ສຕລ ຕ້ອນຮັບຄະນະຄູຝຶກ ແລະນັກກີລາທີມຊາດຍິງ ຢູ15

ສະຫະພັນບານເຕະແຫ່ງ ຊາດລາວ (ສຕລ) ໄດ້ຈັດງານ ລ້ຽງຕ້ອນຮັບຄະນະຄູຝຶກ ແລະ ນັກກີລາທີມຊາດຍິງລາວ  ຮຸ່ນອາຍຸ ບໍ່ເກີນ 15 ປີ ທີ່ສາມາດສ້າງຜົນງານໄດ້ໂດດເດັ່ນຄວ້າອັນດັບ 2 ໃນລາຍການແຂ່ງຂັນບານເຕະຍິງ ຊີງແຊ້ມອາຊຽນ ຮຸ່ນອາຍຸບໍ່ເກີນ 15 ປີ ຫຼື AFF U15 GIRLS’ CHAMPIONSHIP 2019 ທີ່ຮ້ານອາຫານຕຳນັກລາວໃນວັນທີ 23 ພຶດສະພາ ໂດຍການເຂົ້າຮ່ວມທ່ານ ນາງ ແສງເດືອນ ຫຼ້າຈັນທະ ບູນ ລັດຖະມົນຕີກະຊວງສຶກສາທິການ ແລະກີລາພ້ອມດ້ວຍພາກ ສ່ວນ ກ່ຽວຂ້ອງ.

ທ່ານ ນາງ ກັນຍາແກ້ວມະນີເລຂາທິການ ສຕລທັງເປັນຫົວໜ້າອະນຸກຳມະການບານເຕະຍິງໄດ້ຂຶ້ນລາຍງານກ່ຽວກັບຜົນສຳເລັດຂອງທີມຊາດຍິງລາວຮຸ່ນອາຍຸບໍ່ເກີນ 15 ທີ່ສາມາດຄວ້າອັນດັບ 2 ໃນການແຂ່ງຂັນຄັ້ງນີ້.ສຳລັບການກຽມທີມແມ່ນຄະນະຄູຝຶກໄດ້ມີການກຽມຄວາມພ້ອມ ໂດຍການ ເປີດຮັບສະໝັກຄັດເລືອກນັກກີລາທີ່ມີພອນສະຫວັນທົ່ວປະເທດສົມທົບ ກັບນັກກີລາລຸ້ນເຍົາວະຊົນຂອງທີມຊາດລາວທີ່ເຄີຍເຂົ້າຮ່ວມການແຂ່ງຂັນໃນປີທີ່ຜ່ານມາແລະຍັງມີເກນອາຍຸທີ່ເຂົ້າຮ່ວມແຂ່ງຂັນຄັ້ງນີ້ໄດ້ ຊຶ່ງການຄັດເລືອກຄັ້ງທຳອິດແມ່ນຄັດໄດ້ຈຳນວນ 50 ຄົນ ແລະສຸດທ້າຍຄັດເຫຼືອ 21 ຄົນເຂົ້າຮ່ວມ ແຂ່ງຂັນ.

ການແຂ່ງຂັນຄັ້ງນີ້ເປັນຄັ້ງທີ 3 ທີ່ສະຫະພັນບານເຕະແຫ່ງຊາດລາວສົ່ງທີມລາວເຂົ້າຮ່ວມແຂ່ງຂັນໂດຍຜົນງານທີ່ຜ່ານມາປີ 2017 ຊຶ່ງເປັນຄັ້ງທຳອິດທີ່ເຂົ້າຮ່ວມລາຍການນີ້ລາວເຮົາໄດ້ຮັບກຽດເປັນເຈົ້າພາບບໍ່ສາມາດຜ່ານຮອບແບ່ງກຸ່ມໄດ້, ປີ 2018 ທີ່ປະເທດອິນໂດເນເຊຍເປັນເຈົ້າພາບທີມຊາດຍິງລາວ  ຮຸ່ນອາຍຸບໍ່ເກີນ15 ປີເຂົ້າຮ່ວມການ ແຂ່ງຂັນເຮັດຜົນງານໄດ້ໂດດເດັ່ນ ຜ່ານເຂົ້າສູ່ຮອບຮອງຊະນະເລີດສາມາດຍາດໄດ້ອັນດັບ 4 ປີ 2019 ທີມຊາດລາວສາມາດສ້າງປະຫວັດສາດໄດ້ສຳເລັດຜ່ານເຂົ້າຮອບຊີງຊະນະເລີດແຕ່ພາດທ່າເສຍໃຫ້ທີມຊາດໄທດ້ວຍການເຕະຈຸດໂທດ5-3ໂດຍເວລາປົກກະຕິສະເໝີ 0-0.

ໂດຍ: ເຂີຍບ້ານຫ້ອມ

แชร์