ສຳເລັດກວດກາໂຄງການສ້າງອ່າງເກັບນ້ຳຫ້ວຍຫີນຫ້ອມ

 ຫວ່າງບໍ່ດົນທີ່ຜ່ານມາ, ເຈົ້າຂອງໂຄງການ ແລະບໍລິສັດຜູ້ຮັບເໝົາກໍ່ສ້າງໄດ້ລົງກວດກາຄວາມຄືບໜ້າໂຄງການກໍ່ສ້າງອ່າງເກັບນໍ້າຫ້ວຍຫີນຫ້ອມບ້ານຄໍາຊັນ ເມືອງໄຊພູທອງ ແຂວງສະຫວັນເຂດ ຊຶ່ງນຳໂດຍ ທ່ານ ແສງສະຫວັນ ອະນຸສິນ ຮອງເຈົ້າເມືອງໄຊພູທອງ, ຜູ້ຊີ້ນຳວຽກງານຂົງເຂດເສດຖະກິດ, ທັງເປັນຄະນະກໍາມະການຄຸ້ມຄອງສົງເສີມການລົງທຶນຂັ້ນເມືອງມີພາກສ່ວນທີ່ກ່ຽວຂ້ອງຂັ້ນເມືອງ, ອຳນາດການປົກຄອງບ້ານເຂົ້າຮ່ວມນຳ.

 ໂຄງການກໍ່ສ້າງອ່າງເກັບນໍ້າຫ້ວຍຫີນຫ້ອມ ບ້ານຄໍາຊັນ ຊຶ່ງເປັນໂຄງການຊົນລະປະທານຂະໜາດໃຫຍ່ທີ່ມີມູນຄ່າການລົງທຶນ 3,2 ຕື້ກີບ ໂດຍແມ່ນງົບປະ ມານຂອງລັດຜ່ານສະພາປະຈໍາປີ 2018 ໂດຍແມ່ນບໍລິສັດເອັດດີເອັນ (SDN) ເປັນຜູ້ຮັບເໝົາກໍ່ສ້າງ, ຊຶ່ງມາຮອດປະຈຸບັນນີ້ສໍາເລັດ 100% ພາຍຫຼັງໄດ້ລົງມືມາແຕ່ວັນທີ 26 ເມສາ 2018 ເປັນຕົ້ນມາເຖິງປະຈຸບັນ, ອ່າງເກັບນໍ້າຫ້ວຍຫີນຫ້ອມມີເນື້ອທີ່ທັງໝົດ 32 ເຮັກຕາ, ມີຄວາມຍາວ 450 ແມັດ, ກວ້ າງ 35 ແມັດ, ສູງ 5 ແມັດ, ສັນຝາຍກວ້າງ 5 ແມັດ, ສູງຈາກໜ້າດິນ 5 ແມັດ.

 ອ່າງເກັບນໍ້າຫ້ວຍຫີນຫ້ອມຊຶ່ງສາມາດຫົດເນື້ອທີ່ການຜະລິດໄດ້ 22 ເຮັກຕາ, ສ່ວນບັນດາໜ້າວຽກຫຼັກຄື: ຕົວຄັນຝາຍ, ວຽກທາງລະບາຍ, ທໍ່ເອົານໍ້າອອກຈາກອ່າງ 2 ຈຸດ, ພ້ອມນັ້ນກໍ່ໄດ້ກວດຄືນບັນດາໜ້າວຽກທີ່ໄດ້ສຶບຕໍ່ເຊັ່ນ: ເສີມຄັນຝາຍພ້ອມທັງຮັບປະກັນທາງເຕັກນິກ, ເສີມທາງລະບາຍນໍ້າ 50 ຊັງຕີແມັດເບຕົງ, ສ້າງຂົວຂ້າມທາງລະບາຍນໍ້າລົດສາມາດທຽວໄດ້, ເຮັດທາງເລາະຕີນຄັນຝາຍ, ສ້ອມແປງຄືນລະຫຼົບສັນຝາຍ.

 ຜ່ານການກວດກາທາງຄະນະກໍາມະການຂັ້ນເມືອງແມ່ນເຫັນດີຕາມການກໍ່ສ້າງຂອງບໍລິສັດແມ່ນຖືກຕ້ອງຕາມແຜນປາລັງເຕັກນິກ: ພາຍຫຼັງກວດກາການກໍ່ສ້າງສຳເລັດແລ້ວ, ທ່ານຮອງເຈົ້າເມືອງໃຫ້ຄຳຄິດເຫັນວ່າ: ການຈັດຕັ້ງປະຕິບັດໂຄງການຕ້ອງມີການຕິດຕາມ, ກວດກາ, ປະເມີນຜົນຄວາມຄືບໜ້າຂອງໂຄງການ ແລະໃຫ້ແຕ່ລະພາກສ່ວນຕ້ອງເປັນເຈົ້າການໃນການຈັດຕັ້ງ ປະຕິບັດ, ອຳນາດການປົກຄອງບ້ານ, ແມ່ນໝາກຫົວໃຈຫຼັກທີ່ນຳພາປະຊາຊົນຊົມໃຊ້ນໍ້າໃຫ້ເກີດປະໂຫຍດສູງສຸດ ແລະ ຮັກສາໃຫ້ຮັບໃຊ້ນໍ້າໄດ້ຢ່າງຍາວນານ. ປະກອບສ່ວນເພີ່ມຜົນຜະລິດກະສິກຳໃຫ້ເພີ່ມຂຶ້ນ, ແກ້ໄຂການຂາດດ້ານໂພຊະນາການ, ແກ້ໄຂຄວາມທຸກຍາກຂອງປະຊາຊົນໃຫ້ນັບມື້ຫຼຸດລົງເທື່ອລະກ້າວ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์