ສະຫວັນນະເຂດເປີດງານວາງສະແດງລົດຍົນ

 ສະພາການຄ້າ ແລະອຸດສາຫະກຳແຂວງສະຫວັນນະເຂດ ຮ່ວມກັບສູນການຄ້າສະຫວັນ-ໄອເຕັກ ແລະບໍລິສັດທິບພະຍະປະກັນໄພ ໄດ້ຈັດງານວາງສະແດງລົດ ຍົນ ຄັ້ງທີ I ຫຼື SAVAN NAKHET FIRST MOTOR SHOW ຂຶ້ນໃນວັນທີ 23 ພຶດສະພານີ້,ທີ່ສູນການຄ້າສະຫວັນ-ໄອເຕັກ ໂດຍການເຂົ້າຮ່ວມຂອງທ່ານ ທ່ອນແກ້ວ ພຸດທະ ໄກຍະລາດ ຮອງເຈົ້າແຂວງສະຫວັນນະເຂດ, ທ່ານ ວໍລະວຸດ ພົງປຣະພາພັນ ກົງສູນໃຫຍ່ແຫ່ງຣາຊະອານາຈັກໄທປະຈຳແຂວງ, ທ່ານ ເລືອງໄຊ ບຸນໂຊກວັນ ປະທານສະພາການຄ້າ-ອຸດສາຫະ ກຳແຂວງ, ມີແຂກຖືກເຊີນບັນດາຫົວໜ່ວຍທຸລະກິດເຂົ້າຮ່ວມ.

  ໂອກາດນີ້, ທ່ານ ຄຳເພົ້າ ພັນທຸລັກ ຮອງປະທານສະພາການຄ້າ-ອຸດສາຫະກຳແຂວງໄດ້ລາຍງານໃຫ້ຮູ້ວ່າ: ຈຸດປະສົງຂອງການຈັດງານໃນຄັ້ງນີ້ກໍ່ເພື່ອເປັນການ ໂຄສະນາ ແລະສົ່ງເສີມທຸລະກິດ ຮ້ານຂາຍລົດພາຍໃນແຂວງສະ ຫວັນນະເຂດໃຫ້ມີຕະຫຼາດທີ່ກວ້າງຂວາງ, ມີຍອດຈຳໜ່າຍເພີ່ມຂຶ້ນທັງເປັນເວທີໜຶ່ງໃນການແລກປ່ຽນຂໍ້ມູນຂ່າວສານລະຫວ່າງຜູ້ປະກອບການດ້ວຍກັນ ແລະ ລະຫວ່າງຜູ້ປະກອບການກັບລູກຄ້າ,ນອກນັ້ນຍັງເປັນການເກັບກຳຂໍ້ມູນຄວາມຕ້ອງການຂອງຜູ້ຊົມໃຊ້ລົດເພື່ອນຳໄປປັບປຸງຜະລິດຕະພັນ ແລະການບໍລິການໃຫ້ມີຄຸນນະພາບດີຂຶ້ນກວ່າເກົ່າ.

  ພາຍໃນງານມີຫົວໜ່ວຍທຸລະກິດຕ່າງໆເຂົ້າຮ່ວມທັງໝົດ 56 ຫົວໜ່ວຍ ໃນນັ້ນ ມີຮ້ານຂາຍລົດ ໃຫຍ່ 10 ຫົວໜ່ວຍ, ລົດຈັກ 3 ຫົວໜ່ວຍ, ສະຖາບັນການເງິນ-ການທະນາຄານ 4 ຫົວໜ່ວຍ, ຮ້ານຂາຍເຄື່ອງອາໄຫຼ່ ແລະຕົກ ແຕ່ງເຄື່ອງສຽງລົດ 4 ຫົວໜ່ວຍ, ບໍລິສັດປະກັນໄພ 1 ຫົວໜ່ວຍ ແລະຮ້ານຂາຍເຄື່ອງທົ່ວໄປອີກ ຈຳນວນ 34 ຫົວໜ່ວຍ, ຊຶ່ງງານວາງສະແດງຈະດຳເນີນໄປເປັນເວລາ 5 ວັນນັບແຕ່ວັນທີ 22-26 ພຶດສະພາ 2019 ແລະໃນແຕ່ລະວັນແມ່ນມີກິດຈະກຳທີ່ຫຼາກ ຫຼາຍເປັນຕົ້ນ: ການແຂ່ງຂັນເຄື່ອງ ສຽງລົດຍົນ, ງານໂຄສະນາປະຊາ ສຳພັນຂອງຕົວແທນຈຳໜ່າຍລົດແຕ່ລະຮຸ່ນ, ກິດຈະກຳເຕັ້ນມາສ ຄອດຂອງບໍລິສັດທິບພະຍະປະກັນໄພ, ການແຂ່ງຂັນສິລະປະ-ວັນນະຄະດີຂອງນັກຮຽນຊັ້ນປະຖົມ, ງານຄອນເສີດ, ພິເສດແມ່ນມີການຫຼິ້ນເກມແຈກ, ແຖມຂອງລາງວັນໃນແຕ່ລະມື້ເພື່ອເຮັດໃຫ້ງານດັ່ງກ່າວມີສີສັນ ແລະຟົດຟື້ນ.

ພາບ ແລຂ່າວໂດຍ: ໜັງສືພິມເສດຖະກິດ-ສັງຄົມ

แชร์