ເຈົ້າແຂວງສາລະວັນ ຢ້ຽມຢາມປະຊາຊົນ 12 ບ້ານ

  ວັນທີ 24 ພຶດສະພາ 2019 ຢູ່ສາລາໂຮງທຳບ້ານທ່າຄັນຊຸມຊົວ ທ່ານເຈົ້າແຂວງສາລະວັນ ພ້ອມຄະນະໄດ້ລົງຢ້ຽມຢາມຖາມຂ່າວເຖິງຊີວິດການເປັນຢູ່ຂອງພໍ່ແມ່ປະຊາຊົນ 12 ບ້ານ ເມືອງລະຄອນເພັງຄື: ບ້ານທ່າຄັນຊຸມຊົວ, ໜອງແສງ, ນາທົມ, ວົງຕາແຫຼວ, ພູກາສີ, ນາພະບາງນ້ອຍ,ດອນໝາກເກືອ, ໂພນງາມ, ນາກາລາ, ດອນເຮືອ ແລະບ້ານດອນແດງ,ໂດຍມີພຣະເຖຣະ,ບັນດາການນຳຂັ້ນແຂວງ,ເມືອງ ແລະ ພະແນກການ,ຫ້ອງການອ້ອມຂ້າງເມືອງຕະຫຼອດຮອດປະຊາຊົນເຂົ້າຮ່ວມ.

  ກ່ອນອື່ນ, ທ່ານເຈົ້າແຂວງສາລະວັນ ພ້ອມດ້ວຍຄະນະໄດ້ຮັບຟັງບົດລາຍງານການຈັດຕັ້ງປະຕິບັດວຽກງານຂອງບ້ານໂດຍສະເພາະແມ່ນບ້ານທ່າຄັນຊຸມຊົວມີເນື້ອທີ່ປົກຫຸ້ມທັງໝົດ 1.931 ເຮັກຕາ, ມີ 171 ຫຼັງຄາເຮືອນ, ມີ 214 ຄອບຄົວ ແລະ ມີພົນລະເມືອງທັງໝົດ 890 ຄົນ, ຍິງ 450 ຄົນ, ອາຊີບຕົ້ນ ຕໍແມ່ນເຮັດນາ ແລະ ປູກພຶດ-ລ້ຽງສັດ, ຄ້າຂາຍເປັນອາ ຊີບສຳຮອງ, ຄອບຄົວມີໄຟຟ້າຊົມໃຊ້ 100%, ເສັ້ນທາງການສັນຈອນໄປມາສະດວກ, ທ່າແຮງທີ່ສຳຄັນຂອງບ້ານແມ່ນການທ່ອງທ່ຽວເປັນຕົ້ນ: ແຫຼ່ງທ່ອງທ່ຽວ 4 ພັນຂຸມ, ຖໍ້າສະເງາະ,ໄມ້ເປັນຫີນ ແລະ ອື່ນໆ ທີ່ເປັນເງື່ອນໄຂໃນການສ້າງລາຍຮັບໃຫ້ກັບປະຊາຊົນ. ໂດຍໃນໄລຍະ 5 ເດືອນຜ່ານມານີ້ສາມາດຈັດເກັບລາຍຮັບໄດ້ 17 ລ້ານກວ່າກີບລື່ນແຜນ 9,20%. ນອນນັ້ນປະຊາຊົນພາຍໃນບ້ານດັ່ງກ່າວຍັງ ໄດ້ສະເໜີແກ້ໄຂ,ຊ່ວຍສ້າງສາລາໂຮງທຳແນໃສ່ເປັນເຜີຍແຜ່ສາດສະໜາເປັນຈຸດສູນລວມຈິດໃຈ, ຂາບໄຫວ້, ສັກກະລະບູຊາຄຽງຄູ່ກັບການຮອງຮັບນັກທ່ອງ ທ່ຽວທີ່ມາທ່ຽວຊົມເປັນບູລິມະສິດ, ຊ່ວຍສ້າງກັນເຈື່ອນບໍລິເວນວັດ ແລະສ້ອມແປງເສັ້ນທາງໃຫ້ສະດວກຂຶ້ນຕື່ມ. ຂໍ້ສະເໜີດັ່ງກ່າວທ່ານເຈົ້າແຂວງສາລະວັນ ເຫັນດີໃນການເປັນເຈົ້າພາບເຈົ້າສັດທາສ້າງສາລາໂຮງທຳໃຫ້ສຳເລັດຮ່ວມກັບປະຊາຊົນ ແລະຂະແໜງການຕ່າງໆ.

  ໂອກາດດັ່ງກ່າວທ່ານເຈົ້າ ແຂວງສາລະວັນ ໄດ້ເນັ້ນໜັກຕໍ່ກັບອຳນາດການປົກຄອງເມືອງ, ການປົກຄອງຂັ້ນບ້ານ ແລະພໍ່ແມ່ປະຊາຊົນເອົາໃຈໃສ່ໃນການປະ ຕິບັດລະບຽບກົດໝາຍບ້ານເມືອງ,ສຶກສາອົບຮົມການເມືອງແນວຄິດ, ກຳແໜ້ນແນວທາງນະໂຍບາຍຂອງພັກ-ລັດ, ເຕົ້າໂຮມຄວາມສາມັກຄີຂອງປະຊາຊົນບັນດາເຜົ່າໃຫ້ເປັນປຶກແຜ່ນແໜ້ນໜາ ແລະ ມີສ່ວນຮ່ວມຕໍ່ກັບວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ເຂັ້ມແຂງ, ເອົາໃຈໃສ່ສະກັດກັ້ນ ແລະແກ້ໄຂປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ.

  ນອກຈາກນັ້ນທ່ານເຈົ້າແຂວງສາລະວັນໄດ້ມີການມອບແນວພັນເຂົ້າໃຫ້ 12 ບ້ານຈຳນວນ 720 ກິໂລ, ໃນນັ້ນມີແນວພັນເຂົ້າຈ້າວຈາກ ສສ ຫວຽດນາມ ແລະແນວພັນເຂົ້າໜຽວສາລະວັນ 1 ເພື່ອນຳໄປທົດລອງປູກໃນແຕ່ລະຄອບຄົວອີກດ້ວຍ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์