ເມືອງສຸຂຸມາ ເປີດຂະບວນທໍາລາຍແຫຼ່ງເພາະພັນໜອນນໍ້າ

 ເມືອງສຸຂຸມາ ແຂວງຈໍາປາສັກ ໄດ້ຈັດພິທີເປີດຂະບວນທໍາລາຍແຫຼ່ງເພາະພັນໜອນນໍ້າຍຸງລາຍເພື່ອສະກັດກັ້ນການລະບາດຂອງພະຍາດໄຂ້ຍຸງລາຍ, ພິທີດັ່ງກ່າວໄດ້ມີຂຶ້ນເມື່ອບໍ່ດົນມານີ້ຢູ່ທີ່ບ້ານໃໝ່ວັງໝາກແຊວໂດຍໃຫ້ກຽດເຂົ້າຮ່ວມຂອງທ່ານ ບົວລິນ ວົງພະຈັນ ຮອງເຈົ້າແຂວງຈໍາປາສັກ ທັງປະທານຄະນະກໍາ ມະການສະກັດກັ້ນ ແລະຄວບຄຸມພະຍາດຕິດຕໍ່ຂັ້ນແຂວງ, ທ່ານ ສົມສີ ມະນີນິນ ເຈົ້າເມືອງສຸຂຸມາ, ມີພະແນກການກ່ຽວຂ້ອງຂອງແຂວງ, ເມືອງ, ອໍານາດການປົກຄອງບ້ານ, ປະຊາຊົນ ແລະນັກຮຽນເຂົ້າຮ່ວມ.

  ທ່ານ ຄໍາໄພ ໄຊສົງຄາມ ຫົວໜ້າຫ້ອງການສາທາລະນະສຸກເມືອງ ສຸຂຸມາ ໃຫ້ຮູ້ວ່າ: ເມືອງສຸຂຸມາມີຈໍານວນຄົນເຈັບເປັນພະຍາດໄຂ້ຍຸງຈໍານວນ 66 ກໍລະນີ (ບໍ່ມີເສຍຊີວິດ) ຊຶ່ງເກີດໃນ 22 ບ້ານ ໃນນັ້ນບ້ານແສນເມືອງມີຄົນເຈັບເປັນພະຍາດໄຂ້ຍຸງຫຼາຍກວ່າໝູ່ ແລະໃນປີຜ່ານມາຢູ່ເມືອງສຸຂຸມາໄດ້ເກີດການລະ ບາດຂອງພະຍາດດັ່ງກ່າວໜັກສົມຄວນຄື: ທົ່ວເມືອງມີ 602 ກໍລະນີ, ເສຍຊີວິດ 3 ກໍລະນີ. ອີງໃສ່ຜົນການສໍາຫຼວດໜອນນໍ້າປະຈໍາອາທິດໃນປີ 2019 ນີ້ເຫັນວ່າສະພາບຄວາມໜາແໜ້ນຂອງໜອນນໍ້າສູງຫຼາຍໃນແຕ່ລະບ້ານເປັນຕົ້ນບ້ານໃໝ່ວັງໝາກແຊວ, ດັ່ງນັ້ນຈິ່ງຕ້ອງໄດ້ມີການປ້ອງກັນແຕ່ຫົວທີເພື່ອປ້ອງກັນການລະບາດຂອງພະຍາດໄຂ້ຍຸງ.

  ທ່ານ ບົວລິນ ວົງພະຈັນ ໄດ້ເນັ້ນໜັກໃຫ້ອໍານາດການປົກຄອງກໍ່ຄືທົ່ວສັງຄົມຈົ່ງໄດ້ເປັນເຈົ້າການເອົາໃຈໃສ່ສະກັດກັ້ນການລະບາດຂອງພະຍາດໄຂ້ຍຸງລາຍຢ່າງແຂງແຮງ, ພ້ອມນີ້ກໍ່ຊຸກຍູ້ໃຫ້ເຈົ້າໜ້າທີ່ແພດ, ໝໍໃຫ້ການຊ່ວຍເຫຼືອ, ປິ່ນປົວຄົນເຈັບຢ່າງໃກ້ຊິດ, ຈັດວາງກໍາລັງແພດ, ໝໍຢູ່ຕາມສູນປິ່ນປົວ, ສຸກສາລາ, ໂຮງໝໍແຫ່ງຕ່າງໆໃຫ້ພຽງພໍ.

  ໂອກາດດັ່ງກ່າວທ່ານຮອງເຈົ້າແຂວງຈໍາປາສັກ ພ້ອມດ້ວຍແຂກທີ່ເຂົ້າຮ່ວມໄດ້ລົງປະຕິບັດຕົວຈິງກ່ຽວກັບ 5 ປໍ ຢູ່ຕາມແຕ່ລະຄອບຄົວຂອງປະຊາຊົນເຊັ່ນ: ປິດຝາພາຊະນະທີ່ເກັບນໍ້າໃນເຮືອນ, ນອກເຮືອນເພື່ອບໍ່ໃຫ້ຍຸງມາໄຂ່ໃສ່, ປ່ຽນນໍ້າເຕົ້າດອກໄມ້, ປ່ອຍປາຫາງນົກຍຸງ ເພື່ອກິນໜອນນໍ້າ,ປັບປຸງບໍ່ໃຫ້ມີນໍ້າຄ້າງຂັງກະໂປະ, ກະປ໋ອງ ແລະແນະນໍາໃຫ້ປະຕິບັດເປັນປະຈໍາທຸກອາທິດ, ຖ້າເປັນໄຂ້ໃຫ້ໄປປິ່ນປົວຢູ່ໂຮງໝໍ ຫຼື ສຸກສາລາໃກ້ບ້ານ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์