ນາຍົກຈະເຂົ້າຮ່ວມກອງປະຊຸມສາກົນກ່ຽວກັບອະນາຄົດຂອງອາຊີ ທີ່ໂຕກຽວ

  ໃນວັນທີ 29 ພຶດສະພາ 2019, ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະຈະເດີນທາງເຂົ້າຮ່ວມກອງປະຊຸມສາກົນກ່ຽວກັບອະນາຄົດຂອງອາຊີຄັ້ງທີ 25, ຊຶ່ງຈະຈັດຂຶ້ນໃນວັນທີ 30-31 ພຶດສະພາ 2019 ທີ່ໂຕກຽວ, ປະເທດຍີ່ປຸ່ນ.

  ກອງປະຊຸມສາກົນກ່ຽວກັບອະນາຄົດຂອງອາຊີແມ່ນຈັດຂຶ້ນທຸກໆປີໂດຍສໍານັກຂ່າວໜັງສືພິມນິກເກຂອງຍີ່ປຸ່ນນັບແຕ່ປີ 1995 ເປັນຕົ້ນມາ, ຊຶ່ງໄດ້ເຊື້ອເຊີນບັນດາຜູ້ນໍາ ແລະຜູ້ບໍລິຫານຂັ້ນສູງຂອງພາກລັດ ແລະພາກເອກະຊົນລວມທັງອະດີດການນໍາ, ຜູ້ຊົງຄຸນນະວຸດທິ, ປະທານອົງການ, ສະຖາບັນຕ່າງໆທັງພາກພື້ນ ແລະ ສາກົນຂອງອາຊີ ແລະ ພາກພື້ນອື່ນໆເຂົ້າຮ່ວມເພື່ອແລກປ່ຽນທັດສະນະ ແລະ ວິໄສທັດຕໍ່ບັນຫາພົ້ນເດັ່ນທີ່ເກີດຂຶ້ນໃນພາກພື້ນແລະໃນໂລກຮ່ວມກັນ. ກອງປະຊຸມຄັ້ງນີ້ແມ່ນຈະດໍາເນີນໄປພາຍໃຕ້ຫົວຂໍ້: “ຄົ້ນຫາລະບຽບຂອງໂລກແບບໃໝ່ເພື່ອແກ້ໄຂຄວາມວຸ້ນວາຍໃນໂລກ (Seeking a new globalorder- overcoming the chaos)”.

  ໃນໂອກາດເຄື່ອນໄຫວຢູ່ປະເທດຍີ່ປຸ່ນຄັ້ງນີ້, ທ່ານ ທອງລຸນ ສີສຸລິດ ຈະຂຶ້ນກ່າວບົດປາໄສເພື່ອສະແດງທັດສະນະຂອງ ສປປ ລາວ ທີ່ປິ່ນອ້ອມຫົວຂໍ້ກອງປະ ຊຸມ, ຈະພົບປະສອງຝ່າຍກັບ ທ່ານ ຊິນໂຊະ ອາເບະ ນາຍົກລັດຖະມົນຕີຍີ່ປຸ່ນພ້ອມທັງເຂົ້າຮ່ວມເປັນສັກຂີພິຍານໃນພິທີລົງນາມເອກະສານແລກປ່ຽນໂຄງກາ ນພັດທະນາຊັບພະຍາກອນມະນຸດໃຫ້ແກ່ ສປປ ລາວ ເອກະສານແລກປ່ຽນອີກຈຳນວນໜຶ່ງ ແລະຮັບການເຂົ້າຢ້ຽມຂໍ່ານັບຈາກຜູ້ຕາງໜ້າອົງການແລະບໍລິສັດຈໍານວນໜຶ່ງ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์