ປະຊາຊົນເກືອບພັນ ໃນສອງບ້ານແປງທາງເອງ

  ທ້າຍອາທິດຜ່ານມານີ້ປະຊາຊົນສອງບ້ານໆຫ້ວຍແສງ ແລະບ້ານໜອງຕົມ ເມືອງເລົ່າງາມ ແຂວງສາລະວັນ ໄດ້ຮ່ວມອອກແຮງງານກໍ່ສ້າງສ້ອມແປງເສັ້ນ ທາງເຂົ້າບ້ານທີ່ເປັນຈຸດຄ້ອຍຫ້ວຍນໍ້າອອກໂດຍການນໍາພາຂອງອົງການຈັດຕັ້ງບ້ານ ແລະການລົງຕິດຕາມຂອງຫ້ອງການໂຍທາທີການ ແລະຂົນສົ່ງເມືອງເລົ່າງາມຊຶ່ງມີຊາວໜຸ່ມ, ຍິງໜຸ່ມ ແລະປະຊາຊົນສອງບ້ານຮ່ວມອອກແຮງງານທັງໝົດ 909 ຄົນ, ຍິງ 443 ຄົນ.

  ທ່ານ ແອ ພອນສະຫວັນ ເລຂາໜ່ວຍພັກນາຍບ້ານໆຫ້ວຍແສງ ໄດ້ໃຫ້ຂໍ້ມູນວ່າ: ຜ່ານມາສະພາບການໄປມາຫາສູ່ລວມທັງການເຈັບປ່ວຍ, ການຂົນສົ່ງສິນ ຄ້າກະສິກໍາແມ່ນພົບຄວາມຫຍຸ້ງຍາກຫຼາຍເພາະເສັ້ນທາງເປັນຂຸມ ແລະເປັນຄ້ອຍສູງ, ໃນການກໍ່ສ້າງສ້ອມແປງເສັ້ນທາງທີ່ຈຸດຄ້ອຍຫ້ວຍນໍ້າອອກຄັ້ງນີ້ແມ່ນ

ໄດ້ນໍາໃຊ້ລົດໄຖໃຫຍ່ເພື່ອປັບລະດັບໜ້າທາງ, ໄດ້ລະດົມລົດຮຸ່ນໄດ, ລົດຕ໊ອກໆເພື່ອແກ່ອຸປະກອນຕ່າງໆ, ນອກນັ້ນຍັງໄດ້ລົງຫີນນ້ອຍ,ວາງຕາໜ່າງເຫຼັກ ແລະເທຊີມັງຊຶ່ງມີຄວາມຍາວ 100 ແມັດ,ກວ້າງ 2,5 ແມັດ,ໜາ 7 ຫາ 10 ຊັງຕີແມັດ,ທຶນທີ່ນໍາໃຊ້ເຂົ້າໃນການກໍ່ສ້າງສ້ອມແປງທາງໃນຄັ້ງນີ້ແມ່ນໄດ້ມາຈາກຫຼາຍພາກສ່ວນເປັນເງິນສົດ ແລະ ອຸປະກອນກໍ່ສ້າງເປັນຕົ້ນໄດ້ຈາກການປະກອບສ່ວນຈາກປະຊາຊົນບ້ານຫ້ວຍແສງເປັນເງິນ 12,6 ລ້ານກີບ, ບ້ານໜອງຕົມ 7 ແສນກີບ,

  ບ້ານພູດ້າມຂວັນ ເມືອງປາກຊ່ອງ ແຂວງຈໍາປາສັກ ເປັນເງິນ 8,5 ແສນກີບ, ກຸ່ມຜະລິດກາເຟຄຸນນະພາບພູຄໍາປະກອບສ່ວນປູນ 2 ໂຕນ, ກຸ່ມຜະລິດກາເຟຄຸນນະພາບຫ້ວຍແສງປະກອບສ່ວນປູນ 2 ໂຕນ ຊຶ່ງປະຈຸບັນແມ່ນໄດ້ນໍາໃຊ້ທຶນກໍ່ສ້າງໄປແລ້ວ 9 ລ້ານກວ່າກີບ.

  ທ່ານ ຈິດຕິໃສ ວິລະວົງ ວິຊາການຫ້ອງການໂຍທາທິການ ແລະ ຂົນສົ່ງເມືອງໄດ້ໃຫ້ການແນະນໍາຕໍ່ການສ້າງເສັ້ນທາງເປັນຕົ້ນແນະນໍາໃຫ້ເທຊີມັງເປັນຂອບເສັ້ນທາງເພື່ອປ້ອງກັນການເຊາະເຈື່ອນຂອງດິນ ແລະ ນໍາໃຊ້ນໍ້າທີ່ບໍ່ເປິເປື້ອນເກີນໄປເພາະຜ່ານການກວດກາເຫັນວ່າການກໍ່ສ້າງຍັງບໍ່ທັນຖືກຕາມເຕັກນິກວິຊາການເທົ່າທີ່ຄວນນອກນັ້ນພາຍຫຼັງທີ່ກໍ່ສ້າງເສັ້ນທາງສໍາເລັດແລ້ວຕ້ອງງົດການສັນຈອນປະມານ 10-15 ວັນ ເພື່ອເຮັດໃຫ້ເສັ້ນທາງແຂງແກ່ນ ແລະນໍາໃຊ້ໄດ້ຢ່າງຍາວນານ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์