ເມືອງບົວລະພາ ມອບແນວພັນເຂົ້າໃຫ້ປະຊາຊົນ

  ຫ້ອງການກະສິກໍາ ແລະປ່າໄມ້ເມືອງບົວລະພາ ແຂວງຄໍາມ່ວນ ໄດ້ນໍາເອົາແນວພັນເຂົ້າປູກທ່າດອກຄໍາ 8 ຈໍານວນ 6 ພັນກວ່າກິໂລ ໄປມອບໃຫ້ພໍ່ແມ່ປະຊາຊົນ 14 ບ້ານພາຍໃນເທສະບານເມືອງ.

  ພິທີມອບ-ຮັບໄດ້ມີຂຶ້ນໃນວັນທີ 22 ພຶດສະພາ ທີ່ບ້ານທົ່ງຂາມ, ໂດຍມີພໍ່ແມ່ປະຊາຊົນ 14 ບ້ານ ທີ່ຖືກຜົນກະທົບຈາກໄຟພິບັດນໍ້າຖ້ວມປີ 2018 ຜ່ານມາຄືບ້ານນາພະນັງ, ທ່າແຮ່, ນາສົມບູນ, ປ່າກ້ວຍໃຕ້, ນາປຸງ, ນາເປງ, ຕະຫຼອງ, ທົ່ງຂ້າມ, ບ້ານໂຄກ, ທ່າພະໂຈ້ນ,ຜ່າຂຽດ, ຫ້ວຍທ່າຫຼວງ, ນາພຽງລ້ານ ແລະບ້ານຫ້ວຍແຮດ,ເຂົ້າທີ່ນໍາມາມອບໃນຄັ້ງນີ້ມີທັງໝົດ 6.120 ກິໂລ ລວມມູນຄ່າ 30,6 ລ້ານກີບ ໂດຍໄດ້ຮັບທຶນຊ່ວຍເຫຼືອຈາກພະແນກກະສິກໍາ ແລະປ່າໄມ້ແຂວງຄໍາມ່ວນ. ຕ່າງໜ້າມອບແນວພັນເຂົ້າປູກຈໍານວນດັ່ງກ່າວໂດຍທ່ານ ທອງສຸກ ຫັດຕະນາກ ປະທານກວດກາພັກ-ລັດເມືອງ ແລະ ຮັບໂດຍອົງ ການຈັດຕັ້ງບ້ານ, ນາຍບ້ານທັງ 14 ບ້ານ.

  ທ່ານ ຄໍາຮູ້ ວົງພະຈັນ ຫົວໜ້າຫ້ອງການກະສິກໍາ ແລະປ່າໄມ້ເມືອງບົວລະພາໄດ້ແນະນໍາແນວພັນເຂົ້າປູກທ່າດອກຄໍາ 8 ລັກສະນະແນວພັນເຂົ້າແມ່ນລໍາຕົ້ນແຂງ, ໃບຫຼາຍ, ໃຫ້ຜົນຜະລິດສູງ, ກ່ອນຈະປັກດໍາຕ້ອງໃສ່ຝຸນຄອກເໜາະສົມ, ໄຖໃຫ້ເລີກ ແລະ ຄາດໃຫ້ແຫຼກໃຫ້ນໍ້າເໜາະສົມກັບພືດທີ່ຕ້ອງການ, ຫຼີກລ້ຽງປູກເຂົ້າທີ່ໂນນສູງບໍ່ມີນໍ້າເພາະອາດເຮັດໃຫ້ເຂົ້າບໍ່ງາມ ແລະໄດ້ຮັບຜົນຜະລິດໜ່ອຍສະມັດຕະພາບບໍ່ສູງ.

ຈາກນັ້ນ ທ່ານ ທອງສຸກ ຫັດຕະນາກ ກໍ່ໄດ້ໂອ້ລົມໂດຍຮຽກຮ້ອງໃຫ້ບັນດາການຈັດຕັ້ງບ້ານຕະຫຼອດຮອດພໍ່ແມ່ນປະຊາຊົນ, ຕ້ອງໄດ້ເພີ່ມທະວີຄວາມສາມັກຄີເປັນປືກແຜ່ນແໜ້ນໜາເພື່ອເຮັດໃຫ້ບ້ານຂອງຕົນເປັນລະບຽບຮຽບຮ້ອຍພ້ອມກັນເພີ່ມທະວີປູກຝັງ ແລະ ລ້ຽງສັດ ແລະ ພ້ອມກັນຮັກສາແນວພັນເຂົ້າໄວ້ເພື່ອໜູນວຽງເປັນກອງທຶນບ້ານເພື່ອຂະຫຍາຍແນວພັນໄວ້ໃຫ້ບ້ານທີ່ຂາດເຂີນໃນລະດູຜະລິດຕໍ່ໜ້າ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์