ບ້ານດອນແຊ ຈັດງານບຸນບັ້ງໄຟ

ບ້ານດອນແຊເມືອງຊະນະສົມບູນແຂວງຈໍາປາສັກ ໄດ້ຈັດງານປະເພນີບຸນບັ້ງໄຟຂຶ້ນຢ່າງເປັນຂະບວນຄຶກຄື້ນມ່ວນຊື່ນໃນລະຫວ່າງວັນທີ 25-27 ພຶດສະພາ 2019 ໂດຍມີທ່ານ ສຸປານີ ສີລິປຸນໂຍຫົວໜ້າພະແນກຊັບພະຍາກອນທໍາມະຊາດແລະສິ່ງແວດລ້ອມແຂວງຈໍາປາສັກ, ທ່ານ ສອນສະຫວັນ ສີວິໄລເຈົ້າເມືອງໆຊະນະສົມບູນ, ມີພະອາຈານຄໍາພັກພົມມະຫາໄຊຮອງປະທານອົງການພຸດທະສາສະໜາ(ອພສ) ແຂວງຈໍາປາສັກທັງເປັນປະທານ ອພສ ເມືອງ ຊະນະສົມບູນ,ມີແຂກຈາກຕ່າງແຂວງ,ຕ່າງປະເທດແລະມວນຊົນເຂົ້າຮ່ວມຢ່າງຫຼວງຫຼາຍ.

ບຸນບັ້ງໄຟເປັນບຸນປະເພນີປະຈໍາ ເດືອນ 6 ທີ່ສືບທອດກັນມາແຕ່ສະໄໝບູຮານນະການໂດຍໄດ້ມາຈາກສາສະໜາພາມເອີ້ນວ່າບຸນສັດຈະຫຼື ຂໍຝົນໃຫ້ຕົກມາໃສ່ນາເພື່ອຈະລົງມືປູກເຂົ້ານາປີ. ຄໍາວ່່າ ບັ້ງ” ຄືໄມ້ໄຜ່ທີ່ຖືກຕັດເປັນທ່ອນ ຫຼື ກະບອກໄມ້ ໄຜ່ນັ້ນເອງສ່ວນຄໍາວ່າ“ໄຟ” ຄົງ ບໍ່ຕ້ອງອະທິບາຍເພາະມີຄວາມ ໝາຍຊັດເຈນໃນຕົວແລ້ວເມື່ອເອົາຄໍາສອງຄໍານີ້ມາລວມກັນເປັນ“ບັ້ງໄຟ”ຈຶ່ງໄດ້ຄວາມໝາຍວ່າກະບອກໄມ້ໄຜ່ທີ່ຖືກອັດດ້ວຍໄຟອັດດ້ວຍໝື້ ຫຼື ຂີ້ເຈຍເມື່ອເວລາຈູດຈະ ເປັນໄຟ.

 ການເຮັດບຸນບັ້ງໄຟຕາມຄວາມເຊື່ອທີ່ວ່າເທິງຟ້າມີສິ່ງສັກສິດ ຫຼື ທີ່ຊາວພຸດເອີ້ນກັນວ່າ “ພະຍາແຖນ” ຊຶ່ງຄວາມເປັນມາຂອງບຸນບັ້ງໄຟມີເລື່ອງເລົ່າວ່າ:ໃນເມື່ອກ່ອນບ້ານເມືອງເກີດເດືອດຮ້ອນເພາະຝົນຟ້າບໍ່ຕົກຕາມລະດູການບັນດາຄົນ,ສັດ, ພືດຕ່າງໄດ້ຮັບຄວາມເດືອດຮ້ອນໄປຕາມໆກັນຍັງມີ “ພະຍາຄັນຄາກ” ທີ່ມີລິດເດດເປັນສັດວິເສດປົກຄອງຢູ່ພື້ນແຜ່ນດິນຈຶ່ງອອກໄປກວດກາຫາສາເຫດວ່າເປັນຫຍັງຝົນຟ້າຈຶ່ງບໍ່ຕົກລົງມາຈຶ່ງຮູ້ຄວາມຈິງວ່າເປັນ“ພະຍາແຖນ” ເອງທີ່ບໍ່ຍອມສົ່ງຝົນລົງມາເມື່ອພະຍາຄັນຄາກຮູ້ຢ່າງນັ້ນຈຶ່ງຂໍອາສາສູ້ກັບພະຍາແຖນ ໂດຍການເອົາຝົນຟ້າເປັນເດີມພັນຫາກພະຍາຄັນຄາກຊະນະພະຍາແຖນຕ້ອງເຮັດໃຫ້ຝົນຕົກລົງມາໃຫ້ ມວນມະນຸດ,ຈາກນັ້ນ “ພະຍາ ແຖນ” ແລະ“ພະຍາຄັນຄາກ”ຕໍ່ສູ້ກັນຜົນປະກົດວ່າພະຍາຄັນຄາກຊະນະພະຍາແຖນຕ້ອງສົ່ງຝົນໃຫ້ ຕົກລົງມາໃນໂລກມະນຸດແຕ່ມີຂໍ້ຕົກລົງວ່ຊາວໂລກຫຼືມະນຸດນັ້ນຕ້ອງໄດ້ເຮັດບຸນບັ້ງໄຟແລ້ວຈູດຂຶ້ນໄປບອກພະຍາແຖນດ້ວຍວ່າຕ້ອງການຝົນເມື່ອໃດ, ເວລາໃດ, ໄລຍະໃດດັ່ງນັ້ນເມື່ອເຖິງລະດູການເຮັດນາຊາວນາຕ້ອງການຝົນກໍຕ້ອງເຮັດບຸນບັ້ງໄຟຈູດບັ້ງໄຟຂຶ້ນໄປບອກ “ພະຍາແຖນ” ເພື່ອເປັນສັນຍານ ເພື່ອໃຫ້ພະຍາແຖນເຮັດຝົນຕົກລົງມາດ້ວຍເຫດຄວາມເຊື່ອທີ່ກ່າວມານີ້ຊາວພຸດທັງຫຼາຍຈຶ່ງໄດ້ມີການເຮັດບຸນບັ້ງໄຟຈົນມາຮອດທຸກມື້ນີ້.

ຢ່າງໃດກໍຕາມການຈັດງານບຸນບັ້ງໄຟ ຂອງປະຊາຊົນບ້ານດອນແຊເມືອງຊະນະສົມບູນຄັ້ງນີ້ກໍເພື່ອສືບຕໍ່ປົກປັກຮັກສາຮີດ 12 ຄອງ 14 ປະເພນີລາວ, ໂດຍສະເພາະຮີດທີ 6ກໍຄືງານບຸນບັ້ງໄຟຊຶ່ງມີກິດຈະກໍາທີ່ໃຫ້ຄວາມມ່ວນຊື່ນແລະເສີມຂະຫຍາຍມູນເຊື້ອວັດທະນະທໍາລາວເປັນຕົ້ນແມ່ນ: ການຈູດບັ້ງໄຟມີບັ້ງໄຟທັງໝົດ 30 ບັ້ງ, ການແຂ່ງຂັນເສັງກອງ ຊຶ່ງມີທັງກອງ ຫາງ, ກອງຂັນ, ກອງໂທນ, ກອງ ກິ່ງ ແລະກິດຈະກຳອື່ນໆອີກ.

ຮຽບຮຽງໂດຍ: ນໍ້າເໝີຍ

แชร์