ຫົງສາເຊັນສັນຍາໂຄງການຊົນລະປະທານ 5 ແຫ່ງ

   ພິທີເຊັນສັນຍາໂຄງການ-ສ້ອມແປງຊົນລະປະທານ 5 ແຫ່ງ ລະຫວ່າງຫ້ອງການກະສິກໍາ ແລະປ່າໄມ້ເຈົ້າຂອງໂຄງການກັບບໍລິສັດສີກັນໃຈກໍ່ສ້າງຂົວທາງເຄຫາສະຖານ ແລະຊົນລະປະທານຈໍາກັດຜູ້ດຽວ ໄດ້ຈັດຂຶ້ນໃນວັນທີ 23 ພຶດສະພາຜ່ານມານີ້ທີ່ຫ້ອງການດັ່ງກ່າວ, ໂດຍເຂົ້າຮ່ວມມີ ທ່ານ ພອນສະຫວັນ ໄຊສົມພັນ ຮອງເຈົ້າເມືອງໆຫົງສາ, ທ່ານ ວັນໄຊ ສີກັນໃຈ ຫົວໜ້າບໍລິສັດກໍ່ສ້າງຂົວທາງເຄຫາສະຖານ ແລະ ຊົນລະປະທານຈໍາກັດຜູ້ດຽວ, ມີພາກສ່ວນທີ່ກ່ຽວຂ້ອງຂອງເມືອງ ແລະນາຍບ້ານເທດສະບານເມືອງເຂົ້າຮ່ວມຢ່າງພ້ອມພຽງ.

ໃນພິທີຜູ້ເຂົ້າຮ່ວມໄດ້ຮັບຟັງຂໍ້ຕົກລົງຂອງທ່ານເຈົ້າເມືອງຫົງສາ ວ່າດ້ວຍການຮັບຮອງ ແລະມອບຮັບວຽກງານການກໍ່ສ້າງ-ສ້ອມແປງຊົນລະປະທານ 5 ແຫ່ງຄື: ໂຄງການຊົນລະປະທານຫ້ວຍຂີ້ໝົດບ້ານແທ່ນຄໍາມີມູນຄ່າທັງໝົດ 151  ລ້ານກວ່າກີບ,ໂຄງການຊົນລະປະທານຫ້ວຍເຍີບ້ານແທ່ນຄໍາ ມີມູນຄ່າທັງໝົດ 430 ລ້ານກວ່າກີບ, ໂຄງການຊົນລະປະທານນໍ້າແກນ 1 ບ້ານສີບຸນເຮືອງ ມີ ມູນຄ່າທັງໝົດ 2,6 ຕື້ກີບ, ໂຄງການຊົນລະປະທານນໍ້າເຫຼືອກ ບ້ານນາສ້ານ, ມີມູນຄ່າທັງໝົດ 150 ລ້ານກວ່າກີບ ແລະໂຄງການຊົນລະປະທານຫ້ວຍໄລ່ບ້ານຫ້ວຍໄລ່ມີມູນຄ່າທັງໝົດ 34 ລ້ານກວ່າກີບ,ຊຶ່ງການກໍ່ສ້າງສ້ອມແປງຊົນລະ ປະທານທີ່ຖືກຜົນກະທົບຈາກໄພທໍາ ມະຊາດລວມທັງ 5 ໂຄງການ ມີມູນ ຄ່າທັງໝົດ 4,3 ຕື້ກີບ ໃນຄັ້ງນີ້ໂດຍແມ່ນ ບໍລິສັດສີກັນໃຈກໍ່ສ້າງຂົວທາງເຄຫາສະ ຖານ ແລະຊົນລະປະທານຈໍາກັດຜູ້ດຽວເປັນຜູ້ຮັບເໝົາໃນການກໍ່ສ້າງ, ການກໍ່ສ້າງແມ່ນນໍາໃຊ້ງົບປະມານບ້ວງໂຄງການຟື້ນຟູສ້ອມແປງຊົນລະປະທານໂດຍແມ່ນພະແນກກະສິກໍາ ແລະປ່າໄມ້ ແຂວງໄຊຍະບູລີ ຮ່ວມກັບພະແນກແຜນການ ແລະການລົງທຶນແຂວງເປັນເຈົ້າການໃນການຂຶ້ນແຜນສະເໜີງົບປະມານ ຊໍາລະແຕ່ລະສົກປີ, ການກໍ່ສ້າງແມ່ນຈະ ໄດ້ລົງມືຈັດຕັ້ງປະຕິບັດແຕ່ວັນທີ 23 ເດືອນພຶດສະພາ 2019 ຫາວັນທີ 23 ພຶດສະພາ 2020 ຊຶ່ງໃຊ້ເວລາ 12 ເດືອນຈິ່ງຈະສໍາເລັດ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์