ກຽມຍົກລະດັບດ່ານປະເພນີ ປາງມອນຂື້ນເປັນດ່ານສາກົນ

  ເພື່ອເຮັດໃຫ້ດ່ານປະເພນີປາງມອນ ເມືອງຄອບ, ແຂວງໄຊຍະບູລີ ໄດ້ຮັບການຍົກລະດັບຂຶ້ນເປັນດ່ານສາກົນ ແລະເພື່ອເຮັດໃຫ້ດ່ານດັ່ງກ່າວກາຍເປັນດ່ານໜ້າທີ່ເປັນແຫຼ່ງລາຍຮັບຂອງແຂວງກໍ່ຄືລັດຖະບານ, ພ້ອມທັງອໍານວຍຄວາມສະດວກໃນການເຂົ້າ-ອອກຂອງປະຊາຊົນສອງປະເທດ,ເວົ້າລວມ, ເວົ້າສະເພາະແມ່ນປະຊາຊົນແຂວງໄຊຍະບູລີ ແລະແຂວງໃກ້ຄຽງກັບບັນດາຈັ່ງຫວັດຂອງໄທທີ່ຕິດກັບແຂວງໄຊຍະບູລີ ແລະ ນັກທ່ອງທ່ຽວປະເທດທີ່ສາມາດທີ່ເຂົ້າມາທ່ອງ ທ່ຽວໃນເຂດດັ່ງກ່າວ ແລະເພື່ອເປັນການກະກຽມຄວາມພ້ອມໃນການຈະເປີດດ່ານປະເພນີປາງມອນຂຶ້ນເປັນດ່ານສາກົນນັ້ນ.

  ໃນຕອນເຊົ້າຂອງວັນທີ 28 ພຶດສະພາ 2019 ນີ້, ທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີກະຊວງການຕ່າງປະເທດພ້ອມດ້ວຍຄະນະໄດ້ເຂົ້າຢ້ຽມຂໍ່ານັບ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ພ້ອມທັງໄດ້ລາຍງານຜົນການລົງກວດກາການກຽມຄວາມພ້ອມຂອງດ່ານປາງມອນ.

  ທ່ານໄດ້ກ່າວວ່າ: ການຍົກລະດັບດ່ານປະເພນີປາງມອນຂຶ້ນເປັນດ່ານສາກົນຕ້ອງໄດ້ປັບປຸງເພີ່ມບາງດ້ານທີ່ຈໍາເປັນເຊັ່ນ: ປັບປຸງທາງເຂົ້າປັບໃຫ້ເປັນເລນລະອຽດເພື່ອຮອງຮັບລົດບັນທຸກສິນຄ້າ,ປັບປຸງຫ້ອງເຮັດວຽກເປັນຕົ້ນແມ່ນ: ຫ້ອງໜ່ວຍງານອອກວິຊາກັບທີ່,ຫ້ອງໜ່ວຍງານຕມ,ຫ້ອງໜ່ວຍງານສາທາ ລະນະສຸກກໍາ (ຄວບຄຸມພະຍາດຕິດຕໍ່ຊາຍແດນ), ຫ້ອງໜ່ວຍງານກະສິກໍາ (ກັກກັນພືດ ແລະ ສັດ) ແລະ ຫ້ອງກັກຂັງຊົ່ວຄາວ, ປັບປຸງໃຫ້ມີຫ້ອງວິເຄາະ-ວິໄຈດ້ານກະສິກໍາ ແລະສາທາລະນະສຸກ, ພ້ອມທັງໄດ້ຮຽກຮ້ອງໃຫ້ການນໍາຂອງແຂວງເພື່ອຊ່ວຍແບ່ງງົບປະມານເພື່ອປັບປຸງສະຖານທີ່ໆເຫັນວ່າມີຄວາມຈໍາເປັນ.

  ຈາກນັ້ນທ່ານເຈົ້າແຂວງກໍ່ໄດ້ກ່າວຄໍາຂອບໃຈຕໍ່ທີມງານຂອງທ່ານຮອງລັດຖະມົນຕີກະຊວງການຕ່າງປະເທດທີ່ໄດ້ຍາດເວລາລົງມາກວດກາດ້ານເຕັກນິກການກຽມຄວາມພ້ອມທີ່ຈະຍົກລະດັບດ່ານປະເພນີປາງມອນຂຶ້ນເປັນດ່ານສາກົນ, ເພື່ອຈະໄດ້ປັບປຸງອາຄານ, ສະຖານທີ່ໃຫ້ຄົບຖ້ວມຖືກຕາມມາດຖານ 15 ຂໍ້ຂອງກະຊວງການຕ່າງປະເທດວາງອອກ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์