ນວ ແລກປ່ຽນວຽກງານກີລາ-ກາຍະກຳ ກັບເມືອງໜອງງົວຊໍ

ຄະນະນຳແລະພະນັກງານພະແນກສຶກສາທິການແລະກີລານະຄອນຫຼວງວຽງຈັນ (ນວ) ສປປ ລາວຮ່ວມແລກປ່ຽນບົດຮຽນດ້ານວຽກງານກີລາ-ກາຍະກຳກັບເມືອງໜອງງົວຊໍແຂວງອຸດອນທານີປະເທດໄທດ້ວຍການແຂ່ງຂັນກີລາ ເຕະບານມິດຕະພາບນັດພິເສດເຊື່ອມສາຍສຳພັນ 2 ຝັ່ງຂອງທັງ ເປັນການຮັດແໜ້ນຄວາມສາມັກຄີໃນຖານະພີ່ນ້ອງບ້ານໃກ້ເຮືອນຄຽງໃຫ້ມີຄວາມແໜ້ນແຟ້ນຍິ່ງຂຶ້ນ.

ການແລກປ່ຽນບົດຮຽນຂອງ ຄະນະນຳພະແນກສຶກສາທິການແລະກີລານະຄອນຫຼວງວຽງຈັນໃນຄັ້ງນີ້ມີຂຶ້ນລະຫວ່າງວັນທີ 17-18 ພຶດສະພາຜ່ານມາທີ່ຫ້ອງວ່າການປົກຄອງເມືອງໜອງງົວຊໍ ແຂວງອຸດອນທານີ,ຊຶ່ງນຳໂດຍທ່ານຊົມພູ ແກ້ວປັນຍາຫົວໜ້າພະແນກສຶກສາທິການ ແລະກີລານະຄອນຫຼວງ ວຽງຈັນ ພ້ອມດ້ວຍຄະນະ ແລະ ໃຫ້ກຽດຕ້ອນຮັບຂອງທ່ານອຸໄລວັນລັດຕະນະເດດອຸດົມຮອງເຈົ້າເມືອງ ໜອງງົວຊໍ ພ້ອມດ້ວຍພາກສ່ວນທີ່ກ່ຽວຂ້ອງທັງ 2 ຝ່າຍເຂົ້າຮ່ວມ ຢ່າງພ້ອມພຽງ.

ທ່ານ ອຸໄລວັນລັດຕະນະເດດ ອຸດົມໄດ້ກ່າວສະແດງຄວາມຕ້ອນຮັບອັນອົບອຸ່ນມາຍັງຄະນະນຳຈາກ ພະແນກສຶກສາທິການແລະກີລາ ນະຄອນຫຼວງວຽງຈັນ ທີ່ໄດ້ເສຍສະຫຼະເວລາອັນມີຄ່າເດີນທາງມາຢ້ຽມຢາມ ແລະແຂ່ງຂັນກີລາເຕະບານມິດຕະພາບເພື່ອເຊື່ອມສາຍສຳພັນ 2 ຝັ່ງຂອງຊຶ່ງເປັນນິມິດໝາຍສຳຄັນ ເພື່ອປູທາງໄປສູ່ການຮ່ວມມືໃນ ຫຼາຍໆດ້ານໃນອະນາຄົດ.ໂອກາດດຽວກັນ, ທ່ານ ຊົມພູ  ແກ້ວປັນຍາ ໄດ້ຕາງໜ້າຄະນະນຳຈາກ ພະແນກສຶກສາທິການ ແລະກີລາ ນະຄອນຫຼວງວຽງຈັນກ່າວສະແດງ ຄວາມຂອບໃຈເປັນຢ່າງສູງຕໍ່ການນຳເມືອງໜອງງົວຊໍທີ່ໄດ້ໃຫ້ການ ຕ້ອນຮັບຢ່າງອົບອຸ່ນ ແລະສົມກຽດ, ຫວັງວ່າການມາຢ້ຽມຢາມຄັ້ງນີ້ຈະ ເປັນບາດກ້າວທຳອິດໃນການສືບຕໍ່ຮ່ວມມືກັນໃນຫຼາຍໆດ້ານລະຫວ່າງ ພະແນກສຶກສາທິການ ແລະກີລານະຄອນຫຼວງວຽງຈັນ ແລະເມືອງ ໜອງງົວຊໍ ແຂວງອຸດອນທານີເວົ້າລວມ, ເວົ້າສະເພາະແມ່ນການຮ່ວມມືດ້ານວຽກງານການສຶກສາ ແລະ ກີລາໃນອະນາຄົດ.

ຫຼັງຈາກນັ້ນໄດ້ມີແຂ່ງຂັນກີລາ ເຕະບານມິດຕະພາບນັດພິເສດລະຫວ່າງທີມວີໄອພີພະແນກສຶກສາທິການແລະກີລານະຄອນຫຼວງວຽງຈັນພົບກັບທີມວີໄອພີ  ເມືອງໜອງ ງົວຊໍຄັ້ງນີ້ປະກົດວ່າທັງ 2 ທີມເຮັດໄດ້ພຽງສະເໝີກັນ 2-2 ປະຕູ ຊຶ່ງໃນໄລຍະການ ແຂ່ງຂັນແມ່ນເຕັມໄປ ດ້ວຍຟົດຟື້ນ ແລະເບີກບານມ່ວນ ຊື່ນນັກກີລາທັງ 2 ຝ່າຍຫຼິ້ນກັນດ້ວຍ ໄມຕີຈິດມິດຕະພາບ ແລະຮູ້ໃຫ້ອະໄພເຊິ່ງກັນແລະກັນສົມກັບວ່າແຂ່ງຂັນກີລາເພື່ອມິດຕະພາບຢ່າງແທ້ຈິງ.

ໂດຍ: ເຂີຍບ້ານຫ້ອມ

แชร์