ຮາກຖານເຂື່ອນບໍ່ໄດ້ມາດຖານ ຕົ້ນເຫດຄູກັນນ້ຳເຂື່ອນເຊປຽນ-ເຊນ້ຳນ້ອຍແຕກ

  ການກວດກາຫາສາເຫດຂອງຄູກັນນ້ຳເຂື່ອນເຊປຽນ-ເຊນ້ຳນ້ອຍແຕກ ເມື່ອປີຜ່ານມາຮອດປະຈຸບັນໄດ້ຂໍ້ສະຫຼຸບວ່າບໍ່ແມ່ນເຫດສຸດວິໄສແຕ່ກ່ຽວຂ້ອງກັບຄວາມສາມາດໃນການຊືມນ້ຳສູງຂອງຮາກຖານເຂື່ອນກັນນໍ້າ D ປະກອບກັບຊັ້ນດິນທີ່ກັດເຊາະໄດ້ງ່າຍໂດຍຄະນະກວດສອບປາກົດເຫັນຮູທໍ່ນ້ອຍມີການເຊື່ອມຕໍ່ຊຶ່ງກັນ ແລະກັນໃນຊັ້ນດິນ.

  ເຫດການຄູກັນນ້ຳເຂື່ອນເຊປຽນ-ເຊນ້ຳນ້ອຍແຕກພັງເມື່ອທ້າຍເດືອນກໍລະກົດ 2018 ໄດ້ສົ່ງຜົນປະຊາຊົນຫຼາຍບ້ານພາຍໃນເມືອງສະໜາມໄຊ ແຂວງອັດຕາປື ໄດ້ຮັບຜົນກະທົບຢ່າງໜັກເຮືອນຊານບ້ານຊ່ອງເນື້ອທີ່ທຳການຜະລິດໄດ້ຮັບຄວາມເສຍຫາຍນອກຈາກນັ້ນຍັງມີຜູ້ເສຍຊີວິດ ແລະ ສູນເຫຍນຳອີກ.

  ຈາກສະພາບຄືດັ່ງກ່າວຫຼັງເກີດເຫດເປັນຕົ້ນມາລັດຖະບານກໍຮີບຮ້ອນໃຫ້ການຊ່ວຍເຫຼືອປະຊາຊົນຜູ້ໄດ້ຮັບຜົນກະທົບຢ່າງທັນການ ແລະ ຕໍ່ເນື່ອງໄປພ້ອມກັບການສືບຫາສາເຫດຈົນມາຮອດວັນທີ 28 ພຶດສະພາທ່ານ ສິງເພັດ ບຸນສະຫວັດທິພັນ ຮອງປະທານອົງການກວດກາລັດຖະບານທັງເປັນຮອງປະທານຄະ

ນະສືບສວນ-ສອບສວນສາເຫດໃນຄັ້ງນີ້ຖະແຫຼງຜົນໃຫ້ຮູ້ວ່າ: ການແຕກພັງຂອງຄູກັນນໍ້າ D ໄດ້ເກີດຂຶ້ນໃນວັນທີ 23 ກໍລະກົດ 2018 ຊຶ່ງຢູ່ໃນໄລຍະເກັບກັກນໍ້າເຂົ້າອ່າງເຖິງແມ່ນວ່າມີຝົນຕົກຕິດຕໍ່ກັນຫຼາຍວັນກ່ອນມື້ຄູກັນນໍ້າແຕກພັງກໍ່ຕາມແຕ່ໃນເວລາການແຕກພັງໄດ້ເລີ່ມຕົ້ນຂຶ້ນນັ້ນລະດັບນໍ້າໃນອ່າງເກັບນໍ້າຍັງຕໍ່າກວ່າລະດັບສັນເຂື່ອນຫຼາຍ, ສະນັ້ນ, ບໍ່ສາມາດເອີ້ນເຫດການແຕກພັງຄັ້ງນີ້ວ່າເປັນເຫດສຸດວິໄສຕາມທີ່ກຳນົດໄວ້ໃນສັນຍາສຳປະທານ.

  ທ່ານ ສິງເພັດ ບຸນສະຫວັດທິພັນ ກ່າວວ່າ: ຄະນະຊ່ຽວຊານເອກະລາດກວດພົບວ່າ: ສາເຫດຕົ້ນຕໍຂອງການແຕກພັງແມ່ນກ່ຽວຂ້ອງກັບຄວາມສາມາດໃນການຊຶມນໍ້າສູງຂອງຮາກຖານຂອງເຂື່ອນກັນນໍ້າປະກອບກັບຊັ້ນດິນທີ່ສາມາດຖືກກັດເຊາະໄດ້ງ່າຍໂດຍສະເພາະການປາກົດມີຮູທໍ່ນ້ອຍໆທີ່ມີການເຊື່ອມຕໍ່ຊຶ່ງກັນ ແລະກັນໃນຊັ້ນດິນໄປພ້ອມກັບການເພີ່ມຂຶ້ນຂອງລະດັບນໍ້າໃນອ່າງ, ກະແສການຊຶມຂອງນໍ້າຕາມເສັ້ນທາງໄຫຼຂອງນໍ້າຕາມທາງນອນກໍ່ເລີ່ມຂຶ້ນໃນຮາກ ຖານບວກກັບຄວາມສາມາດໃນການຊຶມນໍ້າສູງຂອງດິນປາກົດການນີ້ໄດ້ສົ່ງຜົນໃຫ້ມີການກັດເຊາະພາຍໃນຮາກຖານ ແລະເຮັດໃຫ້ດິນລາເຕຣິດອ່ອນໂຕລົງ.

 ເມື່ອການກັດເຊາະ ແລະການອ່ອນໂຕຂອງຮາກຖານເຖິງຂັ້ນໃດໜຶ່ງ, ຄວາມສະເຫຼີຍລະພາບຂອງເຂື່ອນບໍ່ສາມາດຮັບປະກັນໄດ້ອີກຕໍ່ໄປ ແລະການເລື່ອນຖະ ໄຫຼເລິກແບບໝູນໄດ້ເລີ່ມຕົ້ນຂຶ້ນທີ່ບ່ອນສູງສຸດຂອງເຂື່ອນກັນນໍ້າ, ໃນທີ່ສຸດກໍ່ນຳໄປສູ່ການແຕກພັງທັງໝົດຂອງຄູກັນນໍ້າ D ແລະຊັ້ນຮາກຖານຊຶ່ງເຮັດໃຫ້ມວນນໍ້າມະຫາສານ (ທີ່ມີຄວາມສາມາດທຳລາຍສູງ ແລະບໍ່ສາມາດຄວນຄຸມໄດ້) ໄດ້ໄຫຼອອກຈາກອ່າງເກັບນໍ້າ, ຮາກຖານຂອງຄູກັນນໍ້າ D ແມ່ນກ່ຽວຂ້ອງກັບການແຕກພັງໃນຄັ້ງນີ້.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์