ຮັກສາຄວາມສະອາດ ສ້າງຂະບວນການໃສ່ວັນສິ່ງເເວດລ້ອມ

  ກອງທຶນປົກປັກຮັກສາສິ່ງແວດລ້ອມຮ່ວມກັບຫ້ອງການຄຸ້ມຄອງ ແລະບໍລິການຕົວເມືອງວຽງຈັນ, ກົມສົ່ງເສີມຄຸນນະພາບສິ່ງແວດລ້ອມ, ກະຊວງຊັບພະ ຍາກອນທຳມະຊາດ ແລະສິ່ງແວດລ້ອມໄດ້ຈັດກິດຈະກຳເກັບຂີ້ເຫຍື້ອເພື່ອຮັກສາຄວາມສະອາດເນື່ອງໃນວັນສິ່ງແວດລ້ອມແຫ່ງຊາດ ແລະ ວັນສິ່ງແວດລ້ອມໂລກວັນທີ 5 ມິຖຸນາ 2019.

   ພິທີໄດ້ຈັດຂຶ້ນວັນທີ 27 ພຶດສະພາ 2019 ທີ່ເດີ່ນພະທາດຫຼວງວຽງຈັນ ໂດຍການເຂົ້າຮ່ວມທ່ານ ໂລນຄຳ ອາດສະນາວົງ ຫົວໜ້າກົມສົ່ງເສີມຄຸນນະພາບສິ່ງແວດລ້ອມກະຊວງຊັບພະຍາກອນທຳມະຊາດ ແລະສິ່ງແວດລ້ອມ, ທ່ານນາງ ບຸນພາມາ ໂພທິສານ ຮອງຫົວໜ້າຫ້ອງການກອງທຶນປົກປັກຮັກສາສິ່ງແວ ດລ້ອມ ແລະທ່ານ ນາງ ວິໄລວອນ ຈັນທະລາຕີ ຫົວໜ້າຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ມີບັນດາພາກສ່ວນກ່ຽວຂ້ອງ ແລະ ມວນຊົນເຂົ້າຮ່ວມ.

  ທ່ານ ນາງ ບຸນພາມາ ໂພທິສານ ກ່າວວ່າ: ກິດຈະກຳເກັບຂີ້ເຫຍື້ອເພື່ອຮັກສາຄວາມສະອາດແມ່ນກິດຈະກຳໜຶ່ງໃນການສະເຫຼີມສະຫຼອງວັນສິ່ງແວດລ້ອມແຫ່ງຊາດ ແລະວັນສິ່ງແວດລ້ອມໂລກວັນທີ 5 ມິຖຸນາ ທີ່ຈະມາເຖິງນີ້ອົງການສະຫະປະຊາຊາດໄດ້ຈັດກອງປະຊຸມຍອດໂລກກ່ຽວກັບສິ່ງແວດລ້ອມຂອງມະນຸດໃນປີ 1972 ແລະໄດ້ຮັບຮອງເອົາວັນທີ 5 ມິຖຸນາ ເປັນວັນສິ່ງແວດລ້ອມໂລກຊຶ່ງເລີ່ມຈາກປີດັ່ງກ່າວເປັນເວລາ 47 ປີມາເຖິງປະຈຸບັນ ສປປ ລາວກໍໄດ້ຖື ເອົາວຽກງານປົກປັກຮັກສາສິ່ງແວດລ້ອມເປັນວຽກງານບຸລິມະສິດລະດັບຊາດ ແລະໄດ້ລະບຸໃນກົດໝາຍວ່າດ້ວຍການປົກປັກຮັກສາສິ່ງແວດລ້ອມມາດຕາ 89 ສປປ ລາວ ຖືເອົາໄວ້ວັນທີ 5 ມິຖຸນາ ເປັນວັນສິ່ງແວດລ້ອມແຫ່ງຊາດ.

  ສະນັ້ນ, ຫ້ອງການກອງທຶນປົກປັກຮັກສາສິ່ງແວດລ້ອມໄດ້ປຸກລະດົມຮ່ວມມືຫຼາຍພາກສ່ວນພາກັນອະນາໄມປົກປັກຮັກສາເດີ່ນພະທາດຫຼວງວຽງຈັນ ເພື່ອເຮັດສັງຄົມເຫັນຄວາມສຳຄັນຫຼຸດຜ່ອນມົນລະພິດ,ຫຼຸດຜ່ອນການໃຊ້ປຣາສະຕິກ ແລະປູກຈິດສຳນຶກຂອງທຸກຄົນໃຫ້ພ້ອມກັນຮ່ວມມືປົກປັກຮັກສາສິ່ງແວດ ລ້ອມສືບຕໍ່ຕະຫຼອດໄປພ້ອມທັງຮຽກຮ້ອງມາຍັງພາກສ່ວນຕ່າງໆຮ່ວມມື, ຮ່ວມແຮງໃຈໃນການເຮັດກິດຈະກຳເພື່ອສັງຄົມ, ເພື່ອສິ່ງແວດລ້ອມ ແລະ ປົກປັກຮັກສາຊັບພະຍາກອນທຳມະຊາດໄວ້ໃຫ້ຍືນຍົງ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์