ໂຮງຮຽນສາທາ ຄຳມ່ວນ ມອບໝວກຂາວໃຫ້ນັກສຶກສາ

ພິທີມອບໝວກຂາວ ແລະແສງທຽນໃຫ້ນັກສຶກສາຊັ້ງສູງພະຍາບານປີທີ I ຮຸ້ນທີ IV ສົກຮຽນ 2018-2019 ໄດ້ຈັດຂຶ້ນໃນວັນທີ 23 ພຶດສະພາ ຜ່ານມາ ທີ່ໂຮງ ຮຽນສາທາລະນະສຸກແຂວງຄຳມ່ວນ ໂດຍການເຂົ້າຮ່ວມຂອງທ່ານ ພາສຸກ ຄຳມະນີທອງ ຮອງຫົວໜ້າພະແນກສາທາລະນະສຸກແຂວງ, ທ່ານ ເຂັມພາວັນມະນີວົງ ອໍານວຍການໂຮງຮຽນສາທາລະນະສຸກ ແຂວງ, ມີຄະນະອຳນວຍການໂຮງໝໍແຂວງ, ພະນັກງານຄູ-ອາຈານແລະນັກສຶກສາພາຍໃນໂຮງຮຽນດັ່ງກ່າວເຂົ້າຮ່ວມ.

ໃນໂອກາດນີ້ທ່ານ ເຂັມພາວັນມະນີວົງ ໄດ້ເປັນກຽດມອບໝວກຂາວໃຫ້ແກ່ນັກສຶກສາພ້ອມນັ້ນກໍ່ໄດ້ຮັບຟັງປະຫວັດຂອງຜູ້ໃຫ້ກຳເນີດ ວິຊາຊີບພະຍາບານ ແລະຄວາມ ເປັນມາຂອງເຄື່ອງແບບພະຍາບານ ຊຶ່ງການແຕ່ງກາຍຂອງພະຍາບານ ໃນເວລາທີ່ກຳລັງປະຕິບັດວຽກງານຈະຕ້ອງສວມເຄື່ອງແບບສີ ຂາວ, ໝວກກໍ່ເປັນສ່ວນໜຶ່ງຂອງ ເຄື່ອງແບບພະຍາບານ ຊຶ່ງສະແດງ ເຖິງການເສຍສະຫຼະສ່ວນຕົວເພື່ອ ຊ່ວຍເຫຼືອຜູ້ອື່ນສ່ວນສັນຍາລັກເທິງ ໝວກຈະເປັນເຄື່ອງຊີ້ບອກໃຫ້ຮູ້ວ່າ ພະຍາບານຜູ້ນັ້ນຢູ່ໃນຕຳແໜ່ງຫຍັງ ແຕ່ໃນລັກສະນະຂອງພະຍາບານ ແລ້ວໝວກມີຈຸດປະສົງເພື່ອປົກຄຸມ ຜົມບໍ່ໃຫ້ຕົກຫຼົ່ນລົງມາໃສ່ຄົນເຈັບໃນເວລາກຳລັງເຮັດວຽກ, ການ ປ່ຽນແປງ ແລະມີການພັດທະນາໃນ ເລື່ອງໝວກເປັນພຽງສ່ວນໜຶ່ງຂອງເຄື່ອງແບບ ຫຼື ບອກໃຫ້ຮູ້ວ່າພະຍາບານຜູ້ນັ້ນສຳເລັດຈາກສະຖາບັນ ການສຶກສາໃດ. ສະນັ້ນໝວກຈຶ່ງ ເປັນເຄື່ອງແບບທີ່ມີກຽດຕິຍົດ ແລະ ເປັນສ່ວນໜຶ່ງຂອງອາຊີບພະຍາ ບານ. ສ່ວນແສງທຽນແມ່ນປຽບ ເໝືອນແສງສະຫວ່າງທີ່ນຳພາໄປສູ່ຄວາມສຳເລັດ. 

ໃນໂອກາດດຽວກັນທ່ານພາສຸກຄຳມະນີທອງຍັງໄດ້ຮຽກຮ້ອງມາຍັງນັກສຶກສາທຸກຄົນຈົ່ງຕັ້ງໃຈຮໍ່າຮຽນ ແລະຮັກອາຊີບພະຍາບານຢ່າງແທ້ຈິງໃນເວລາປະຕິບັດວຽກງານຕົວຈິງກໍ່ຕ້ອງມີຄວາມອົດທົນເຂັ້ມແຂງ, ຮັບໃຊ້ພໍ່ແມ່ປະຊາຊົນ, ເວົ້າຈາສຸພາບເຄົາລົບນັບຖືຄູ-ອາຈານ  ແລະເອົາໃຈໃສ່ປິ່ນປົວຄົນເຈັບດ້ວຍຄວາມຈິງໃຈ, ຮັກສາຄົນເຈັບປຽບສະເໜືອນຄົນໃນຄອບຄົວ, ບໍ່ຈຳແນກຄົນເຈັບບໍ່ວ່າຈະເປັນຄົນ ໂທດ, ຄົນມີຖານະອື່ນໆ. ຊຶ່ງນັກສຶກ ສາພະຍາບານຊັ້ນສູງຮຸ້ນ IV ມີ 55 ຄົນ, ຍິງ 42 ຄົນ.

ໂດຍ: ມະນີວັນ

แชร์