ເມືອງທ່າແຕງ ຕັ້ງເປົ້າໝາຍການສົ່ງອອກໃຫ້ບັນລຸ 44,42 ຕື້ກີບ

  ຂະແໜງອຸດສາຫະກໍາ ແລະ ການຄ້າເມືອງທ່າແຕງແຂວງເຊກອງວາງຄາດໝາຍໃນປີນີ້ຈະສູ້ຊົນສົ່ງອອກສິນຄ້າໃຫ້ບັນລຸໄດ້ 44 ຕື້ກວ່າກີບ, ທັງນີ້ກໍເນື່ອງຈາກການຜະລິດກະສິກຳ (ປູກຝັງລ້ຽງສັດ) ເປັນສິນຄ້າທີ່ນັບມື້ນັບຂະຫຍາຍຕົວເພີ່ມຂຶ້ນຊຶ່ງຈະເປັນທ່າແຮງໃຫ້ແກ່ການສົ່ງອອກໃນປີນີ້, ຂະນະທີ່ປີຜ່ານມາການສົ່ງອອກບັນລຸ 42 ຕື້ກີບ.

  ທ່ານ ຄອນສະຫວັນ ພັນໂຊດ ຫົວໜ້າຫ້ອງການອຸດສາຫະກຳ ແລະການຄ້າເມືອງທ່າແຕງໃຫ້ຮູ້ວ່າ: ປະຈຸບັນເມືອງທ່າແຕງມີໜໍ່ແໜງຫຼາຍຂຶ້ນສຳລັບການຜະລິດເປັນສິນຄ້າໂດຍສະເພາະແມ່ນສິນຄ້າກະສິກຳພວມໄດ້ຮັບການພັດທະນາຢ່າງແຂງແຮງເຊັ່ນ: ມັນຕົ້ນ, ກາເຟ, ໝາກແໜ່ງ, ຢາງພາລາ, ຜັກກາດຫໍ່, ກະລໍ່າປີ ແລະສາລີທີ່ເຫັນວ່າໄດ້ຮັບຄວາມສົນໃຈຈາກນັກທຸລະກິດພາຍໃນ ແລະ ຕ່າງປະເທດລົງທຶນກໍຄືປະຊາຊົນພາກັນປູກຫຼາຍຂຶ້ນ, ອັນນີ້ຈະເປັນພື້ນ ຖານໃຫ້ແກ່ການສົ່ງອອກຫຼາຍຂຶ້ນໃນອະນາຄົດ ແລະຄາດວ່າປີນີ້ການສົ່ງອອກຈະເພີ່ມຂຶ້ນປະມານ 5% ເທົ່າກັບ 44,42 ຕື້ກີບ.

ແນວໃດກໍຕາມເມືອງທ່າແຕງມີເປົ້າໝາຍການພັດທະນາຂະແໜງອຸດສາຫະກຳ ແລະການຄ້າແມ່ນຈະສຸມໃສ່ພັດທະນາການຄ້າທີ່ເປັນລະບົບຕ່ອງໂສ້ ຫຼື ເປັນຫົວຈັກຫຼັກແຫຼ່ງຂອງການພັດທະນາກະຕຸ້ນການຈະເລີນເຕີບໂຕທາງດ້ານເສດຖະກິດຂອງເມືອງໃຫ້ແຂງແຮງກວ່າເກົ່າໂດຍຈະຫັນຈາກພື້ນຖານເສດຖະກິດ

ກະສິກຳໄປສູ່ເສດຖະກິດການບໍລິການ ແລະ ປ່ຽນຈາກກະສິກຳປ່າໄມ້, ອຸດສາຫະກຳ ແລະການບໍລິການໃຫ້ກາຍເປັນເສດຖະກິດພູມປັນຍາປົກປັກຮັກສາສິ່ງ ແວດລ້ອມ ແລະ ຮັບປະກັນການພັດທະນາແບບຍືນຍົງ, ພ້ອມດຽວກັນນັ້ນກໍຫັນເຂົ້າສູ່ກົນໄກການຄຸ້ມຄອງຂະແໜງອຸດສາຫະກຳປຸງແຕ່ງ ແລະການຄ້າໃຫ້ ປອດໃສ, ເຂົ້າເຖິງ ແລະເອື້ອອຳນວຍຢ່າງເຕັມສ່ວນແກ່ການດຳເນີນທຸລະກິດ ຫຼື ການປະກອບອາຊີບຂອງປະຊາຊົນບັນດາເຜົ່າໃຫ້ດີຂຶ້ນເທື່ອລະກ້າວ.

ທ່ານຫົວໜ້າຫ້ອງການອຸດສາຫະກໍາ ແລະການຄ້າເມືອງຍັງໃຫ້ຮູ້ອີກວ່າ: ສຳລັບການຈັດຕັ້ງປະຕິບັດການສົ່ງອອກສິນຄ້າໃນປີ 2018 ຜ່ານມາເມືອງທ່າແຕງ ສາມາດປະຕິບັດວຽກງານການຄ້າມີຜົນສໍາເລັດຫຼາຍໆດ້ານໂດຍສະເພາະການສົ່ງອອກສິນຄ້າບັນລຸໄດ້ 42 ຕື້ກີບ ຊຶ່ງໃນນີ້ສິນຄ້າສົ່ງອອກສ່ວນໃຫຍ່ແມ່ນກາ ເຟ, ໝາກ ແໜ່ງ, ມັນຕົ້ນ ແລະພືດຜັກ.

 ຂະນະທີ່ວຽກງານການຄ້າພາຍໃນ ແລະຄຸ້ມຄອງທະບຽນວິສາຫະກິດເມືອງສາມາດຂຶ້ນທະບຽນວິສາຫະກິດໄດ້ 48 ຫົວໜ່ວຍ, ມີທຶນຈົດທະບຽນ 4,4 ຕື້ກວ່າກີບ ຊຶ່ງມາຮອດປະຈຸບັນຫົວໜ່ວຍວິສາຫະກິດທີ່ເມືອງ  ແລະແຂວງອອກທະບຽນແລ້ວມີທັງໝົດ 444 ຫົວໜ່ວຍ, ມີທຶນຈົດທະບຽນ 300 ຕື້ກວ່າກີບ. 

ພາບ ແລະຂ່າວໂດຍ: ໜັງສືພີມເສດຖະກິດ-ສັງຄົມ

 

         

แชร์