ຍີ່ປຸ່ນສະຫຼອງການຄອງລາດສົມເດັດພະເຈົ້າຈັກກະພັດ ນາຣຸຮິໂຕະ

     ສະຖານເອກອັກຄະຣາຊະທູດຍີ່ປຸ່ນປະຈຳລາວໄດ້ຈັດງານລ້ຽງສະເຫຼີມສະຫຼອງການຂຶ້ນຄອງລາດຂອງສົມເດັດພະເຈົ້າຈັກກະພັດ ນາຣຸຮິໂຕະ ໃນວັນທີ 23 ພຶດ ສະພາ 2019 ທີ່ນະຄອນຫຼວງວຽງຈັນ ໂດຍມີທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ, ທ່ານນາງ ແສງເດືອນ ຫຼ້າຈັນທະບູນ ລັດ ຖະມົນຕີກະຊວງສຶກສາທິການ ແລະກີລາ, ທ່ານນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານ ທາເຄຊິ ຮິຄິຮາຣະ ເອກອັກຄະຣາຊະທູດຍີ່ປຸ່ນປະຈຳລາວ ພ້ອມດ້ວຍແຂກຖືກເຊີນເຂົ້າຮ່ວມ.

  ທ່ານ ທາເຄຊິ ຮິຄິຮາຣະ ໄດ້ຂຶ້ນກ່າວແນະນຳກ່ຽວກັບຍຸກສະໄໝທີ່ມີຊື່ Reiwe ຊຶ່ງມີຄວາມໝາຍວ່າ “ຄວາມສາມັກຄີສວຍສົດງົດງາມ” ຊຶ່ງໄດ້ອະທິບາຍຊື່ດັ່ງກ່າວແມ່ນໄດ້ມາຈາກບົດກາບກອນໃນປື້ມ Manyoshu ໜັງສືທີ່ລວບລວມກາບກອນທີ່ເກົ່າແກ່ສຸດຂອງປະເທດຍີ່ປຸ່ນທີ່ມີອາຍຸຫຼາຍກວ່າ 1200 ປີ.

  ນອກນັ້ນທ່ານຍັງໄດ້ຍົກໃຫ້ເຫັນເຖິງປະຫວັດສາດອັນອຸດົມສົມບູນຂອງຍີ່ປຸ່ນ ແລະສາຍພົວພັນສອງຝ່າຍການຮ່ວມມືກັບ ສປປ ລາວ ທີ່ໄດ້ຮັບການເສີມສ້າງຂະຫຍາຍຢ່າງຕໍ່ເນື່ອງໃນຕະຫຼອດໃນໄລຍະ 30 ປີໃນຍຸກສະໄໝ Heisei ພາຍໃຕ້ອາດີດສົມເດັດພະເຈົ້າຈັກກະພັດອົງກ່ອນພ້ອມນັ້ນຍັງໄດ້ເນັ້ນໃຫ້ເຫັນຄວາມສຳຄັນການແລກປ່ຽນຢ້ຽມຢາມ ສປປ ລາວ ຫຼາຍຄັ້ງຂອງລາດຊະວົງຍີ່ປຸ່ນ, ອັນລວມມີການສະເດັດຢ້ຽມຢາມລາວໃນປີ 2012 ຂອງສົມສະເດັດເຈົ້າຈັກກະພັດນາຣຸຮິໂຕະ ແລະ ອົງມົງກຸດຣາຊາກຸມມານ ອາກິຊິໂນະ ທີ່ຊົງສະເດັດມາຢ້ຽມຢາມລາວເຖິງ 3 ຄັ້ງນັບແຕ່ປີ 1999.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์