ໄຊຍະບູລີ ແຕ່ງຕັ້ງ ວ່າການ ປະທານສານປະຊາຊົນ

  ໃນວັນທີ 24 ພຶດສະພາ 2019 ທີ່ສະໂມສອນຫ້ອງວ່າການ ແຂວງໄຊຍະບູລີ, ໄດ້ຈັດພິທີປະກາດແຕ່ງຕັ້ງວ່າການປະທານສານປະຊາຊົນແຂວງ, ເປັນກຽດເຂົ້າຮ່ວມມີທ່ານ ຄໍາພັນ ສິດທິດໍາພາ ປະທານສານປະຊາຊົນສູງສຸດ, ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ, ມີພະແນກການອ້ອມຂ້າງແຂວງ, ມີສານເຂດ ແລະ ພະນັກງານພາຍໃນສານແຂວງເຂົ້າຮ່ວມຢ່າງພ້ອມພຽງ.

  ທ່ານ ກັ້ງ ເຕັມສົມບັດ, ຫົວໜ້າກົມຈັດຕັ້ງສານປະຊາຊົນສູງສຸດໄດ້ຜ່ານຂໍ້ຕົກລົງຂອງປະທານສານປະຊາຊົນສູງສຸດສະບັບເລກທີ 274/ສປສສ, ລົງວັນທີ 10 ພຶດສະພາ 2019, ສະບັບເລກທີ 632/ສປສສ, ລົງວັນທີ 19 ພະຈິກ 2018 ວ່າດ້ວຍການອານຸມັດໃຫ້ພະນັກງານ-ລັດຖະກອນພັກການຮັບອຸດໜູນບໍານານ, ປະທານສານປະຊາຊົນສູງສຸດຕົກລົງເຫັນດີອານຸມັດໃຫ້ ທ່ານ ບຸນທຽມ ສີເມືອງ ພັກການຮັບອຸດໜູນບໍານານແຕ່ວັນທີ 1 ມັງກອນ 2019 ເປັນຕົ້ນໄປ, ເຫັນດີອານຸມັດໃຫ້ ທ່ານ ຄໍາພາດ ນ້ອຍຜາ ພັກການຮັບອຸດໜູນບໍານານແຕ່ວັນທີ 1 ກໍລະກົດ 2019 ເປັນຕົ້ນໄປ, ຜ່ານຂໍ້ຕົກລົງຂອງປະທານສານປະຊາຊົນສູງສຸດ ສະບັບ ເລກທີ 256/ສປສສ, ລົງວັນທີ 7 ພຶດສະພາ 2019, ວ່າດ້ວຍການ ແຕ່ງຕັ້ງຜູ້ວ່າການປະທານສານປະ ຊາຊົນແຂວງໄຊຍະບູລີ, ປະທານ ສານປະຊາຊົນສູງສຸດ ຕົກລົງເຫັນ ດີແຕ່ງຕັ້ງ ທ່ານ ຄໍາສິງ ສີບົວພັນ ຮອງປະທານສານປະຊາຊົນແຂວງ ເປັນຜູ້ວ່າການປະທານສານປະຊາຊົນແຂວງໄຊຍະບູລີ, ຂໍ້ຕົກລົງເລກ ທີ 54/ສປສສ ລົງວັນທີ 13 ກຸມ ພາ 2019 ວ່າດ້ວຍການແຕ່ງຕັ້ງຜູ້ ວ່າການປະທານສານປະຊາຊົນ ເຂດ 3 ແຂວງໄຊຍະບູລີ, ປະທານ ສານປະຊາຊົນສູງສຸດ ຕົກລົງເຫັນ ດີແຕ່ງຕັ້ງ ທ່ານ ສົມໄວ ຈັນທະຜາ ລີ ຮອງເລຂາໜ່ວຍພັກ, ຮອງປະ ທານສານປະຊາຊົນເຂດ 3 ເປັນຜູ້ ວ່າການປະທານສານປະຊາຊົນເຂດ 3 ແຂວງໄຊຍະບູລີ, ຜ່ານມະຕິຂອງຄະນະປະຈໍາສະພາແຫ່ງຊາດ, ສະບັບເລກ ທີ 30/ຄປຈ, ລົງວັນທີ 7 ກຸມພາ 2019 ວ່າດ້ວຍການແຕ່ງຕັ້ງຮອງປະທານສານປະຊາຊົນເຂດ 3 ແຂວງໄຊຍະບູລີ, ຄະນະປະຈໍາສະພາແຫ່ງຊາດຕົກລົງແຕ່ງຕັ້ງ ທ່ານ ສາຄອນ ຈັນທະລາດ ຜູ້ພິພາ ກສາ, ຫົວໜ້າຄະນະສານແພ່ງສານປະຊາຊົນເຂດ 3 ເປັນຮອງປະທານສານປະຊາຊົນເຂດ 3 ແຂວງໄຊຍະບູລີ.

ໂອກາດດັ່ງກ່າວປະທານສານປະຊາຊົນສູງສຸດ ໄດ້ໃຫ້ກຽດໂອ້ລົມຕໍ່ຜູ້ຖືກແຕ່ງຕັ້ງຄັ້ງນີ້ຈົ່ງເອົາໃຈໃສ່ຄົ້ນຄວ້າຮໍ່າຮຽນ, ກໍາແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ປະດິດຄິດສ້າງ, ສະດຸ້ງໄວຕໍ່ໜ້າທີ່ວຽກງານ, ມີແບບແຜນວິທີນໍາພາ, ຕັ້ງໜ້າປະຕິບັດໜ້າທີ່ວຽກງານວິຊາສະເພາະໃຫ້ເປັນທໍາ, ເພີ່ມທະວີຄວາມສາມັກຄີພາຍໃນ-ພາຍນອກໃຫ້ເປັນປຶກແຜ່ນ ແລະ ເອົາໃຈໃສ່ປັບປຸງກົງຈັກການຈັດຕັ້ງໃຫ້ສອດຄ່ອງກັບໜ້າວຽກຕົວຈິງ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์