 ພຶດສະພາ 2019 ທີ່ ນະຄອນຫຼວງວຽງຈັນ ລະຫວ່າງທ່ານ ກິແກ້ວ ຈັນທະບູລີ ຮອງລັດຖະມົນຕີກະ ຊວງແຜນການ ແລະການລົງທຶນ ແລະ ທ່ານ ເສິນ ເວີນຊານ ປະທານກຸ່ມບໍລິສັດ ກໍ່ສ້າງ-ລົງທຶນ ແລະຖືຮຸ້ນ ແຂວງຢຸນນານ ຈໍາກັດ ໂດຍມີ ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງກະຊວງການເງິນ, ທ່ານ ຣວນ ເສີງຟາ ເຈົ້າແຂວງຢຸນນານ, ທ່ານ ຈຽງ ຈາຍດົງ ເອກອັກຄະລັດຖະທູດ ແຫ່ງ ສປ ຈີນ ປະຈໍາລາວ ພ້ອມດ້ວຍພາກສ່ວນກ່ຽວຂ້ອງຂອງສອງຝ່າຍເຂົ້າຮ່ວມເປັນສັກຂີພິຍານ.

 ໂຄງການທາງດ່ວນຈາກນະຄອນຫຼວງວຽງຈັນ ຫາຊາຍແດນ ສປປ ລາວ ກັບ ສປ ຈີນ ຖືເປັນຜົນຮູບປະທໍາຂອງການປະສານກັນລະຫວ່າງການລິເລີ່ມ “ໜຶ່ງແລວທາງໜຶ່ງເສັ້ນທາງ” ແລະຍຸດທະສາດລະດັບຊາດ “ຫັນປ່ຽນຈາກປະເທດບໍ່ມີທາງອອກສູ່ທະເລໃຫ້ກາຍເປັນປະເທດທາງເຊື່ອມຕໍ່” ຂອງລາວ. ໂດຍພາຍ ຫຼັງທີ່ການກໍ່ສ້າງສໍາເລັດການ ເດີນທາງຈາກນະຄອນຫຼວງວຽງຈັນຫາ ດ່ານບໍ່ເຕັນ ໃຊ້ເວລາແຕ່ 6 ຊົ່ວໂມງ ເຊິ່ງຈະ ປະຢັດເວລາໄປໄດ້ 14 ຊົ່ວໂມງ ເມື່ອປຽບ ທຽບໃສ່ປະຈຸບັນນີ້ ແລະສາມາດເດີນທາງຈາກນະຄອນຫຼວງວຽງຈັນ ຮອດເມືອງຄຸນມິງ ແຂວງຢຸນນານໄດ້ພາຍໃນມື້ດຽວກັນ,ເຊິ່ງຈະເພີ່ມທະວີຄວາມຮ່ວມມືແລກປ່ຽນທາງດ້ານເສດຖະກິດການຄ້າລະຫວ່າງລາວກັບຈີນ, ສົ່ງເສີມການພັດທະນາເສດຖະກິດ ແລະ ສັງຄົມໃນລາວ ແລະ ບັນດາແຂວງພາກຕາເວັນຕົກສ່ຽງໃຕ້ຂອງຈີນນໍາອີກ.

 ການກໍ່ສ້າງມີແຜນດໍາເນີນ 4 ຂັ້ນຕອນຄື: ນະຄອນຫຼວງວຽງຈັນ ຫາ ວັງວຽງ, ວັງວຽງ ຫາ ຫຼວງພະບາງ, ຫຼວງພະບາງ ຫາ ອຸດົມໄຊ ແລະອຸດົມໄຊ ຫາດ່ານສາກົນບໍ່ເຕັນ. ປະຈຸບັນຊ່ວງນະຄອນຫຼວງວຽງຈັນ ຫາວັງວຽງແມ່ນໄດ້ເຂົ້າສູ່ການລົງມືກໍ່ສ້າງແລ້ວ, ສ່ວນຊ່ວງທີ່ຍັງເຫຼືອແມ່ນກໍາລັງດໍາເນີນວຽກງານການສຶກສາສໍາຫຼວດຄວາມເປັນໄດ້ໃນການກໍ່ສ້າງ.

  ທັງນີ້ກໍເພື່ອເປັນການຈັດຕັ້ງປະຕິບັດ “ແຜນແມ່ບົດວ່າດ້ວຍການສ້າງຄູ່ຮ່ວມຊະຕາກໍາລາວ-ຈີນ ລະຫວ່າງພັກກອມມູນິດຈີນ ແລະພັດປະຊາຊົນປະຕິບັດ ລາວ” ແລະ ຜັກດັນການຈັດຕັ້ງປະຕິບັດ “ຂອບການຮ່ວມມື ວ່າດ້ວຍການພັດທະນາ ແລວເສດຖະກິດລາວ-ຈີນ” ໂດຍຮ່າງຂອບການຮ່ວມມືວ່າດ້ວຍການພັດທະນາໂຄງການທາງດ່ວນຈາກນະຄອນຫຼວງວຽງຈັນ ຫາຊາຍແດນດ່ານສາກົນບໍ່ເຕັນ-ບໍ່ຫານ ແນໃສ່ການຊຸກຍູ້ສົ່ງເສີມການຮ່ວມມືເຊິ່ງກັນ ແລະກັນລະ ຫວ່າງສອງປະເທດລາວ ແລະຈີນ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

 

แชร์