ອັດຕະປືຊຸກຍູ້ປະຊາຊົນຫັນມາລ້ຽງສັດເປັນສິນຄ້າໃຫ້ຫຼາຍຂື້ນ

  ປະຈຸບັນການຜະລິດເປັນສິນຄ້າຂອງຊາວກະສິກອນພາຍໃນແຂວງອັດຕະປື ພວມໄດ້ຮັບການຊຸກຍູ້ສົ່ງເສີມຢ່າງແຂງແຮງໂດຍສະເພາະແມ່ນການລ້ຽງສັດເປັນສິນຄ້າ, ທັງນີ້ກໍ່ເພື່ອຮັບປະກັນການຜະລິດສະບຽງອາຫານໃຫ້ພຽງພໍກັບຄວາມຕ້ອງການຂອງທ້ອງຕະຫຼາດເປັນການສ້າງລາຍຮັບທີ່ໝັ້ນຄົງໃຫ້ຊາວກະສິກອນໃຫ້ມີຊີວິດການເປັນຢູ່ທີ່ດີຂຶ້ນເທື່ອລະກ້າວ.

  ໂດຍອີງຕາມບົດສະຫຼຸບ ແລະທິດທາງແຜນການປີ 2019 ຂອງພະແນກກະສິກໍາ ແລະປ່າໄມ້ ແຂວງອັດຕະປືໃຫ້ຮູ້ວ່າ: ປີ 2019 ນີ້ພະແນກກະສິກໍາ ແລະປ່າໄມ້ແຂວງອັດຕະປືມີແຜນການຊຸກຍູ້ສົ່ງເສີມຊາວກະສິກອນຫັນມາລ້ຽງສັດເປັນສິນຄ້າໃຫ້ຫຼາຍຂຶ້ນ, ໂດຍຈະສຸມໃສ່ການຜະລິດເປັນສິນຄ້າດ້ວຍການຫັນກາ ນຜະລິດກະສິກໍາແບບທໍາມະຊາດໄປສູ່ການຜະລິດທີ່ທັນສະໄໝນໍາໃຊ້ເຕັກນິກການຜະລິດແບບວິທະຍາສາດ, ໃນນັ້ນ, ຈະສົ່ງເສີມການລ້ຽງສັດໃຫຍ່ປະເພດງົວຄວາຍໃຫ້ເປັນຟາມແບບຄອບຄົວໃຫ້ໄດ້ 38 ຟາມ, ເພີ່ມຂຶ້ນ 9 ຟາມ ແລະຈະຂະຫຍາຍເນື້ອທີ່ປູກຫຍ້າຈາກ 100 ເຮັກຕາ, ໃຫ້ເພີ່ມຂຶ້ນ 20 ກວ່າເຮັກຕາ ແລະໃຫ້ມີສັດລ້ຽງຈາກ 2.500 ໂຕ, ເພີ່ມຂຶ້ນ 396 ໂຕ, ສົ່ງເສີມການລ້ຽງໝູເປັນຟາມແບບຄອບຄົວໃຫ້ໄດ້ 5 ຟາມເພີ່ມຂຶ້ນ 2 ຟາມ,ໃຫ້ມີສັດລ້ຽງ 650 ໂຕ,ສົ່ງເສີມການລ້ຽງແບ້ແບບຄອບຄົວໃຫ້ໄດ້ 9 ຟາມ ມີສັດລ້ຽງ 275 ໂຕ, ສົ່ງເສີມການລ້ຽງສັດປີກແບບຄອບຄົວໃຫ້ໄດ້ 30 ຄອບຄົວ, ມີສັດລ້ຽງ 1.2 00 ໂຕ, ສົ່ງເສີມການລ້ຽງສັດແບບປະສົມປະສານໃຫ້ໄດ້ 13 ຟາມ .

 ສໍາລັບການລ້ຽງສັດເປັນສິນຄ້າແບບຄອບຄົວໃນໄລຍະຜ່ານມາເດັ່ນກວ່າໝູ່ແມ່ນການລ້ຽງໄກ່ຂອງ ທ່ານ ນາງ ບົວລະພາ ຈາກ 6 ພັນໂຕມາເປັນ 12 ພັນໂຕ, ສະໜອງໄຂ່ໄກ່ຈາກ 110 ແຕະ ຕໍ່ວັນມາເປັນ 210 ແຕະຕໍ່ວັນ, ການລ້ຽງໝູຂອງຟາມນັນທະລີ ຜະລິດລູກໝູມີແມ່ນພັນໝູຈາກ 200 ໂຕມາເປັນ 300 ໂຕ, ສາມາດຜະລິດລູກໝູໄດ້ຈາກ 4 ພັນໂຕ ມາເປັນ 6 ພັນໂຕ, ລ້ຽງໝູຊີ້ນຈາກ 3 ພັນໂຕມາເປັນ 6 ພັນໂຕຕໍ່ປີ, ລ້ຽງງົວຈາກ 500 ໂຕ ມາເປັນ 700 ໂຕ, ລ້ຽງແບ້ຈາກ 700 ໂຕ ມາເປັນ 2 ພັນໂຕ, ການລ້ຽງປາເດັ່ນກວ່າໝູ່ແມ່ນຄອບຄົວຂອງ ທ່ານ ສຸກປັນຍາ ຈັນທະມາດ ຈາກ 14 ໂຕນ ມາເປັນ 20 ໂຕນຕໍ່ປີສ້າງລາຍຮັບໄດ້ 260 ລ້ານກີບຕໍ່ປີ, ຄອບຄົວ ທ່ານ ສົມຈິດ ສາມາດ ຜະລິດປາແບບປະຫຍັດຕົ້ນທຶນໄດ້ 40 ໂຕນຕໍ່ປີ ຄິດເປັນມູນຄ່າ 520 ຫາ 560 ລ້ານກີບຕໍ່ປີ

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์