ຕາດເຍືອງ ມົນສະເໜແຫຼ່ງທ່ອງທ່ຽວນໍ້າຕົກ

ຕາດເຍືອງເປັນສະຖານທີ່ທ່ອງທ່ຽວນໍ້າຕົກສວຍສົດງົດງາມແລະມີຄວາມໂດດເດັ່ນດ້ານທຳມະ ຊາດ, ເປັນນໍ້າຕົກທີ່ສວຍງາມແຫ່ງໜຶ່ງຂອງແຂວງຈຳປາສັກ, ສາຍນໍ້າທີ່ໄຫຼລົງມາຈາກໜ້າຜາອັນສູງ ຊັນຊຶ່ງເຮັດໃຫ້ນໍ້າແຕກກະເດັນເປັນລະອອງນໍ້າທີ່ງົດງາມ ແລະຍັງມີ ຈຸດຊົມວິວສຳລັບຖ່າຍຮູບ, ເປັນສະຖານທີ່ທ່ອງທ່ຽວທີ່ເໝາະແກ່ການພັກຜ່ອນຢ່ອນໃຈ.

ອີງຕາມຂໍ້ມູນຈາກແຂວງຈໍາ ສັກໃຫ້ຮູ້ວ່າ: ນໍ້າຕົກຕາດເຍືອງ ຕັ້ງຢູ່ບ້ານຫຼັກ 40 ເມືອງປາກຊ່ອງ ແຂວງຈໍາປາສັກຫ່າງຈາກບ້ານໄປທາງທິດຕາເວັນຕົກສ່ຽງໃຕ້ປະມານ 1,3 ກິໂລແມັດ, ຫ່າງຈາກຕົວເມືອງປາກຊ່ອງມາທາງທິດຕາເວັນຕົກ 10 ກິໂລແມັດ, ຕາດເຍືອງເປັນຕາດສູງຊັນປະມານ50 ແມັດ,  ແບ່ງເປັນ 2ຖ້ານ, ຖ້ານເທິງ 10 ແມັດ ແລະຖ້ານລຸ່ມ 4-5 ແມັດ.ອ້ອມຂ້າງບໍລິເວນຕາດເຍືອງແມ່ນເຂດປ່າສະຫງວນຊຶ່ງມີເນື້ອ ທີ່ທັງໝົດ 129.000 ເຮັກຕາ, ກ່ອນຈະເອີ້ນວ່າ “ຕາດເຍືອງ” ກໍຍ້ອນວ່າຄາວປູ່ເຍີຜູ້ມາອາໄສຢູ່ຖິ່ນຖານແຫ່ງນີ້ເປັນບ່ອນດຳລົງຊີວິດ, ຊອກຢູ່ຫາກິນຕາມສາຍຫ້ວຍບັ້ງ ລຽງ ເຂດນີ້ເຄີຍພົບເຫັນເຍືອງ 2 ໂຕ ໂຕຜູ້ກັບໂຕແມ່ອາໄສຢູ່ໃນຖໍ້າດ້ານລຸ່ມຕາດເພື່ອຊອກຫາກິນຕາມພາສາຂອງສັດຊຶ່ງບ່ອນເຍືອງອາໄສຢູ່ເປັນຖໍ້າກວ້າງປະມານ 3 ແມັດ, ຍາວປະມານ 3 ແມັດ ແລະ ດ້ານໜຶ່ງສາຍຫ້ວຍຍ່ານນີ້ມີ 3-4 ຕາດ, ລຸ່ມຕາດມີຕາດນ້ອຍແຫ່ງໜຶ່ງ ທີ່ມີຄວາມສູງປະມານ 3 ແມັດ ເປັນພະລານຫີນຍາວຈົນຮອດຫົວຕາດໄຮ ຊຶ່ງຕາດນ້ອຍແຫ່ງນີ້ກວ້າງປະມານ 10-12 ແມັດແລະ 2 ສາຂາຕາດທີ່ຊາວບ້ານເອີ້ນວ່າ “ຕາດຜັນ” ສູງປະມານ 2-6 ແມັດເພື່ອງ່າຍ ແລະສະດວກຕໍ່ການຈື່ ຈໍາຂົງເຂດບໍລິເວນນີ້ປະຊາຊົນຈຶ່ງ ໄດ້ໃສ່ຊື່ຕາດແຫ່ງນີ້ວ່າ: “ຕາດ ເຍືອງ” ມາເທົ່າທຸກວັນນີ້.

ສໍາລັບຈຸດເດັ່ນຂອງຕາດແຫ່ງນີ້ທີ່ນັກທ່ອງທ່ຽວສ່ວນຫຼາຍປະທັບໃຈທີ່ສຸດໃນການມາທ່ຽວແມ່ນການມາຜ່ອນຄາຍສຳຜັດອາກາດທີ່ບໍລິສຸດເພີດເພີນກັບການຊົມວິວທຳມະຊາດອັນສວຍງາມຊຶ່ງສາຍນໍ້າຕາດສີຂາວໄຫຼລຽງຕາມຜາທີ່ກະທົບໃສ່ຫີນແລ້ວແຕກກະເດັນເປັນລະອອງສີຂາວສວຍງາມ,ກົງກັນຂ້າມກັບຫີນສີດຳທີ່ນໍ້າຕົກໃສ່ ທ່າມກາງບັນຍາກາດທີ່ສົດຊື່ນແລະມີຄວາມຮູ້ສຶກເໝືອນເປັນອິດສະຫຼະ. ນອກນັ້ນ, ຕາດເຍືອງຍັງມີຈຸດຊົມວິວຖ່າຍພາບອັນສວຍ ງາມ, ການຍ່າງປ່າແຕ່ຕາດເຍືອງ ໄປຫາຕາດຟານ, ການຍ່າງຜະຈົນໄພທີ່ໜ້າຕື່ນຕາຕື່ນໃຈ ແລະເປັນທີ່ປະທັບໃຈຂອງນັກທ່ອງທ່ຽວເປັນຢ່າງດີ. 

ນສພເສດຖະກິດ-ສັງຄົມ

แชร์