ອັດຕະປື-ອານຢາງ ຮ່ວມພັດທະນາວຽກງານ ອຄ

  ພະແນກອຸດສາຫະກຳ ແລະ ການຄ້າ (ອຄ) ແຂວງອັດຕະປື ແລະພະແນກອຸດສາຫະກຳ ແລະການຄ້າແຂວງອານຢາງ ສສ ຫວຽດນາມ ຈັດກອງປະຊຸມພົບ ແລກປ່ຽນບົດຮຽນກ່ຽວກັບການພັດທະນາລະບົບຈຳໜ່າຍສິນຄ້າ, ການນຳເຂົ້າສີນຄ້າຜ່ານດ່ານຊາຍແດນຂອງແຂວງອັດຕະ ປືໃນວັນທີ 22 ພຶດສະພາ ທີ່ແຂວງອັດຕະປື.ໂດຍມີທ່ານ ສຸດໃຈ ກົມມະເມືອງ ຮອງຫົວໜ້າພະແນກອຸດສາຫະກຳ ແລະການຄ້າແຂວງອັດຕະປື, ມີທ່ານ ຟານເລີ້ຍ ຮອງຫົວໜ້າພະແນກອຸດສະຫະກຳ ແລະການຄ້າ ແຂວງອານຢາງ ພ້ອມຄະນະທັງ ສອງຝ່າຍເຂົ້າຮ່ວມ, ກອງປະຊຸມ ຄັ້ງນີ້ໄດ້ດໍາເນີນໄປດ້ວຍບັນຍາກາດທີ່ເຕັມໄປດ້ວຍໄມຕີຈິດມິດຕະ ພາບ ແລະການຮ່ວມມືຮອບດ້ານ ບົນພື້ນຖານຕ່າງຝ່າຍຕ່າງໄດ້ຮັບ ຜົນປະໂຫຍດເທົ່າທຽມກັນ, ໂດຍ ກອງປະຊຸມຕ່າງຝ່າຍກໍ່ໄດ້ລາຍງານສະພາບການພັດທະນາເສດຖະກິດ-ສັງຄົມແຂວງຂອງຕົນໃຫ້ກັນຊາບພ້ອມທັງໄດ້ແລກປ່ຽນບົດຮຽນໃນຂົງເຂດອຸດສາຫະກໍາ ແລະການຄ້ານໍາກັນ .

   ພ້ອມນັ້ນທັງສອງຝ່າຍຍັງໄດ້ເຊັນບົດບັນທຶກຄວາມເຂົ້າໃຈກ່ຽວກັບການຮ່ວມມືພັດທະນາວຽກງານອຸດສາຫະກຳແລະການຄ້າ, ເພື່ອແນ່ໃສ່ເສີມຂະຫຍາຍຄວາມອາດສາມາດ,ທ່າແຮງຂອງສອງຝ່າຍ,ສະໜັບສະໜູນຊ່ວຍເຫຼືອເຊິ່ງກັນ ແລະກັນພ້ອມກັນພັດທະນາດ້ານອຸດສາຫະກຳ ແລະການຄ້າ, ສົ່ງເສີມພັດທະ ນາເສດຖະກິດ-ສັງຄົມ, ຕອບສະໜອງຄວາມຕ້ອງການໃນການຮ່ວມມືພັດທະນາ ແລະ ເຊື່ອມໂຍງເສດຖະກິດສາກົນ, ສອງຝ່າຍເຫັນດີເພີ່ມທະວີສ້າງສາຍພົວພັນຮ່ວມມືນໍາກັນເພື່ອຄວາມຢູ່ດີກິນດີຂອງປະຊາຊົນທັງສອງຊາດລາວ-ຫວຽດນາມ ກໍຄືປະຊາຊົນສອງແຂວງລະຫວ່າງແຂວງອັດຕະປື ແລະແຂວງ ອານຢາງໃຫ້ນັບມືດີຂຶ້ນເປັນກ້າວ .

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

• 28/05/2019