ທາງຫຼວງທ້ອງຖິ່ນເຂດກຸ່ມບ້ານເມືອງນາ ເມືອງກວັນສຳເລັດກວ່າ 30%

  ຕາມການໃຫ້ຮູ້ຂອງ ທ່ານ ວັນໄຊ ໄຊຍະທຳ ວິຊາການຂະແໜງຂົວທາງພະແນກໂຍທາທິການ ແລະຂົນສົ່ງແຂວງຫົວພັນ ຊຶ່ງເປັນວິຊາການຜູ້ຕິດຕາມໂຄງ ການກໍ່ສ້າງທາງຫຼວງທ້ອງຖິ່ນເສັ້ນທາງ 3249 ເລີ່ມແຕ່ຈຸດແຍກບ້ານລ້ອງກວ້າງຫາບ້ານຍອດບໍ ເມືອງກວັນ ແຂວງຫົວພັນ ສຳເລັດແລ້ວ 35% ຂອງໜ້າວຽກທັງໝົດທາງເສັ້ນນີ້ນອນໃນໂຄງການສ້ອມແປງຂົວທາງໄລຍະ 2 ສ້ອມແປງປົກກະຕິຊຶ່ງເລີ່ມປະຕິບັດມາແຕ່ຕົ້ນເດືອນມັງກອນ 2018 ໂດຍມີ 3 ບໍລິ ສັດຮັບເໝົາຮ່ວມກັນຄື: ບໍລິສັດພັດທະນາກະສິກໍາກ່ໍສ້າງຂົວທາງ,ບໍລິສັດຈະເລີນຊຳກໍ່ສ້າງ ແລະບໍລິສັດພິ່ງແກ້ວ ກໍ່ສ້າງຂົວທາງ,ປະຈຸບັນບັນດາບໍລິສັດຜູ້ຮັບເໝົາພວມສຸມໃສ່ຂະຫຍາຍໜ້າທາງ,ລະເບີດຫີນ,ກໍ່ສ້າງລະບົບລະບາຍນໍ້າໃຫ້ສຳເລັດ,ລົງຊັ້ນປູແຮ່ໜ້າທາງ ແລະປູຢາງຢູ່ໃນຂອບເຂດບ້ານປະຊາຊົນໂຄງການນີ້ມີຄວາມຍາວທັງໝົດ 14 ກິ ໂລແມັດ, ໜ້າທາງກວ້າງ 5 ແມັດ ແລະ ມີມູນຄ່າກໍ່ສ້າງທັງໝົດ 11 ຕື້ 800 ລ້ານກີບ ໂດຍແມ່ນທຶນຊ່ວຍເຫຼືອຈາກທະ ນາຄານໂລກ.

  ທ່ານກ່າວອີກວ່າດ້ວຍຄວາມຮັບຜິດຊອບຂອງບໍລິສັດຜູ້ຮັບເໝົາບວກໃສ່ການໃຫ້ຄວາມຮ່ວມມືຂອງແຕ່ລະທຸກພາກສ່ວນນັບແຕ່ແຂວງ, ເມືອງ ແລະປະຊາຊົນພາຍໃນເຂດກຸ່ມບ້ານດັ່ງກ່າວເປັນຢ່າງດີຈ່ິງເຮັດໃຫ້ການປະຕິບັດໜ້າວຽກຕ່າງໆດຳເນີນໄດ້ສະດວກດີຄາດວ່າການກໍ່ສ້າງຈະໃຫ້ສຳເລັດກ່ອນຊ່ວງ  ລະດູຝົນປີນີ້ຖ້າດິນຟ້າເອື້ອອຳນວຍ, ຖ້າດິນຟ້າບໍ່ອຳນວຍແມ່ນຮອດທ້າຍປີຈະໃຫ້ສຳເລັດ.

  ທ່ານ ໄມຄຳ ພິມມະສອນ ເຈົ້າເມືອງໆກວັນກ່າວວ່າ: ສຳລັບກຸ່ມບ້ານເມືອງນາມີທັງໝົດ 11 ບ້ານ, ພົນລະເມືອງ 4 ພັນກວ່າຄົນເປັນເຂດທີ່ນອນຢູ່ຈຸດໃຈ ກາງຂອງເມືອງກວັນ ແລະມີດິນດຳນໍ້າ ຊຸມອຸດົມສົມບູນ ຊຶ່ງເໝາະແກ່ການຜະລິດກະສິກຳຕ່າງໆເປັນຕົົ້ນແມ່ນປູກຝັງ, ລ້ຽງສັດນອກນີ້ເອື້ອຍນ້ອງແມ່ຍິງຍັງມີສີໄມ້ລາຍມືອັນປານີດໃນການຕຳຜ້າແພໄໝມ້ອນສະນັ້ນແຂວງຫົວພັນຈິງໄດ້ກຳນົດເອົາຈຸດນີ້ໃຫ້ກາຍເປັນເຂດຈຸດສຸມພັດທະນາໂດຍເລັ່ງໃສ່ບັນດາທ່າແຮງທີ່ມີຂອງບ້ານເປັນຕົ້ນຕໍເພື່ອຜະລິດເປັນສິນຄ້າສົ່ງອອກທັງພາຍໃນ ແລະ ຕ່າງປະເທດນັບມື້ໃຫ້ຫຼາຍຂຶ້ນ.

  ທ່ານກ່າວຕື່ມອີກວ່າ: ກ່ອນທີຍັງບໍ່ມີເສັ້ນທາງເຂົ້າເຖິງຊີວິດການເປັນຢູ່ຂອງພໍ່ແມ່ປະຊາຊົນເຂດນີ້ພົບຄວາມຫຍຸ້ງຍາກຫຼາຍໂດຍສະເພາະແມ່ນການໄປມາໃນຊວງລະດູຝົນພາຍຫຼັງທີ່ໄດ້ຮັບທຶນໃນການກໍ່ສ້າງທາງເຂົ້າມາສູ່ເຂດນີ້ເຫັນວ່າສະດວກດີຂຶ້ນປະຊາຊົນກໍ່ເປັນເຈົ້າການໃຫ້ຄວາມຮ່ວມມືກັບບໍລິສັດຜູ້ຮັບເໝົາເປັນຢ່າງດີພ້ອມທັງເອື້ອອຳນວຍຄວາມສະດວກຫຼາຍໆຢ່າງເຮັດໃຫ້ການປະຕິບັດໜ້າທີ່ຂອງບໍລິສັດບັນລຸຕາມແຜນທີ່ວາງໄວ້.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์